澳航呢排真係多事故，之前又話員工罷工，26/8喺香港機場又有一位醉漢喺機上鬧事打傷空中服務員，點知尋日又多一單。

尋日下午17:20，一架由倫敦飛香港嘅波音747 QF30航機抵港。當飛機喺轉飛澳洲墨爾本前90分鐘做例行檢查時，工程人員發現機翼阻力板壞咗。由於未能及時搶修，341位轉機客被迫滯留本港。

由於尋日好多酒店都Full House，航空公司搵極都冇房，最後只好安排有小朋友嘅客去機場貴賓室休息，而其他乘客就要瞓機場，公司有派發毛毯同餐券。到週四早上仲未搞掂，航空公司決定將原本飛去倫敦嘅QF29改飛墨爾本，呢班滯留客最後於8點離港。至於原本QF29嘅客，就被轉去同系國泰嘅CX257同CX253（唔知呢班客又有乜嘢賠呢？我明明睇陳奕迅你迫我睇林峰……）。

消息來源：www.smh.com.au

（記得按下面「讚好」Share俾Facebook朋友）

今早澳洲時間10:25分，一架加航AC34航班從悉尼前往溫哥華及多倫多。起飛後，機員發現廚房內一部焗爐冒煙，機長立即宣佈回航，喺海上放油後，於中午12:16分安全降落悉尼機場，機上264位乘客並無受傷。機長報告事件只係輕微，但為安全起見必須回航，澳洲運輸安全局亦表示無需調查。喺機場拆除事固焗爐後，班機已於下午1:55分再度起飛。

呢單虛驚其實好少事，不過自從被轉發上大陸微博後，立即引起唔少討論。好多人將佢同溫州動車意外相提並論，並大贊加航關心人命安全。「焗爐冒煙咁小事都回航？」，「回航放油啲錢好貴喎！」，「羨慕，我哋啲領導一定唔捨得俾！」。其實唔係加航特別好，只係大陸班官特別差啫！

消息來源（有片！）：www.smh.com.au

（記得按下面「讚好」Share俾Facebook朋友）

今個月2號，Tiger Australia 虎航因為兩度低飛，被澳洲民航安全局（CASA）史無前例下令其所有澳洲國內航班停飛5日。咁大鑊嘢發生後，有人疑似唔識死，又再上演「低飛表演」，今次主角竟然係飛安指數極高嘅泰航！話說喺今個月24號晚20:19分，一架由曼谷飛去澳洲墨爾本機場嘅波音777-3D7客機，喺距離機場約11公里下降途中，飛行高度跌到只有1,000公呎，遠低於民航局要求嘅2,000公呎，最後架機安全降落。澳洲運輸安全局隨後展開調查，初步認為屬「嚴重事故」，暫時未有最後報告。泰航未有回應事件。

前車可鑑，雖云虎航被停飛原因甚多，低飛只屬導火線，但兩單嘢發生時間太近，而且叫得做「嚴重事故」，澳洲當局好難唔用相似方式判罰泰航。至於被罰停飛嘅虎航，已宣佈於下月6號重投服務。冇飛成個月，埋單計數，原來損失高達HK$68,800,000！

相關新聞：www.smh.com.au

（記得按下面「讚好」Share俾Facebook朋友）

好險！尋日大韓航空一架A380客機（編號KE701）由首爾飛去東京成田機場，降落時機身向右邊傾斜，結果第4號引擎同地面有少許磨擦，機師最後擺平後安全駛達停機坪，機上168個乘客冇受傷。機場一度封閉肇事跑道20分鐘，要清理花痕同檢查跑道。經當地維修人員檢查後，証實可以再飛，最後KE702正常執勤返回首爾，比原定時間只係遲咗1小時。

呢單嘢係海外航空討論網站引起熱烈討論（http://www.avherald.com/h?article=4400bee5&opt=0）。雖然有關當局並未公佈原因，但網民都覺得似係人為多於天氣問題。以A380咁大咁重，尋日天氣又唔惡劣，咁容易失平衡？大韓新機出意外，都唔係第一次， 1998年嘅”金浦8702″空難，當時架747-4B5機只係服役2年咁大把，就因為天雨關係降落時滑出跑道撞埋; 1983年大韓”007被蘇聯擊落事件”，最終調查亦證實係機長冇執行正常操作模式，導致誤入蘇聯領空，被軍方發射兩枚飛彈將佢擊落。其他大大細細嘅大韓空難，我唔想再提，希望大韓今次要認真徹查事件，如果唔係，我就建議大家唔好搭大韓A380機住，等班機長操熟架機先好搭，無謂搵自己條命較飛！

相關新聞 : www.jiji.com/jc/c?g=soc_30&k=2011072100867 

（記得按下面「讚好」Share俾Facebook朋友）