依家去台灣，真係分分鐘方便過去深圳！皆因台灣政府全力打造嘅免費公眾WiFi網絡iTaiwan，已經正式開放俾境外旅客免費申請（以前仲要有當地手提電話號碼先得）！雖然依家喺當地出電話卡上網都非常抵（例如遠訊1日任上網TWD100，3日都只係TWD250），不過免費嘅嘢，梗係有人Like，所以我哋都為大家講下點樣申請免費iTaiwan服務。

1. 入境後（無論台北台中定高雄），可以到觀光局服務櫃台或全台灣各地旅客服務中心服務台，憑護照申請iTaiwan帳號

2. 只需填寫表格，服務人員會俾番User Name及Password您

3. 之後，只要利用手機／平板電腦／手提電腦等等，搜尋”iTaiwan”WiFi網絡，再輸入User Name及Password就用得！

4. 除咗iTaiwan，您亦可以登入其他地方政府嘅免費WiFi網絡，如台北市嘅「TPE-Free」／新北市「New Taipei」／台中市「iTaichung」及台南市「Tainan-WiFi」，一共五大網絡，全部共4,400個WiFi熱點俾您免費上網！

小弟都用過iTaiwan免費WiFi，其實覆蓋面都多，例如各大捷運站月台，巴士站火車站等等，再加上台北市內有唔少政府設施（如公園，政府部門大樓），要搵iTaiwan網絡唔係太難。不過小弟始終鐘意買電話卡上網，話晒流動性夠強，又可以Share俾電腦用，加上唔駛同人爭網絡，少少錢就換來穩定可靠嘅服務，始終較為上算嘅。

詳情請睇：http://www.taiwan.net.tw/m1.aspx?sNo=0019133

iTaiwan官方網站：http://itaiwan.gov.tw

（覺得有用請記得按Like同Share俾朋友）

15/5，我哋「又飛啦！」率先披露新加坡虎航個仔：印尼曼達拉航空 Mandala Airlines將於24/7起開辦香港<->雅加達直航航線，原來今日已靜雞雞喺官網（即係虎航官網）開賣首航劈盤：買去程送回程（回程連油附都唔駛俾，不過印尼機場稅喺當地機場先俾，約HK$120），來回連稅最平HK$1,101起（已包括硬食嘅手續費HK$44），出發日期由25/7/2013去到明年29/3/2014，當然大時大節就冇回程$0機票啦！至於航班時間，已證實係每日對飛一班，香港飛雅加達為RI841 02:30/06:30，零晨紅眼機，回程為RI840 20:40/01:50+1，趕唔到尾班機場快線。不過之前都講過：雖然去程係零晨機，但去到雅加達可以轉駁早機飛印尼或其他東南亞城市（甚至澳洲珀斯及達爾文），回程亦可以中午先走，返雅加達亦趕及回程機返香港。印尼內陸廉航選擇多，價錢甚具競爭力，以後平飛印尼又有方法了！最後出票日期為29/5。

網址：www.tigerairways.com

（覺得抵請記得按Like同Share俾朋友）

信用卡嘅迎新優惠，好少有送機票，不過今次DBS白金信用卡Promotion就Hit中大家需要：31/8前成功申請DBS白金信用卡，即刻免費送您來回台北機票，仲可以先飛後簽賬 （只需出卡後2個月內簽番夠HK$4,800以上即可）！咦？咁啱今年台灣觀光協會有送1張來回台灣機票優惠：只要您由今年1/1至31/8起來回台灣3次就有（詳情請瀏覽：http://flyagain.la/?p=6467）。換言之，如果您今年已經飛咗台灣2轉，透過今次申請DBS白金信用卡，先賺1張台北機票，返嚟再賺多1張台灣觀光協會送嘅台灣機票，齊頭2張免費！一年飛4轉台灣，分分鐘仲密過去馬交啦～

咁點先可以極速簽滿HK$4,800呢？只要用呢張新白金卡，簽晒第一個台北Trip，計埋成班Friend機票酒店飲食購物消費，HK$4,800點都簽得晒啦！依家距離8月尾只有3個月，拿拿聲申請，齊齊台北見！

