想買張澳洲1年期機票？維珍近期嘅HK$4,790悉尼機票（連稅HK$7,833）真係有賣趁手嘞！事關優惠仲有2日（31/8）咋！Check過系統，仲有唔少日期可揀，年尾開始正係澳洲夏天，呢張機票啱晒有親人住喺澳洲要定期飛返去，又或者本身係留學生需要一年來回at least一次。不過記住呢張飛改日子需要俾HK$1,200手續費，回程要考慮清楚日期先好訂呀！

網址：www.virgin-atlantic.com

（記得按下面「讚好」Share俾Facebook朋友）

Facebook網友Carmen Law問有冇台中平機票賣，佢想要嘅兩個時段：9/9 – 11/9同20/10 – 23/10，前者因為搭正中秋節，有機票都唔慌平 （何況華信滿座呢），後者華信亦做完HK$970 Promotion，依家齋買機票連稅都要HK$2,065。倒不如諗下第2個選擇，皆因你夾到東瀛遊一隻超平套票。佢呢排推緊台中4日3夜套票，搭華信／香港快運，如果你願意喺指定日子來回，價錢可低至$999！佢包嗰3晚酒店唔係太失禮，例如最平嘅西苑旅店，啲房係全新裝修，雖然係細，但起碼叫企理乾淨吖。老實講咁嘅價，連租一晚澳門酒店都唔得啦！而Carmen想訂嘅20/10 – 23/10，東瀛遊正好有選擇，價錢為HK$1,099，住達欣商務精品飯店，貴嗰一舊水，豪俾佢啦！不過呢啲Package需要經網上訂購，而且據聞好爆，訂之前不妨先打去東瀛遊問清楚先。

如果呢個Package真係爆晒，東瀛遊都有一隻3日2夜普通Package，住番西苑旅店最平HK$1,559，少1日貴五舊，其實只係以上個Package太抵而已。如果真係好想平平地去，不如等下東瀛遊，事關佢會不斷推出呢類指定日子超平台中Package，但一見到就要即刻Book！

網址：www.egltours.com

（記得按下面「讚好」Share俾Facebook朋友）