台北近年愈來愈多商務旅店，同酒店唔一樣，佢地賣點係「性價比」強：個性化裝潢、近地鐵站／購物區、價錢相宜，令好多精明港人捨酒店取旅店。台北西門町啱啱又有一家新旅店開張。呢家叫「Swiio二十輪旅店」，係繼信義總館後第一家分店。同總店唔同，新店裝修只以灰白啡為用色，格調時尚，乾淨利落。淋浴間更設有Rain Shower，都幾揼本，免費WiFi亦係大會「指定動作」。一晚雙人房假日連稅約HK$700左右，由依家到31/8做緊迎新特價，住3日即有現金NT$1,000回贈。除番開，每晚大約HK$422左右，暑假期間不加反減，夠筍卦？

地址：台北市萬華區武昌街二段72號10F (捷運板南線西門站六號出口步行五分鐘)

網址：www.swiio.com

（記得按下面「讚好」Share俾Facebook朋友）

一般人搭飛機，都希望有個又靚又索嘅空姐Serve你，但其實航空公司請人唔係靠外表，內涵先重要，例如服務細唔細心，語文能力夠唔夠咁。不過亞洲區嘅航空公司一般又真係鍾意請後生女，所以大家先有錯覺，以為只有靚女先做得空姐。

大陸首家廉航春秋航空，為應付業務需要又要請新一批空姐。一睇入職條件：咦？第一係已婚女性！年紀介乎26-40歲？仲要起碼有3年工作經驗？即係後生女／Fresh Grad者免問！原來春秋講明要借鑒歐美航空大量聘請高齡女士做空姐經驗，話人地咁好服務，自己都想藉此提升機艙服務質素，所以寧請空嫂唔請空姐。哈哈哈！計我話可能係春秋睇中班阿嫂結埋婚生埋仔，唔會咁易轉工卦？咁的確熟女一定比後生女細心又有耐性嘅！不過要廣大乘客改變「搭飛機睇靚女」觀念，似乎仲要啲時間播！

招聘網址：www.china-sss.com

（記得按下面「讚好」Share俾Facebook朋友）