AirAsia自今年21/9開始，開始徵收每人HK$30櫃台Check-in手續費，對於一眾追求平靚正嘅AirAsia Fans嚟講梗係唔Like啦！措施只實施3個月，AirAsia終於低頭，今日宣佈（官網仲未Update）於22/12香港時間上午8:00起，將豁免所有國際航班櫃台Check-in手續費！咁先係波嘛！雖然話多唔多，但係搭得AirAsia嘅通常都係對價格非常敏感嘅客人，來回HK$60，夠我食多幾餐曼谷人妖海南雞飯喇！如果你之前網上訂機票時俾埋Check-in費，而出發日期係22/12香港時間上午8:00後嘅，你可以上佢http://www.airasia.com/hk/zh/faqdetailsform.html度填番份Form申請退款。不過要留意，馬來西亞嘅內陸航班仍然要收取機場櫃台Check-in手續費，如果你飛馬來西亞內陸線又想慳番筆，記得先透過網上或Mobile check-in啦！

網址：www.airasia.com

（記得按下面「讚好」Share俾Facebook朋友）

上星期先提過，1月頭搭長榮Hello Kitty新客機只係HK$938來回，今次就講多少少呢架新客機有乜特別。繼之前嘅魔法機、蘋果機，今次將一架A330-300改裝成以環遊世界為主題嘅Hello Kitty環球機，機身繪上世界各地名勝，當然有主角Hello Kitty啦！搭Hello Kitty機有乜咁特別？嗱！由機場Check-in開始，拎住印有Hello Kitty嘅登機證，行李牌亦印有Hello Kitty圖案（咁記得要寄艙喇）。上到飛機仲正，大至空姐外套，細至頭墊紙、餐巾紙、紙杯、餐具、奶瓶、啤牌、飛機餐、廁所洗手液等等，都會見到Hello Kitty，總之呢個半鐘嘅機程一定影相影死你～～～長榮已宣佈全新Hello Kitty環球機將於23/12起來往香港同台北，每日對開一班，去程BR858 21:05/22:40，回程BR857 18:10/19:50。咦？咁星期五放工去星期日返，唔駛請假，咁咪有機會來回都見到Hello Kitty？諗諗佢吖！仲有呀！由23/12到31/12，凡乘搭BR858航班嘅離港旅客，喺香港機場辦理登機手續時可獲贈Hello Kitty環球機2012年曆A4文件套。數量有限，送完即止。

網址：www.evaair.com

記得按下面「讚好」Share俾Facebook朋友）