申請網址：http://bit.ly/YUqkcf

（記得按下面「讚好」Share俾Facebook朋友）

如果您係大專生，又可以喺15/5 – 15/6期間去旅行（奇怪！呢段時間唔係考試季節咩），國泰港龍有Special著數俾您！佢推出咗一批航點嘅專屬優惠，只限正在就讀指定大專學院嘅學生，地點覆蓋眾多，包括（來回未連稅，下同）：

福州／廈門／海口／三亞：HK$550（同平時fanfares價差唔多）

長沙／杭州／昆明／桂林／寧波／南京／溫州／武漢：HK$850（同上）

鄭州／青島／西安：HK$1,060（西安係幾抵買）

沙巴：HK$1,430（馬航差冇幾喎～）

峴港／河內／胡志明市／金邊：HK$1,580（峴港／金邊最抵，其他一般）

濟洲／釜山／首爾：HK$2,000（梗係首爾正啦～）

福岡／名古屋／東京／大阪：HK$2,500（同ANA價錢一樣，競爭力一般）

加德滿都：HK$1,800（強力推介！港龍2人同行每位都要HK$2,300，依家1人飛都得）

阿布達比／巴林／杜拜／阿卜杜勒／利雅德：HK$2,400（以價論價係幾抵玩，不過始終唔係後生仔熱門旅行地點）

阿德萊德／布利斯本／開因茲／墨爾本／珀斯／悉尼：HK$3,160（同fanfares淡季價相若，冇乜特別）

倫敦／法蘭克福：HK$5,060（倫敦呢口價值呀！法蘭克福都OK Good）

溫哥華／多倫多：HK$6,110（飛加拿大機票長期高企，尤其係多倫多，呢個價有So！）

至於受惠院校包括：城市大學／浸會大學／香港理工大學／嶺南大學／香港中文大學／香港教育學院／香港大學／香港科技大學／香港公開大學／香港樹仁大學／珠海書院／恆生商學院／東華學院／明愛專上學院／明德學院／香港高等科技教育學院

至於機票有效期：亞洲區短途為2-7日，中亞及長途就2-14日。

官網係出唔到呢隻飛，暫時要向各大旅行社出票（出票時須出示有效學生証），例如搵安運滿FUN問下。最後出票日期為14/6。

查詢電話：3913 6000

（記得按下面「讚好」Share俾Facebook朋友）

我哋「又飛啦！」曾經教大家「借分殺人」：透過購買哥倫比亞中美洲航空公司里數，以4折超平價換取星際聯盟（Star Alliance）旗下航空公司嘅商務或頭等艙（詳情請睇：http://flyagain.la/?p=5479）。今次就教大家加強版：「借分殺人v2.0」，如何透過購買Star Alliance分數，將來可以超平價換取國泰港龍等寰宇一家（One World）商務及頭等機票，好！是咁的：全美航空（US Airways）正推出一項買里數優惠，最高可以買1送1，優惠期去到31/5，多送里數如下：

－　買5,000　– 9,999里，多送25%
－　買10,000 – 19,999 里，多送50%
－　買20,000 – 29,999 里，多送75%
－　買30,000 – 50,000 里，多送100%

買每一里要US$0.035（HK$0.273），並加7.5%稅（價錢同哥航一樣，但哥航唔駛俾稅）。最抵係買夠50,000里，總成本為US$1,881.25（折合HK$14,674），最後可獲得100,000里，平均每一里成本為HK$0.14674，其實都平架！

但今次賺分目標，唔似哥航咁換番Star Alliance機票，而係對手寰宇一家（One World）機票！點解咁得意？原因係：全美航空已宣佈會同美國航空（American Airlines）合併，稍後會退出Star Alliance轉投One World懷抱。由於One World旗下成員一向少有買里數優惠（記憶中國泰港龍直頭未試過），有都好少做買1送1咁優惠（American Airlines最大方都係送50%），所以建議大家可以趁US Airways仲喺Star Alliance時，盡量買夠里數，等2014年US Airways正式轉投One World後，可憑戶口內嘅里數兌換一眾One World機票，當然包括大家至Like嘅國泰同港龍啦！至於新計劃下嘅兌換里數表，US Airways就未正式公佈，由於兩間航空公司嘅兌換表有所不同，呢個正係成件事嘅唯一風險：

