上週因為劈價太細而俾網民鬧爆嘅AirAsia，今日又嚟一個秋冬小劈：飛檳城單程連稅HK$658起，曼谷單程連稅HK$799起，出發日期為1/10 – 31/12，算係即買即飛，但個價只係貴過上週劈超遠期貨少少而已，唔怪得俾網民狂炳啦！Check過系統，呢批機票數量唔多，飛檳城去程得：8,9,11/10、21,24,27,29,30/11、4/12，回程竟然只得17/12一日咁大把！係咪AirAsia未放飛？曼谷就好啲，來回日子都有唔少選擇（當然回程早上06:30大把平飛，您唔會吼掛）。順帶一提，可能AirAsia見上週開倉賣得唔好，佢暗地裡又放番啲平飛，至於邊啲日子同城市有平，不妨自己上番官網慢慢Search。

網址：www.airasia.com

（記得按下面「讚好」Share俾Facebook朋友）

我哋「又飛啦！」曾經喺15/5報導過，AirAsia當時劈售明年春天機票，香港出發唔算超筍，點知今晚00:00開賣嘅1/4/2013 – 30/9/2013出發嘅超遠期貨，一樣唔筍，仲貴咗啲添！先講票價：香港出發，去曼谷（連稅，下同）單程HK$598起（上次HK$498起），來回HK$1,114起（上次HK$1,025起）；布吉HK$638起（上次HK$538起），來回HK$1,326起（上次HK$1,065起）；馬來西亞檳城／沙巴／吉隆坡單程HK$568起（上次HK$498起），來回HK$1,016起（上次HK$876起），搭AirAsia X經吉隆坡轉機往澳洲三城（墨爾本／黃金海岸／珀斯）單程HK$1,394起（上次HK$1,422起），來回HK$3,476起（上次HK$3,452起）；至於澳門出發，飛清邁單程MOP428起（上次MOP288起），來回MOP907起（上次MOP669起）；曼谷／吉隆坡單程MOP528起（上次MOP438起），來回MOP989起（上次MOP827起）；搭AirAsia X經吉隆坡轉機飛墨爾本或珀斯，單程MOP1,389起（同上次一樣），來回MOP3,533起（上次MOP3,481起），以預購超過7個月AirAsia機票嚟講，唔算要即刻郁手個隻，除非您一早已Plan好去旅行，否則有時等佢Last Minute劈價仲實際（雖然價錢會比今次開倉略貴）。不過同上次一樣：澳門朋友如果想飛澳洲就要郁手啦！事關選擇冇香港咁多，呢個價值得去馬。

網址：www.airasia.com

（記得按下面「讚好」Share俾Facebook朋友）

香港去汶萊，直航嘅只有皇家汶萊航空，永世冇劈價。如果想平平哋去，可以考慮呢個Offer：馬航旗下嘅飛翼航空（MASwings）正推出短途機票優惠，由東馬沙巴飛汶萊首都斯裡巴加灣市，淨機票$0！只需俾油附及稅就得，來回HK$286，仲平過搭船過澳門！您只需加番張AirAsia香港飛沙巴就掂。不過呢程機真係幾短，只有30分鐘，您預完全冇Service就得啦！出發日期到31/12，最後售票日期為30/9，佢每日有兩班機對飛，一午一晚，Check過系統，仲有唔少日子供應。

網址：www.maswings.com.my

（記得按下面「讚好」Share俾Facebook朋友）

AirAsia好耐冇推出$0機票，聽晚（18/9）零晨又劈啦！講緊嘅係AirAsia明年春夏機票大開倉，出發日期為1/4至30/9，整整六個月長！今次佢分兩個階段推出：首階段係18/9零晨00:00開始賣，全部係國內線機票，部份淨機票$0起（稅同油附梗係要俾啦）！由於航點非常多，建議您上番官網Check價錢。由於AirAsia系統以連稅及油附報價，搵馬來西亞內陸機票時，若然您見到HK$69或76者，都應該係$0機票，唔駛諗，即搶！西馬飛東馬，或東馬飛西馬者，均以HK$126起步，一見呢批貨就唔怕買；泰國國內線方面，所有HK$28者都屬於$0機票，主要集中喺曼谷飛清萊／董里／佛統，清萊抵買啦！最後印尼，HK$5一睇就知等如$0機票，例如峇里去泗水就係HK$5！峇里去雅加達都係HK$147，買定看門口啦！第時夾番張華航香港雅加達平機票就得。至於國際線劈價將會喺20/9零晨00:00開始，詳情稍後報導！

