您冇睇錯！香港飛馬爾代夫來回只需HK$2,200（連稅HK$3,584）！是咁的，斯里蘭卡航空公司向來係飛馬爾代夫至平之選，佢今日起推出馬爾代夫機票優惠，28/2/2013前出發，個別日子來回機票劈到HK$2,200，1個月有效期，不過就唔可以Stay Behind斯里蘭卡首都科倫波或曼谷。呢個價同飛東京北京南京差唔多！之前飛馬爾代夫最平係卡塔爾航空連稅HK$4,376，呢次斯航平多八舊水，劈到史上新低，再跌機會唔大。Check過系統，平飛主要集中喺明年1月至2月，又唔係雨季（馬爾代夫雨季係5月-10月），咁嘅價錢，呢鑊仲唔「被迫去」？最後出票日期為30/11，建議去程盡量唔好揀UL107，到達馬爾代夫為早上00:55，半天吊，寧願喺科倫波機場瞓覺等轉機好過。

網址：www.srilankan.com

（記得按下面「讚好」Share俾Facebook朋友）

我哋「又飛啦！」成日同大家發掘啲靚靚早餐盤，但最後出發日期一般只去到明年3月，尋日隻國航飛歐洲去到30/6已經勁遲，點知今日呢隻仲耐！達美飛東京嘅早餐盤上次19/10有介紹，當時價錢為HK$1,640（未連稅，下同），出發日期只去到31/1，今次呢隻係「超級耐用」：出發日期為依家到20/12/2012、29/12/2012 – 7/2/2013、13/2/2013 – 27/3/2013、2/4 /2013 – 10/7/2013及24/8/2013 – 30/8/2013，幾乎包括晒2013年上半年（大假期當然唔包），7月頭8月尾仲係暑假期間添！來回淨機票只係HK$1,710，連稅HK$2,599，機票有效期長達1個月，去程DL156（08:20/13:55），回程DL155 （19:20/23:00）．雖然唔係超級抵，但對於想預先買定飛嘅朋友，呢個價位絕對值得入手：當然唔介意Last Minute先決定出遊，國泰fanfares梗係抵啲啦！但出發時間同目的地唔係自己話事呢！達美呢隻Fare新鮮出爐，官網未有，上真旅網買啦！不過有位日子暫時唔多（例如7/5去11/5返就有），搵唔到嘅，唔駛心急，官網遲少少都有得賣啦～

網址：www.travelzen.com

（記得按下面「讚好」Share俾Facebook朋友）