呢舖真係勁走漏眼，竟然冇人見到如此筍盤！11月指定日子搭加航直飛溫哥華，來回淨機票低至HK$2,997，連稅HK$5,370，相比佢依家做緊嘅秋冬優惠HK$4,007仲要平HK$1,000！溫哥華直航久未見到呢口價，原因好簡單：因為國泰今期fanfares正正有溫哥華來回HK$2,990，加航見狀梗係要還擊，但奇在冇宣傳！相比國泰fanfares，加航呢隻筍盤有兩大優勝之處：1. 唔駛限死來回日期，睇供應；2. 機票有效期長達1個月。Check過官網，HK$2,997去程日子包括：08/11, 09/11, 17/11, 19/11, 24/11, 26/11, 29/11，短期內需要返溫哥華探親者要把握機會喇！相信今晚就冇烏～

網址：www.aircanada.com

（覺得抵請記得按Like同Share俾朋友）

又係長途機票系列，今站嚟到加拿大！好少劈價嘅加航推出兩隻筍盤：直航溫哥華來回淨機票HK$4,050起，連稅HK$6,344起；飛多倫多（經溫哥華轉機）來回淨機票HK$6,100起，連稅HK$8,447起（直航連稅要一萬頭）。直航溫哥華仲有呢口價，應該係加航近期少見之作，最值得推介！如果您需要秋天飛去溫哥華採親者，唔好等，要即食！至於飛多倫多，呢口價當然唔算最平，不過多倫多線需求一直好大，難有大減價益街坊。出發日期為6/9 – 31/10，機票有效期21日，最後出票日期為16/9，香港出發限坐AC8（19:50/16:35）。官網冇得賣住，不如上真旅網望住先。

網址：www.travelzen.com

（覺得抵請記得按Like同Share俾朋友）

今早澳洲時間10:25分，一架加航AC34航班從悉尼前往溫哥華及多倫多。起飛後，機員發現廚房內一部焗爐冒煙，機長立即宣佈回航，喺海上放油後，於中午12:16分安全降落悉尼機場，機上264位乘客並無受傷。機長報告事件只係輕微，但為安全起見必須回航，澳洲運輸安全局亦表示無需調查。喺機場拆除事固焗爐後，班機已於下午1:55分再度起飛。

呢單虛驚其實好少事，不過自從被轉發上大陸微博後，立即引起唔少討論。好多人將佢同溫州動車意外相提並論，並大贊加航關心人命安全。「焗爐冒煙咁小事都回航？」，「回航放油啲錢好貴喎！」，「羨慕，我哋啲領導一定唔捨得俾！」。其實唔係加航特別好，只係大陸班官特別差啫！

消息來源（有片！）：www.smh.com.au

（記得按下面「讚好」Share俾Facebook朋友）