X
澳航之前搞停飛，搞到一眾搭客嘈生晒，都估到佢一定拎啲優惠嘢嚟安撫Fans架啦！趁宣佈下年1月起將會派A380飛香港<->悉尼呢單消息，順便推出超勁爆抵嘅機票優惠，直航悉尼來回只需HK$2,380（未連稅，稅為HK$2,932，妹仔大過主人婆）！唔駛2人同行喎！仲平過國泰2人同行價HK$3,100！不過佢出發日期為明年1/2至30/6，係澳洲秋冬淡季時間，不過都唔駛平成咁下話！呢個價只可以飛東京／首爾咋！限時4日搶購，截止日期為14/11。
（記得按下面「讚好」Share俾Facebook朋友）
之前我哋都介紹過南航A380機艙佈局，話咁快原來連首航日子都確定埋！強國做嘢真係爽過人。南航首班A380航班將於17/10首航，當日早上10時從北京起飛，下午4時由廣州飛返北京。17/10號首航不設賣票，18/10開始到26/10會開放俾公眾購票乘搭。官網依家都有得賣，經濟艙賣緊CNY1,620，頭等艙賣CNY3,680，冇折扣。雖然我相信各位唔少都搭過A380（如新航同阿聯酋），但今次始終係國內首間航空公司執飛A380，係國內航空界大事嚟架！反正我哋對其經濟位同頭等位甚感興趣，係咪如想像中咁大？
（記得按下面「讚好」Share俾Facebook朋友）
尋日，第一家買入A380空中巨無霸嘅中國航空公司：中國南方航空，公佈咗首架A380客艙佈局。上層設有8個頭等艙，採用包廂設計（似Emirates，唔係泰航嘅半包廂），中間設有商務艙，以交錯方法設置70個坐位，提高私隱度，全部設有Flat Bed Seat。經濟客位就有428個，同Emirate/泰航唔同，上層尾部都設有經濟客位。
就咁計，有啲奇怪：泰航經濟艙只設於下層，有435個坐位，但南航上層尾部都有經濟客位喎！但總數只有428，咁係咪代表經濟位好鬆動？頭等艙只有8個，比Emirates（14個）、泰航（12個）、新航（12個）、大韓（12個）都要少，唔通呢8個位好闊好舒服？有期望喎！唔知幾時有得睇真身？
（記得按下面「讚好」Share俾Facebook朋友）
好險！尋日大韓航空一架A380客機（編號KE701）由首爾飛去東京成田機場，降落時機身向右邊傾斜，結果第4號引擎同地面有少許磨擦，機師最後擺平後安全駛達停機坪，機上168個乘客冇受傷。機場一度封閉肇事跑道20分鐘，要清理花痕同檢查跑道。經當地維修人員檢查後，証實可以再飛，最後KE702正常執勤返回首爾，比原定時間只係遲咗1小時。
呢單嘢係海外航空討論網站引起熱烈討論（http://www.avherald.com/h?article=4400bee5&opt=0）。雖然有關當局並未公佈原因，但網民都覺得似係人為多於天氣問題。以A380咁大咁重，尋日天氣又唔惡劣，咁容易失平衡？大韓新機出意外，都唔係第一次， 1998年嘅”金浦8702″空難，當時架747-4B5機只係服役2年咁大把，就因為天雨關係降落時滑出跑道撞埋; 1983年大韓”007被蘇聯擊落事件”，最終調查亦證實係機長冇執行正常操作模式，導致誤入蘇聯領空，被軍方發射兩枚飛彈將佢擊落。其他大大細細嘅大韓空難，我唔想再提，希望大韓今次要認真徹查事件，如果唔係，我就建議大家唔好搭大韓A380機住，等班機長操熟架機先好搭，無謂搵自己條命較飛！
相關新聞 : www.jiji.com/jc/c?g=soc_30&k=2011072100867
（記得按下面「讚好」Share俾Facebook朋友）
X