好險！尋日大韓航空一架A380客機（編號KE701）由首爾飛去東京成田機場，降落時機身向右邊傾斜，結果第4號引擎同地面有少許磨擦，機師最後擺平後安全駛達停機坪，機上168個乘客冇受傷。機場一度封閉肇事跑道20分鐘，要清理花痕同檢查跑道。經當地維修人員檢查後，証實可以再飛，最後KE702正常執勤返回首爾，比原定時間只係遲咗1小時。

呢單嘢係海外航空討論網站引起熱烈討論（http://www.avherald.com/h?article=4400bee5&opt=0）。雖然有關當局並未公佈原因，但網民都覺得似係人為多於天氣問題。以A380咁大咁重，尋日天氣又唔惡劣，咁容易失平衡？大韓新機出意外，都唔係第一次， 1998年嘅”金浦8702″空難，當時架747-4B5機只係服役2年咁大把，就因為天雨關係降落時滑出跑道撞埋; 1983年大韓”007被蘇聯擊落事件”，最終調查亦證實係機長冇執行正常操作模式，導致誤入蘇聯領空，被軍方發射兩枚飛彈將佢擊落。其他大大細細嘅大韓空難，我唔想再提，希望大韓今次要認真徹查事件，如果唔係，我就建議大家唔好搭大韓A380機住，等班機長操熟架機先好搭，無謂搵自己條命較飛！

相關新聞 : www.jiji.com/jc/c?g=soc_30&k=2011072100867 

（記得按下面「讚好」Share俾Facebook朋友）