尋日, 《經濟日報》大篇幅介紹如何買iPhone賺積分. 老實講, 小弟都係其中一員. 本來一直低調進行的活動(朋友/同事之間當然知道), 既然已經上了報導, 我就不如講多少少吧!
先睇睇《經濟日報》原文 : 蘋果網掃iPhone 蝕賣賺機票
我的補充:
1. 切忌買太多 : 報導中條友每次買一百幾廿部, 真係”鄧”佢擔心! 事關盛傳9月出iPhone5, 一旦正式落實推出日期, 收機佬一定唔收! 雖然退番俾Apple都得, 但要俾15%作服務費, 每部慘蝕$7xx, 幾十部咪……
2. 宜貨如輪轉 : 一有貨到即賣, 切忌Keep貨, 因為回收價每日上上落落, 呢一水可能蝕多D, 話唔定下一水蝕少D(甚至賺少少), 拉勻每部蝕$30-$35之內, 點都有SO!
3. 買1條起錶 : 1條等於10隻, 蘋果出貨時會包得非常密實穩固, 唔驚撞花, 拎出街好方便, 反而, 你拎D散貨, 出街條條fing, 唔見一部都蝕死.
4. 黑好過白 : 之前太多人訂白色, 搞到回收價大跌. 近日黑色一反常態, 回收價首度高於白色(星期四ST收市價: 黑$4,960, 白$4,940). 黑色返貨只需2日, 白色要一週, 咁你自然識買啦!
5. 先達價最高 : 認住呢3家龍頭收機店 : G/F 數X動力; 1/F潮x電訊; 1/F, G-WORXD, 其他的, 只係駁腳, 唔駛去問價喇!
6. 實用網站 : iPhone回收價好比股市, 每分鐘有上有落, 去http://www.iphone4hongkong.com mark實最新行情包冇死. 而喺uwants手機買賣區亦有不少收機佬24小時盤踞, 佢地經常update最新盤口, 啱水位即放!
7. 咪收期票 : 依家有D網上收機佬會以期票招徠, 只要你肯遲D收錢, 佢出的價會高一點. 但以現時炒iPhone4已近水尾下, 就算個位收機佬幾有信譽, 千祈唔好貪小便宜. 記住 : No Cash, No Talk!
8. 信用卡 : DBS Black Card $6賺1里當然最so, 申請要求亦唔高, 但用$8/1里的card亦唔錯. 據小弟所知, 國泰AE Card/Citibank PremierMiles 信用卡都係$8/1里, 而據聞東亞白金/大華白金都係$8/1里, 而國泰AE Card新客戶頭3個月簽帳更有雙倍積分(即$4/1里, 最多40,000里). 而個D$12/1里的普通信用卡, 老實講, 算吧啦(除非佢做緊積分加倍Promotion)!
留言