呢隻漏洞機票，雖然唔係香港出發，但的確超級抵，值得漏夜同大家分享（有葡航漏洞機票喺手人士更要留意）！是咁的：巴西最大航空公司天馬航空（TAM），喺歐洲個別機票網站出現漏洞價機票，由歐洲等地往巴西大城市聖堡羅，回程由秘魯首都利馬（去睇天空之城：馬丘比丘！）回歐洲不同城市，來回機票低至HK$1,400起，連稅HK$2,036起！Check過ebookers.com，呢一刻仲有漏洞飛賣！暫時搵到馬德里（MAD）直航去聖堡羅（GRU），回程利馬（LIM）經聖保羅（GRU）返巴黎（CDG）可以搵到連稅英磅174（HK$2,046）嘅蹤影（即圖中例子，5/6去，13/6返），如果返倫敦（LHR）就貴少少，連稅只係英磅273（HK$3,195）；如果去程揀米蘭（MXP），回程揀番巴黎（CDG），連稅係英磅326.5（HK$3,820），係冇咁抵，不過來回都可以駁到國泰直航來往香港！據說之前有網友搵到倫敦或曼徹斯特去，回程返巴黎都有呢口價，不過Check過幾個日子都冇。建議大家揀唔同歐洲城市出發，擴大搜查範圍，總之去程目的地係聖堡羅，回程由利馬出發，睇下仲有冇其他城市漏洞組合？至於出發日期，暫時以5至6月居多，其他日子就請大家幫手齊齊搵，搵到請報料！提提您：天馬航空TAM係星空聯盟Star Alliance一份子，唔知呢隻漏洞飛有冇得儲里數呢？

網址：www.ebookers.com

溫馨提示：海外旅遊網站不受香港旅遊業協會監管，風險必須自負；如有服務需要，亦需親自打海外熱線／電郵聯絡，IDD費用需要自付

（記得按下面「讚好」Share俾Facebook朋友）