X
如果您係「又飛啦！」老fans，都聽過我哋教大家一個飛紐約嘅慳錢方法：揀飛紐瓦克（EWR）機場，唔好飛甘迺迪（JFK）機場，就以今次介紹嘅聯合航空筍盤為例：30/11前香港直飛紐瓦克機場，來回淨機票HK$5,090起，連稅HK$7,540起，比起直飛甘迺迪機場平二千起，就算您搭最平嘅國航或東航，轉機連稅都要六千尾，依家俾多五六舊就可以坐直航，係咪有睇頭先？Check過系統，呢口價供應量一般，需要去紐約嘅，又唔想再等fanfares機票，呢隻筍盤食得過。機票有效期1個月，最後出票日期為30/10。
（覺得抵請記得按Like同Share俾朋友）
飛加拿大機票，平機票賣少見少，華航就有一隻了！出發日期為15/9 – 30/11，飛溫哥華來回淨機票HK$3,500起，連稅HK$6,073起，只係貴過國航三舊水。最大賣點係可以免費中停台北（回程），只需先訂來回溫哥華機票，出票後打電話俾香港華航辦事處（2868 2299）改機票，唔駛換票，只需補番相關稅款就得，非常方便，咁又可以嚟過「一雞兩味」玩埋台灣了！機票有效期1個月，夠您返去探親用。Check過系統，供應量算充裕，有心去者可以考慮（仲想平？梗係買國航啦！來回連稅HK$5,756起咋！去ZUJI買：http://bit.ly/zujihongkong）
（覺得抵請記得按Like同Share俾朋友）
又係長途機票系列，今站嚟到加拿大！好少劈價嘅加航推出兩隻筍盤：直航溫哥華來回淨機票HK$4,050起，連稅HK$6,344起；飛多倫多（經溫哥華轉機）來回淨機票HK$6,100起，連稅HK$8,447起（直航連稅要一萬頭）。直航溫哥華仲有呢口價，應該係加航近期少見之作，最值得推介！如果您需要秋天飛去溫哥華採親者，唔好等，要即食！至於飛多倫多，呢口價當然唔算最平，不過多倫多線需求一直好大，難有大減價益街坊。出發日期為6/9 – 31/10，機票有效期21日，最後出票日期為16/9，香港出發限坐AC8（19:50/16:35）。官網冇得賣住，不如上真旅網望住先。
（覺得抵請記得按Like同Share俾朋友）
未食早餐呀？阿聯酋航空已準備一大盤早餐等各位慢用！佢一口氣推出多條航線早餐盤（包括歐洲及美國東岸），出發日期由7/10/2013去到31/3/2014（不包括1/1/2014 – 12/1/2014；28/1/2014 – 3/2/2014 農曆新年期間），拉到咁鬼長，方便晒想一早Plan定行程嘅Fans，買咗唔駛心掛掛呢！至於價錢，尚算可以，一般淡季價啦！來回連稅計，飛歐洲有莫斯科（HK$6,285起）／米蘭（HK$6,552起）／蘇黎世（HK$6,618起）／慕尼黑（HK$6,798起）／巴黎（HK$6,811起）／法蘭克福（HK$6,923起）／斯德哥爾摩（HK$7,151起）／維也納（HK$7,151起）／倫敦希斯路（HK$7,745起），至於美國東岸，飛紐約HK$7,932起，華盛頓HK$8,212起，以飛咁遠嚟講都算幾實惠，機票有效期1個月。Check過系統，供應量足，有興趣可上阿聯酋官網望望。遲啲再平？會唔會再有漏洞機票？點知呢！最後出票日期為31/8。
（覺得抵請記得按Like同Share俾朋友）
國泰已正式宣佈將於明年1/3起，開辦香港直航紐約紐瓦克機場新航線，每日一班（去程CX890 17:00/21:00，回程CX899 01:50/05:40），依家推出首航特惠早餐盤：來回淨機票HK$5,890起，連稅HK$8,221起，出發日期由1/3/2014 – 16/4/2014，22/4/2014 – 30/6/2014，機票有效期1個月。您可能會話：車！連稅都要八千幾，平咩？Well！有留意開美加東岸機票價格嘅朋友，一睇就知筍：依家國航連稅都要七千以上，但人家要北京轉機的！相比之下，國泰直航咁舒服，兼且唔驚Delay，小量溢價係值回票價嘅！想再平？都得！等fanfares啦！官網未有得賣住，上真旅網啦！
（覺得抵請記得按Like同Share俾朋友）
我哋好耐冇同大家發掘多倫多平機票，無他嘅！直航好難有筍盤（之前加航做冬季Promotion，連稅都要過萬，報唔落手），除非您好好彩遇上國泰fanfares啦！唔想等？長榮幫到您。由9月至12月出發，經台北轉機來回多倫多，來回淨機票HK$4,730起，連稅HK$6,970起，足足慳三／四千；如果想停台北，呢隻fares講明回程可免費停一次，補番少少台北機場稅就得（HK$79）。如果您想訂，建議喺官網揀選”中途停留 / 不同點進出”，再將整個行程拆開三段，包括：1. 香港->多倫多；2. 多倫多->台北；3. 台北->香港，見淨機票價錢比起唔停台北同價者就卜啦！機票有效期為1個月，夠晒您一雞兩味玩盡多倫多及台北。
（覺得抵請記得按Like同Share俾朋友）
睇番近排文章，原來我哋好耐冇幫大家搵美國平機票，好啦！今日先嚟隻三藩市：搭聯合航空直航，來回淨機票HK$5,370起，連稅HK$7,668起，機票有效期1個月，出發日期由7/9 – 11/12；24/12 – 27/12；明年13/1 – 28/1；4/2 – 31/3，基本上係淡季標準價。聯合好少突劈長途機票，有心下半年或明年初飛三藩市嘅fans，呢口價甚有參考作用，如果鐘情直航嘅，除非您搏fanfares啦！否則呢個價都值得考慮，官網有售，最後出票日期為31/8。
（覺得抵請記得按Like同Share俾朋友）
長榮劈價第3浪，今晚00:00又嚟啦！新一批機票包括：大阪（HK$1,190，連稅HK$2,068），札幌（HK$2,470，連稅HK$3,192），泗水（HK$1,230，連稅HK$1,872），布里斯本（HK$2,420，連稅HK$5,076），西雅圖（HK$3,310，連稅HK$5,604），多倫多（HK$4,500，連稅HK$6,737），出發日期為3/11 – 30/11（週日至三），全部經台北轉機，可免費中停台北一次（出票時須揀”中途停留 / 不同點進出”，出咗票再改會收費用）。至於機票有效期，除咗大阪同札幌係14日外，其他一律1個月，抵吖！今次嚟講，最抵必定係多倫多！連稅HK$6,737，雖然係入冬，但真係抵到無朋友，依家搭轉機都要接近一萬喇！札幌呢個價的確平，不過係淡季，又未大雪，平都要考慮下先；大阪坐樂桃直航算啦！除非您想一雞兩味玩埋台北；西雅圖嗰價亦靚仔非常。最後出票日期為29/6（週六）23:59。
（覺得抵請記得按Like同Share俾朋友）
X