請即Like 又飛啦！Facebook Page

「借分殺人」機會又嚟喇！兩間星際聯盟（Star Alliance）旗下航空公司：全美航空（US Airways）及哥倫比亞航空（Avianca），前幾日無獨有偶同時推出里數買一送一優惠。如果您係「又飛啦！」老fans，都應該睇過我哋對呢兩間航空公司買里數嘅分析（全美航空：http://flyagain.la/?p=7634，哥倫比亞航空：http://flyagain.la/?p=5479）。記住：買里數呢家嘢，最好係用嚟兌換長途商務艙，如果想藉此換經濟客位或短途商務艙，建議您唔好買，因為齋買特價機票仲抵。至於頭等呢？唉！依家好難換到，無謂花心機買里數吧！

全美航空今次買一送一同上次基本上冇分別（除咗入門要求由買5,000里增至10,000里，不過買得里數，一般都買最大，故此無影響），買每一里要US$0.035（HK$0.273），並加7.5%稅。最多可以買50,000里（最抵），總成本為US$1,881.25（折合HK$14,674），最後可獲得100,000里，平均每一里成本為HK$0.14674；至於哥倫比亞航空公司亦同上次一樣：買每一里要US$0.03（HK$0.234），香港人買不須付稅。最多可買75,000里（最抵），總成本為US$2,250（折合HK$17,550），最後可獲得150,000里，平均每一里成本為HK$0.117，不過哥航限1/8前已登記成為LifeMiles會員人士購買，如果您未入會，今次唯有向全美航埋手吧（或申請定LifeMiles戶口下次可買）！如果您連全美航會藉都冇，依家申請新會藉須再等12日後先可獲得優惠，由於截止日期為31/8，依家申請仲趕得切架。

咁應該買邊間航空里數好？表面睇，哥航每里成本低於全美航，但由於哥航最近更改咗機票兌換表，計一計，兩者其實互有勝負，無一定準則，就拎幾個主要地區為例：

兌換商務機票成本（哥航 vs 全美航），未連稅（無需俾燃油附加費）：

來回澳洲，紐西蘭：哥航105,000里（HK$12,285）vs 全美航 90,000里（HK$13,207）

來回美國，加拿大：哥航125,000里（HK$14,625）vs 全美航 90,000里（HK$13,207）

來回歐洲：哥航135,000里（HK$15,795）vs 全美航 80,000里（HK$11,739）

來回南美洲南部：哥航150,000里（HK$17,550）vs 全美航 120,000里（HK$17,609）

所以買邊家里數，真係睇您所需。不過哥航有樣好，可以直接上佢網站（http://www.lifemiles.com）即時訂任何航線嘅星際聯盟機票，全美航就必須親身打美國長途電話（1-800-428-4322）先出到票，又有各項手續費（例如出發前少出21日出票要俾US$75 Quick Ticket Fee）。但請萬萬記住：要真係決定咗日子同行程先好訂，因為唔似Asia Miles咁好俾您任改唔駛錢，無論全美航抑或哥航，每改一次都收您US$150！而且哥航電話熱線個班接線生，英文勁難聽：係十級難囉～

另一方面，全美航由星際聯盟轉入寰宇一家（One World）計劃，最新消息係將提早到今年10至11月落實，所以今次分分鐘係最後機會買星際分數。正如之前講過（http://flyagain.la/?p=7634），寰宇一家極少有咁So嘅買里數計劃，所以要把握最後機會盡買，第時換同屬寰宇一家嘅國泰商務機票，就更抵啦！

全美航空里數買一送一詳情：http://www.usairways.com/en-US/dividendmiles/programdetails/purchasemiles/default.html

哥倫比亞航空里數買一送一詳情：https://www.lifemiles.com/eng/tra/pro/proofeinf.aspx?D=DOF23

（覺得抵請記得按Like同Share俾朋友）

AXA安盛「卓越」優遊樂旅遊保，手提電話都保！立即報價+投保

「又飛啦捕票器」App，一有新Post即響機！iOS下載；Android下載

Booking.com訂房：泰國 | 日本 | 台灣 | 韓國 | 其他

AGODA訂房：泰國 | 日本 | 台灣 | 韓國 | 其他

＊由於優惠產品供應有限，最終格價或因反應熱烈而有所調整，敬請留意。