多謝「又飛啦！」Fans “Stephen Liu”報料，有一單超平機票同大家介紹！經過我哋反覆查證，應該唔係漏洞，而係一種因銷售地區不同所引致嘅價格差異，導致超平機票產生！簡單講句：搭中國南方航空，吉隆坡／檳城出發，經廣州轉飛奧克蘭，來回淨機票只係HK$3,050起，連稅HK$5,860起。咁您會問：車！要由吉隆坡北上廣州再南下奧克蘭，有病咩！咁您就走漏眼！因為當中有兩個機票條款，可以令呢套來回機票立即升值：1. 呢張機票可以任您Stopover，即係每個城市都可以俾您免費停留；2. 機票有效期長達一年，咁您大可以將四程機票（1. 吉隆坡／檳城往廣州；2. 廣州往奧克蘭；3. 奧克蘭往廣州；4. 廣州往吉隆坡／檳城）拆開嚟玩！由一個假期分拆成三個假期，實際操作係：
旅程1. 買一張單程AirAsia機票飛去吉隆坡／檳城玩餐飽（最衰依家AirAsia只有吉隆坡有直航，檳城要轉機），然後搭中國南方航空，使用第一程返廣州。到廣州後，拎番寄艙行李（如有），再搭車落香港。
旅程2. 北上廣州白雲機場，搭第二程機直飛奧克蘭；若干日後，再搭番中國南方航空直飛廣州，完成第三程。到廣州後，拎番寄艙行李（如有），再轉車落香港。
旅程3. 北上廣州白雲機場，搭第四程機飛吉隆坡／檳城，玩完後，再買張AirAsia單程直飛回港。
以上呢三個旅程，唔需要連住落，只需出票後一年內完成即可，更改日子免費（如果想改嘅日子艙位供應有變，可能要補差價），取消費用為CNY$1,000。如果加埋香港來回吉隆坡／檳城嘅AirAsia機票約HK$1,200連稅，再加埋兩次香港來回廣州車票共HK$800，三個旅程機票總成本為HK$5,860 + HK$1,200 + HK$800 = HK$7,860，呢個價，香港一次直航來回奧克蘭都唔止！況且依家變出三個假期呢！加上Check過系統，年尾紐西蘭夏天都輕易搵到呢個價錢，聖誕／新年／農曆新年都有添！旺季香港直航冇萬萬聲都落唔到樓，有心年底去紐西蘭者，宜快動手！記住Check機票時，用Multi-Destination去Search，輸入四組來回地點：1. KUL or PEN -> CAN；2. CAN – AKL；3. AKL – CAN；4. CAN – KUL or PEN，每程記得只揀直航班次，系統最後會告知價錢，一見連稅價係US$751者，即係今次您要動手嘅目標喇！
（記得按下面「讚好」Share俾Facebook朋友）
