港龍經已宣佈今年7-9月推出直航清邁嘅定期航班（以前都有直飛清邁，只不過係不定機包機服務），逢三／四／六／日各對開一班，相比經澳門飛清邁就梗係貴啲啦！出套票就唔同。都有一排冇報SunTravel新哥嘅泰國筍盤，今次可以搵下佢，因為佢已經有港龍清邁套票賣，4日3夜最平住Mecure就HK$2,388起（未連稅，下同）；住All Season就$2,488，俾多$1就住多一晚！住Holiday Inn Resort就HK$2,788，豪爆嘅The Chedi（圖）亦只係HK$3,688，暑假飛都仲有咁抵，係就拿拿聲聽早Call新哥出飛。

留意位：

1. 去程 KA232 逢三/四/六/日 15:05 / 17:10；回程 KA233 逢三/四/六/日 18:20 / 22:20
2. 出發日期：1/7 – 23/9；暑假出發（13/7 – 24/8）加$200
3. 機票有效期：3 – 8日
4. 訂購日期：30/3  – 10/04，訂位後須於3日內付款出票

查詢電話：2388 4003

（記得按下面「讚好」Share俾Facebook朋友）

今早零晨AirAsia開始推出年底超平早餐盤，想連埋酒店一齊訂？可以去佢旗下套票網站AirAsiaGo。一向跟佢出套票比自己分開訂酒店同AirAsia機票平少少，今次就趁機票劈價，連訂指定酒店都額外打9折（酒店範圍廣泛，泰國／馬來西亞／澳洲／印尼等等乜都有），真係「雙劈合壁」，超平超值！出發日期同出票日期皆與特價機票相同，落Booking時記得輸入優惠代碼：BHS2801。

留意位：

1. 最後出票日期：1/4

2. 出發日期：1/10 – 31/1

3. 優惠代碼：BHS2801

4. 必須2人同行

網址：www.airasiago.com

（記得按下面「讚好」Share俾Facebook朋友）

臨急抱佛腳，復活節旅行未有著落？飛越南啦！芒果網仲有一隻胡志明市4日Package，出發日期正正係6/4復活節假第一日，9/4返，換言之一日假都唔駛請就飛得，套票價HK$2,999起，飛越南航空（去程VN595 1520/1650，回程VN594 1050/1415），入住位於Distrit 1嘅3星酒店，包括Minh Khang / Asian Ruby 3 / Cap Town / A & EM Ly Tu Trong 酒店，包埋早餐，相比起熱門旅遊點真係平一大截，不過機位有限，要訂就快手（去越南需要簽證，需時4-5工作天，費用HK$400）！

網址：big5.mangocity.com

（記得按下面「讚好」Share俾Facebook朋友）

復活節去曼谷，貴到嘔！如果肯等等，之後至6月先出發，平一大半有多呀！除咗上星期我哋提過嘅港航平機票外，國泰如果你肯跟套票都一樣有平選擇。國泰假期推出「想玩就玩」優惠套票，有一系列酒店俾你揀，最平住FuramaXclusive Sathorn只需HK$1,450（未連稅，下同），呢間我都住過幾次，距離Chong Nonsi BTS站只需3-5分鐘步程，唔駛叫TukTuk咁慘，抵住！中價嘅就梗係揀Central World樓上嘅Centara Grand，位置極好，只需HK$1,950！高價嘅，住半島酒店啦！只需HK$2,120起，喂！香港嗰間一晚都唔止啦！其實我哋計過，扣番酒店錢，呢張GV2（2人同行）機票只賣HK$1,100左右，抵爆！