US Airways兌換Star Alliance機票里數表：http://shopping.usairways.com

American Airlines兌換One World機票里數表：https://www.aa.com

簡單講，以香港<->北美（美國及加拿大）為例：

來回商務艙：US Airways（90,000里）vs American Airlines（110,000里）

來回頭等艙：US Airways（120,000里）vs American Airlines（135,000里）

如果將來雙方以1:1里數合併，持有US Airways里數將被眨值20%，不過估計機會唔大（就算American Airlines肯，US Airways班客都唔肯制啦）。上年深圳航空為加入Star Alliance，特別為原有里數客戶提供里數補償，以平衡番新兌換制度，所以有理由相信「眨值20%」係最大及唯一風險。不過買1送1的確非常著數，故此建議大家今次先入手，進取者，可狂開唔同新戶口買分，儲定里數，靜待明年轉會佳音吧！

溫馨提示：新戶口需要註冊成功14日後，先可享買1送1優惠，計番日子，10/5前要申請啦！

網址：www.usairways.com

（記得按下面「讚好」Share俾Facebook朋友）

又到週末，又有港航週末熱賣！忍咗手成個禮拜？記得今晚00:00至週日23:59搶飛啦！今個星期似乎港航唔再限制出發日子，即係變番日日出發都得，正呀！不過小心佢隨時又更改條款。記住，您必須係紫荊會會員，Login後先可以用Promotion Code獲得優惠（紫荊會免費申請網址：http://bit.ly/XiCJvm），扣減不適用於購買「一Click即享」機票。如果有二人以上同行，建議分開訂，用盡扣減優惠！

今個週末優惠同上週大致相同，各參與地點嘅Promotion Code如下：

沙巴／哈爾濱／成都／重慶／峇里島／河內：D4HDVFIO（減HK$500）

海口／三亞／福州／北京／上海浦東／上海虹橋／南京／杭州／昆明：wZQ638EV（減HK$300）

台北／台中／沖繩／廈門／曼谷／布吉：OWSqPZGQ（減HK$200）

訂購以下地點，價錢如下（折實價）：

台北：（10/7前）週日至三出發來回HK$420起（連稅HK$1,127），週四至六出發來回HK$580（連稅HK$1,287）；（11/7後）來回HK$720起，連稅HK$1,427起

＃搶飛教學＃

記得以下買飛步驟：

Step 1：搜尋10/7前出發香港飛台北，記住機票有效期係2-7日
Step 2：如果見到有HK$620或HK$780機票，恭喜您！就係您今次要搵嘅目標！
Step 3：記得先登記及login紫荊會會員（紫荊會免費申請網址：http://bit.ly/XiCJvm）
Step 4：再輸入Promotion Code : OWSqPZGQ（大細階必須跟足）
Step 5：系統會幫您減HK$200，總之連稅價係HK$1,127或HK$1,287就去俾錢啦！

台中：HK$760起，連稅HK$1,467起（搶飛方法同上）

記得如果今年1/1 – 30/8前飛咗台灣3次，可以向台灣觀光協會香港辦事處申請換領一張香港來回台灣免費機票，詳情請按此。

廈門：（15/5開航，31/5前出發）HK$230起，連稅HK$972！跌破HK$1,000大關！不過建議28/5打後先入手，事關佢有一隻單程優惠，雖然減完都要HK$260，但勝在回程可以另外買春秋航空，因為港航回程開早機HX262（08:30/09:45），相反春秋開夜機9c 8658（22:25/00:05），單程價錢都係HK$199，又可玩多一日！

