長榮航空近期都幾進取，除咗台北線同美加線之外，仲有一隻北海道優惠，出發日期由2015年1月1日至2月12日、2月27日至4月2日、4月8日至4月29日、5月2日至7月10日，香港經台北來回函館/旭川HK$3,210起，連稅HK$3,772起、札幌HK$3,660起，連稅HK$4,291起。呢張飛最大賣點係可以揀Hello Kitty專機，視乎供應；另外，香港飛函館同旭川本身都冇正航，所以都幾抵買。不過呢張飛唔可以中停台北，想玩埋台北唯一方法係自製隔日轉機。Check過系統，函館供應足，札幌供應就相對較少，而旭川出發日期至2月12日，機票有效期為14日，啱就上官網買飛啦。

Hello Kitty 專機時間表：

香港<->台北（雲彩機）
去程 BR858 21:05 / 22:45
回程 BR857 18:10 / 20:00

台北<->札幌（歡樂機）
去程 BR116 09:30 / 14:05
回程 BR115 15:20 / 19:00

網址：www.evaair.com

（覺得抵可用Whatsapp同LINE Share俾朋友架）

長榮北海道優惠，函館/旭川$3,210起、札幌$3,660起，機票有效期14日

日元係咁跌，除咗東京／大阪等熱門城市外，有冇諗過想趁機去埋日本小城市？今次就介紹一隻罕見平盤：搭中國東方航空，經上海轉飛，出發日期由依家到3月期間，來回淨機票HK$1,330起，連稅計：廣島HK$2,370起、長崎HK$2,428起、鹿兒島HK$2,470起、靜岡HK$2,500起、岡山、新瀉（至1月中）HK$2,680起、旭川HK$2,990起、小松HK$3,080起。由於以上各航點香港均無直航（鹿兒島雖然有港航直航，但票價長期高企），轉機呢口價還可以。呢套飛最大賣點有二：1. 可以OpenJaw，想玩多幾個地點又不走回到路啱哂；2. 東方航空每位乘客包兩件23kg免費寄艙行李，Shopping狂啱晒。Check過系統，平機票數量以淡季為主，農曆年期間未見，另外部份航點因轉機時間需停留上海一個晚上，而2月供應極少，加上唔係日日都有航班，大家要俾多啲耐性Search，啱就上Expedia買飛。

請留意：大陸空管頻頻，轉機時間最好預鬆起碼4-5小時以上。

網址：www.expedia.com

（覺得抵可用Whatsapp同LINE Share俾朋友架）

罕見！東航平飛日本廣島、長崎、靜岡、岡山、新瀉、旭川、小松來回機票$1,330起

長榮航空日前推出日韓淡季盤，出發日期由9月1日至9月4日、9月9日至9月26日、10月3日至12月16日，每位連稅計：沖繩HK$2,379起、東京成田HK$2,803起、福岡HK$2,907起、大阪HK$2,986起、北海道旭川 / 函館HK$3,602起、首爾HK$3,753起、札幌HK$3,981起。以呢口價嚟講，香港無直航嘅旭川同函館相對吸引，另外，飛札幌唔過HK$4K都好值得入手喎。呢套飛兩大賣點：1. 飛札幌可以搭Hello Kitty歡樂機，而港台線就可搭Hello Kitty雲彩機（Hello Kitty彩繪機或會因航班調動而更改）；2. 回程可免費中停台北一次（只需付HK$80起台北機場稅），玩多個地方都唔錯！Check過系統，呢個價位主要集中10月尾同11月，而部份台北飛日韓航班時間係早機出發，所以前一晚要先飛台北住返晚。機票有效期為10日，最後出票日期為12月16日，有興趣就上官網買啦。

網址：www.evaair.com

（覺得抵可用Whatsapp同LINE Share俾朋友架）

長榮航空一雞兩味，淡季經台北飛日韓來回$1,640起，可搭Hello Kitty機

（覺得抵可用Whatsapp同LINE Share俾朋友架）

好多fans都問北海道有冇平機票，唔知呢隻幫唔幫到您？台灣復興航空有一隻早鳥超值專案，由台北桃園直飛北海道四大城市：札幌／函館／旭川／釧路，來回淨機票TWD10,000起（約HK$2,564），連稅計，札幌TWD12,279（約HK$3,148），函館／旭川／釧路一律TWD11,972起（約HK$3,070），再配合一張香港來回台北機票連稅約HK$1.3K，香港<->北海道連稅只係HK$4.3K起，的確有睇頭，仲可以一雞兩味玩埋台北及北海道呢！出發日期為1/4 – 25/10，但呢口價暑假期間會貴啲，如果想4-6月及9-10月去北海道者，值得考慮！機票有效期14日（夠您玩晒兩地），最後出票日期為31/3。

