今日Groupon.hk推出優惠，話可以HK$310買入價值HK$620嘅Hotelclub.com訂房網代幣，可以用嚟訂世界各地超過71,000間酒店，睇落去都幾吸引。嘗試以相同日子相同酒店，對比其他網站（如小弟至愛嘅Agoda），發現冇做特價嘅房，價錢差唔多，有特價嘅，人家總會平少少，但點都賺得番HK$310優惠嘅！最著數莫過於訂一間或總值約HK$600咁上下嘅酒店（曼谷大把啦），咁咪可以三舊幾水埋單。又或者如果一班Friends去旅行，今日房用你戶口訂，聽日房用朋友戶口訂，如此類推，咁咪晚晚慳三舊水囉！

留意位：

1. 必須成為“HotelClub Rewards” 的新會員，並於http://www.hotelclub.com/Membership.asp註冊新帳號及輸入優惠券編號，否則會員幣作廢（車！開個新a/c唔駛成本！）

2. 優惠券12/9 至 21/9午夜前有效（即係買咗後要快啲訂！）

3. 成功註冊後，HotelClub會將$620（=美金80）會員幣注入會員帳戶

訂購網址：www.groupon.hk

HotelClub網址：www.hotelclub.com

（記得按下面「讚好」Share俾Facebook朋友）

靜咗兩個幾星期，AirAsia又手痕喇！今晚凌晨00:00（7/9）開始直到11/9訂飛，所有航線一律八折（包括AirAsia X），出發日期為12/9到16/11。今年重陽節係週三放，請3/10 同埋 4/10就有5日4夜假，大家不妨Mark緊呢個Period主力搶飛吧！其他日子，Check過系統，曼谷以10月尾同11月尚有少量來回HK$1,800（連稅，下同）；布吉9月尾有少少來回HK$2,600，之後要到11月中先有少量日子來回HK$2,000（但16/11後已經冇八折喎）；檳城10月有好多來回HK$2,000唔駛嘅選擇，11月仲平啲，一於捉實！吉隆坡就來回HK$2,400左右；沙巴10月打後一般來回HK$1,800，11月個別例子仲可以低至HK$1,500！以上價格全部未折，大家拎定日曆表，準備一陣AirAsia開倉喇！

網址：www.airasia.com

（記得按下面「讚好」Share俾Facebook朋友）

網上酒店訂房網Octopus Travel曾幾何時喺香港頗受歡迎，個陣連Agoda都冇架！結果被對方迎頭趕上後轉為低調，原來佢依家泊埋新航碼頭，聯手推出訂房網站，有唔少地方都做緊Free Night Rewards：即係買Ｘ晚送Ｙ晚優惠（當然以新航目的地為主）。以印尼峇里為例，佢手上有一家五星級Wakamaya Resort Spa and Villa，喺著名旅遊網站Tripadvisor.com有3.5/5分架！佢做緊買3晚送1晚優惠，除番開每晚只係HK$850，出面網站最平去Booking.com都要成HK$1,400一晚（兩者都係連稅價）！峇里酒店一向貴，咁嘅價位住5星級Resort，雖然唔係一線唔係新開，但Setting都唔錯幾有峇里風情，呢口價超抵住啦。

除咗峇里，Free Night Rewards仲有以下地方：曼谷、布吉、民丹島、開恩茲、黃金海岸、墨爾本、珀斯、悉尼、奧克蘭、巴塞隆拿、倫敦、檀香山、米蘭、伊斯坦堡。

網址：www.octopustravel-asia.com

（記得按下面「讚好」Share俾Facebook朋友）

今日國泰終於喺官網宣佈，新一輯以員工為主角嘅形象廣告好快喺世界各地推出，呢套就係因露鳥事件而臨門叫停嘅環球廣告。點解咁快解凍？咪就係要趕年尾條大數囉！

今年航空業的確難做。小弟最近參與一個飯局，席間有做旅行社嘅朋友話今年暑假條數唔靚，唔係一間半間航空公司喎，而係整體數都跌，粗略計約6-8%，原因莫過於環球經濟轉差（你睇世界股市今年係咁跌就明）。有睇開新聞都知，今年國際貿易萎縮不斷，作為世界工廠嘅中國，今年都有唔少工廠倒閉，只係香港人主力做金融服務業，唔係太多人Feel到呢鼓經濟寒氣。

近呢一兩個月，我哋都報導過唔少淡季機票優惠。本來淡季減價唔奇，但今年真係減得幾過份，尤其係國泰及港龍，劈起價上嚟，仲狼過唔少細公司甚至廉航。最慘係個別啲平飛去貨速度比往年弱好多，就睇下港航吖，連續兩個禮拜都推出同一款限時優惠就明啦！據聞呢股減價風暴會一直吹落去，事關老細唔可以俾載客量跌得多，影響年尾條數，點樣交代俾財金界人士？航空業萎縮唔單止香港有，睇遠啲，我哋都提過馬來西亞兩大航空巨頭：AirAsia同馬航上個月竟然由死對頭變成同盟。無他嘅，利之所在，大家都為咗慳成本，被迫一笑泯恩仇。

的確，站於旅客角度，你最好日日減，等我哋個個禮拜又飛啦！但呢個世界邊有咁多免費午餐？唔夠收入，又點可以保持優質服務及飛行安全？我就怕咁鬥法，會令部份財力弱嘅航空公司倒閉，導致旅客因貪得貧，冇咗錢不得止，連個寶貴假期都冇埋就唔抵！所以奉勸大家，買平機票前，最好Google下佢最近有冇財政問題新聞，如果有，寧願忍手，切忌貪小便宜！

（記得按下面「讚好」Share俾Facebook朋友）