沙巴：HK$1,920起，連稅HK$2,714起，唔抵！

曼谷：HK$1,080起，連稅HK$1,898起，同空氣亞洲有得Flight！

海口：HK$670起，連稅HK$1,412起

三亞：HK$810起，連稅HK$1,552起

河內：HK$770起，連稅HK$1,523起

福州：HK$520起，連稅HK$1,262起

其他地點請上港航官網發掘下

網址：www.hongkongairlines.com

（記得按下面「讚好」Share俾Facebook朋友）

飛太平洋小島嘅機票一向少見劈盤，但今日竟然有喎！講緊嘅係新西蘭航空，佢由今日中午12:00起一連四個Weekend推出一系列太平洋小島機票限時優惠。首輪先賣斐濟／諾福克島／薩摩亞／湯加四個航點，淨機票HK$4,990起，由今日（26/4）中午12:00開賣，最後出票時間為28/4週日23:59，出發日期為7/5 – 26/6。除咗斐濟有Air Pacific香港直航外，其他三個地點必須轉機，以呢個價錢飛咁冷門嘅渡假天堂，的確幾超值（平時連稅價起碼一萬），值得入手。連稅計，斐濟HK$8,138起，諾福克島HK$7,816起（澳洲東部離岸屬地，五六月天氣涼啲，大概十幾度左右），薩摩亞HK$7,641起，湯加HK$7,871起。

網址：www.airnewzealand.hk

（記得按下面「讚好」Share俾Facebook朋友）

尋晚我哋「又飛啦！」率先披露巴西天馬航空（TAM）由歐洲飛秘魯嘅漏洞。唔Like秘魯？巴西又如何？仲要係當地初夏呢（陽光與海灘，正呀）！原來只要用番同一原理：由西班牙馬德里出發，回程飛返德國法蘭克福，飛巴西兩大城市：里約熱內盧及聖保羅一樣有漏洞價！

簡單啲講：出發日期由十月至十一月底，回程可以去到十二月底，四款組合：

1. 來回聖保羅淨機票US$374（HK$2,917），連稅US$445（HK$3,471）；
2. 來回里約熱內盧淨機票US$395（HK$3,081），連稅US$482（HK$3,760）；
3. 去程飛里約熱內盧，回程聖保羅出發，淨機票US$351（HK$2,738），連稅US$430（HK$3,354）＊最抵＊；
4. 去程飛聖保羅，回程里約熱內盧出發，淨機票US$418（HK$3,261），連稅US$497（HK$3,877）。

至於里約熱內盧與聖保羅，單程內陸機約HK$300-500不等，一般都係搭車，因為兩個城市都係沿海，滿佈長長沙灘，唔少旅客慢慢玩晒兩城，所以似乎第3個組合係最抵玩，因為可以一次過玩晒兩城，價錢又係最平。至於點樣接駁馬德里同法蘭克福？最平係國航，卡塔爾都係理想之選，呢套連稅約HK$6,000+，加埋HK$10,000左右，看似昂貴，但可以玩晒四地（馬德里，法蘭克福，聖保羅，里約熱內盧），非常抵玩。Check過系統，唔難揀來回日子，記得揀Multi-City，去程輸入MAD（馬德里） / SAO（聖保羅）/ RIO（里約熱內盧），回程輸入 SAO（聖保羅）/ RIO（里約熱內盧）/ FRA（法蘭克福），就算結果唔係以上價格（例如US$8xx），可以再按”See More Prices and Dates”，系統會提醒您仲有其他價錢選擇，一Click目標價錢，佢就會話您知邊啲來回日子有漏洞機票賣嘞。

有Fans尋晚問：係咪TAM自己減價咋？但喺上一篇文我哋已拆解原因：機票價冇差別，只係航空公司計錯稅及油附，計少起碼US$300，咁已經證明係漏洞啦！巴西天馬航空係Star Alliance成員，可能都有分儲。記住：千祈唔好打電話／email問航空公司，以免打草驚蛇！漏洞嘅嘢，手快有手慢冇！

網址：www.tam.com.br

（記得按下面「讚好」Share俾Facebook朋友）