請即Like 又飛啦！Facebook Page
呢隻筍盤，震撼程度媲美fanfares：的確又係國泰港龍傑作！不過今次唔係香港出發，而係廣州！佢哋剛剛推出一項名叫「搶飛優惠」，將一系列短中長途地點晒曬式劈劈劈，其特色係Last Minute出發，基本上係即買即飛，但比香港版fanfares有樣好：1. 來回日期自己揀（當然要介乎一個時段內出發）；2. 個別長途航線嘅機票有效期長達一至三個月，旅遊彈性大增！不過請記住：所有航線必須由廣州出發，先搭港龍飛返香港，然後再喺香港轉機，有個別航點嘅轉機時間特長，揀嘅時候要留意。至於回程，只需Check-in時向地勤提出於香港取回行李（例如話喺香港等太耐轉機，要拎番啲行李換下衫，地勤都會理解，只需現場補辦手續就得），只要您持有香港身份證或香港認可之有效入境證件，咁就可以直接喺香港拎行李返屋企，回程咪變相直航囉！
講完玩法，就要講下呢期有乜筍盤先！出發日期為14/4 – 26/4，飛首爾HK$1,725（未連稅，下同）；墨爾本／悉尼HK$2,825；倫敦HK$4,375；紐約HK$5,875；仲有其他地方如東京呀，大阪呀咁，不過由於計落香港出發唔係貴太多，所以唔推介俾大家喇！有興趣自己上國泰官網望望啦！至於紐約同三藩市，國泰另有一隻有效期長達三個月嘅平盤，不過就貴少少：紐約HK$6,475，三藩市HK$5,463，出發日期為27/4 – 30/6（咦？跨到暑假喎）。就咁睇，面價同香港出發差冇幾，但實情係香港版嘅機票有效期只有一個月（紐約）／十五日（三藩市），相比廣州出發嘅三個月，明顯著數好多啦！最後出票日期為30/4，趁冇乜香港人知，快手喇！
（記得按下面「讚好」Share俾Facebook朋友）
留言