網址：www.airasia.com

（記得按下面「讚好」Share俾Facebook朋友）

聖誕節想外遊，一般都要捱附加費，如果週六（22/12）起程，週三（26/12）回程，只需請24/12一日假（有啲公司放埋下午添），就可併出5日4夜假期，想慳錢飛番轉，呢一刻訂新加坡，機票都唔貴（當然亦唔平）。幫大家Check過，只要來回分別向兩間廉航訂，其實都著數：去程搭捷星JetStar，揀早機11:05出發，去程連稅HK$1,178；回程就揀虎航TigerAirways，揀第二班14:15出發回港，回程連稅及手續費就HK$1,330，兩者加埋只係HK$2,508。一般飛新加坡如國泰同新航，稅及油附來回約HK$784，換言之呢張機票大約值HK$1,724，以請1日就換到5日假而言，係非常化算，值得慳家旅客考慮。依家馬來西亞新山有全新開幕嘅LegoLand，喺新加坡有直車去，都係粒幾鐘車程，去新加坡又有一個理由喇！

捷星網址：www.jetstar.com

虎航網址：www.tigerairways.com

（記得按下面「讚好」Share俾Facebook朋友）

AirAsia今晚零晨00:00又開倉，不過只算小至中劈：賣明年3/1至31/3出發，香港飛吉隆坡單程HK$638起（連稅，下同），檳城單程HK$568起，來回連稅你預HK$1.3-1.5K左右，比平時賣六舊以上，預購三至半年嚟講，都值得入貨；澳門出發同樣有優惠，飛吉隆坡單程HK$549起，曼谷單程HK$498起，清邁HK$549起。一如以往，唔會日日有咁平，要自己發掘架！依家立即去官網Check下啦喂！

網址：www.airasia.com

（記得按下面「讚好」Share俾Facebook朋友）

新加坡兩間廉航：虎航同捷星JetStar耐唔耐會掟批超遠期平機票，今次就輪到虎航，佢將明年20/2 – 13/3新加坡返香港嘅機票小劈一番，淨機票最平HK$250，連稅HK$425，去程如果揀現時最平嘅Early Bird Fare HK$478（連稅HK$598），加埋佢HK$100 Booking Fee，來回總共HK$1,123（唔包行李寄艙），係咪最平？減埋去程就係！事實上史上最低位大約係每張連稅HK$7-800，今次係貴咗四舊水，唔想等又有需要又或者一大班人去嘅，訂啦（因為最平個啲，人數多未必搶到）！否則好似小弟呢啲ad-hoc旅人（即旅行全因有超筍機票），等下都冇壞。

網址：www.tigerairways.com

（記得按下面「讚好」Share俾Facebook朋友）

馬航旗下嘅飛螢航空（Firefly）今日推出新一批平機票，由吉隆坡蘇邦機場（唔係吉隆坡國際機場）／檳城以及哥打巴鲁出發嘅馬來西亞國內線固然會劈（單程連稅HK$195起）；至於國際線，就以今次介紹嘅檳城飛蘇梅島最抵：逢二／四／六出發，秋季出發（29/8 – 30/11）單程連稅RM199（折合港幣約HK$520）起，來回預HK$1,040，再配多張AirAsia香港<->檳城，一雞兩味連埋稅HK$3K左右，比直航搭曼谷航空平HK$2K以上，雖然唔可能做到即日轉機，來回各留檳城一日，但去蘇梅歎完Resort再返檳城食個痛快，聽落都吸引呀！Check過系統，暫時10月頭／11月頭及尾仲有少量供應，係就爽手Book！

網址：www.fireflyz.com.my

（記得按下面「讚好」Share俾Facebook朋友）