好耐冇同大家分享一啲旅遊慳錢小秘技喇！今次就教「又飛啦！」Fans如何喺訂購AirAsia機票時賺取額外折扣！呢個小秘技，唔係之前報過嘅「絕密通道」：呢個方法絕對公開，就係：將來回兩程飛分開訂！唔好揀來回一齊Book，喺某啲情況下，可以幫你慳番7-10%。就以今個復活節旅遊高峰期（即6/4去，9/4返）為例，飛吉隆坡者，如果揀來回一齊訂，回程機票大約由馬幣472.05至610.91不等（其實佢會用港元報價，不過為求容易對比，我哋特別將之換算成馬幣），但如果你分開來回咁訂，去程價錢一樣，回程你會發現全部平7.7%左右（請見以下附圖）。點解會係咁？因為航空公司會跟據唔同地方做唔同Pricing，呢個例子，正好顯示AirAsia喺馬來西亞市場嘅定價較香港為低。當然唔係度度地方Pricing會比香港便宜，亦唔係所有時間都係咁，例如曼谷，我哋試過分開咁訂，仲會貴過一齊訂少少添！所以以後訂AirAsia，不妨做多少少功夫：先揀選來回，睇睇回程價係幾多，然後再Search by 單程回程，睇下兩者有冇差別，如果有就分開訂，冇咪訂來回囉！

網址：www.airasia.com

（記得按下面「讚好」Share俾Facebook朋友）

$10可以做啲乜？去土耳其航空買多一張機票啦！佢哋推出情人節拍拖2人同行優惠，飛歐洲國家，單人飛經濟客位本來就HK$5,700，依家買第2張加HK$10就得，變相每張平到HK$2,855，雖然唔夠維珍HK$1,880咁平，不過講到飛其他歐洲城市，呢個價立即晉身歐洲平霸三寶（包括羅宋湯航空同埋哈哈航空）之一！不過要留意，佢出發日期Fix死喺7/2 – 17/2，機票有效期只有8日，好似少咗啲囉！呢種GV2飛網上冇得訂，要打去航空公司或各大旅行社出飛。

網址：www.turkishairlines.com

訂票電話：2861 3111

（記得按下面「讚好」Share俾Facebook朋友）