網址：www.tna.com.tw

（覺得抵請記得按Like同Share俾朋友）

長榮劈價第2浪，今晚00:00又嚟啦！新一批機票包括：福岡（HK$1,190，連稅HK$1,911），旭川（HK$2,470，連稅HK$3,112），峇里島（HK$1,230，連稅HK$1,872），巴黎（HK$2,720，連稅HK$5,097），洛杉磯（HK$3,310，連稅HK$5,604）以及紐約甘迺迪（HK$4,500，連稅HK$6,794），出發日期為13/10 – 2/11，全部經台北轉機，可免費中停台北一次（出票時須揀”中途停留 / 不同點進出”，出咗票再改會收費用）。至於機票有效期，除咗旭川同福岡係14日外，其餘一律1個月，抵吖！今次嚟講：巴黎/旭川/紐約最抵去，巴黎連稅只係HK$5,097，同週日阿堤哈德隻大漏洞機票只差一千左右！北海道旭川有機會見到紅葉，紐約呢個價坐國航咋！峇里島如果唔駛過夜就好平，否則唔好考慮喇！最後出票日期為27/6 23:59。

網址：www.evaair.com

（覺得抵請記得按Like同Share俾朋友）

另一個經常收到fans嘅問題：北海道有冇平機票呀！自從港航取消香港直航札幌，只有國泰營運後，淡季連稅起碼要HK$5K以上，暑假旺季更不可想像。但其實只要肯轉機，咁就可以平幾成。今次就介紹長榮飛北海道優惠，最大賣點係目的地比國泰多，除咗札幌，仲有旭川／函館兩個北海道城市，來回淨機票HK$3,220，連稅HK$3,971，仲可以唔同城市往返（例如旭川入，札幌出），兼可免費中停台北（方法係透過選擇”中途停留 / 不同點進出”，分三程機去Search，即香港->北海道，北海道-＞台北松山或桃園，台北桃園->香港）。如果您揀東京回程，淨機票更低至HK$2,410，連稅HK$3,329，真係抵到爆炸！而札幌飛東京，有AirAsia Japan及JetStar Japan兩大廉航幫您手，7月份單程都係HK$400左右（不包行李寄艙及飛機餐），總之夾埋唔駛HK$4K，就可以玩盡北海道+東京+台北，況且仲可以坐Hello Kitty航班（包括香港<->札幌以及香港<->台北），機票有效期14日。趁冇乜人知呢隻超筍Fares，郁手啦喂～

溫馨提示：如果您本身由今年1/1起已經飛咗台灣兩次，又Keep住嗰4張登機證，您可以透過今次台北轉機機會，再獲得2張香港<->台北登機證，齊頭6張及一次台灣入境紙副本，就可以向台灣觀光協會香港辦事處申請換領一張香港來回台灣免費機票（詳情請按此），變相賺多五至六舊水！

網址：www.evaair.com

（記得按下面「讚好」Share俾Facebook朋友）

日本第一家廉航天馬航空 （Skymark Airlines），雖然早已於1996年成立，日本好多人都知，但由於佢東京飛羽田，而港人一般飛成田，想搭佢平價內陸機，機會好細。但自從佢宣佈今年30/10開始進駐成田機場後，以後呢間廉航嘅一舉一動，你就要睇實啦！

初期佢會開通兩條北海道來回航線，包括成田<->札幌新千歲（1日1班），以及成田<->旭川（1日2班），那霸線就會於1/12起開通。網上訂購單程飛，最平可以去到980日圓（約HK$98），平爆啦！但呢種特價飛每班機只有20張供應。現時佢網站暫時未能預訂今年11月打後嘅機票，所以大家想搶平機票，要密切留意佢網站啦！

網址：www.skymark.jp（有中文版，正）

（記得按下面「讚好」Share俾Facebook朋友）