留意位：

1. 出發日期：1/4 – 30/6

2. 需搭指定航班：香港至曼谷只適用於CX755（3/4 – 7/4除外 )；曼谷至香港只適用於CX754

3. 機票有效期：2 – 7日

網址：www.cxholidays.com

（記得按下面「讚好」Share俾Facebook朋友）

大阪啲機票成日都唔落價，要平唯有出套票啦！想3 – 4月去大阪賞櫻花，H.I.S.有隻印度航空4日3夜套票都諗得過，最平入住大阪難波Hillarys酒店Semi-Double房只係HK$2,698起（未連稅，下同），想住番旺區心齋橋，揀富士屋酒店Semi-Double亦只係HK$2,858起，仲有其他酒店選擇。搭印航有樣嘢好，就係時間正，去程搭早上7:30機，去到仲係早上11:50，回程搭13:25，以呢個價嚟講都算抵，雖為印度航空，班「朋友」應該喺香港落得七七八八，唔駛太驚成機有「朋友」味。至於幾時有櫻花睇，就要留意3/3下午1時日本氣象廳公佈。

網址：www.his.com.hk

（記得按下面「讚好」Share俾Facebook朋友）

飛倫敦，之前我哋都報過國泰／新西蘭航空齋機票約HK$3,800左右未連稅，英航都有類似優惠，6月前飛倫敦就HK$3,880起，7-8月暑假都只係HK$5,880起（可以去睇倫敦奧運喎！）。咁你會問：車！同價我不如坐番其他航空公司？起碼空姐後生又靚啲，之不過如果你2月份出發跟埋佢套票出，計落就唔同講法，揀佢指定酒店，例如4星級Holiday Inn Kensington Forum，住4晚每人連稅只係HK$8,950左右，酒店出面訂起碼每晚HK$1,550，除番開酒店同埋機票油附，呢張GV2只係HK$2,500有找，抵爆。講番英航呢隻HK$3,880飛，2月份就日日有，3月至6月就要夾日子。其他英國城市都有呢個Offer，詳情請上官網睇睇。

網址：www.britishairways.com

（記得按下面「讚好」Share俾Facebook朋友）

都好耐冇報沖繩筍盤，冇他嘅，依家唔係沖繩旅遊旺季，氣溫十幾廿度左右，冇得陽光與海灘，咁都有名勝古蹟行下嘅！東瀛遊呢期有唔少沖繩平套票，不過好多都要平日來回，但唯獨有一隻港龍指定日子出發嘅4日套票，指定8/3同15/3（週四）出發，玩埋六日，咁請2日假就飛得，住沖繩那霸縣廳前金域酒店或那覇前島Relax酒店都只係HK$2,699起，呢個價，旺季連齋機票都唔得，Check過網站仲有位，你可以網上即時訂購。

網址：www.egltours.com

（記得按下面「讚好」Share俾Facebook朋友）

港龍呢期冇推出上海筍盤，夾套票就唔同喇！港龍假期有一隻飛上海嘅套票，如果揀入住朗廷集團屬下酒店（包括上海南橋綠地逸東「華」酒店/上海朗廷揚子精品酒店/上海新天地朗廷酒店/88新天地）都有特惠，最平套票入住2晚上海南橋綠地逸東「華」酒店只需HK$2,410起（未連稅，下同）。我就住過佢新開嘅上海新天地朗廷酒店，上年先落成，位處新天地裡面，每間房設計型格十足，最難忘係佢個Rain Shower同埋勁大浴缸！仲有每次入房都會自動Play 古典音樂歡迎你番嚟，非常體貼！呢間房依家賣HK$1,820連稅真係要試試（平時開賣二千幾架）！拆番開，張GV2機票只售HK$1,6K左右，港龍喎！抵呀！

留意位：

1. 最後出發日期：30/3

2. 適用航班：香港往上海（浦東）：星期日至四出發不適用於KA802/864/876/804/892 　／　香港往上海（浦東）：星期五至六出發適用於所有航班  + 上海（浦東）往香港適用於所有航班

3. 機票有效期：2 – 7日

網址：www.cxholidays.com

（記得按下面「讚好」Share俾Facebook朋友）