相信大家都搶過國泰港龍fanfares機票，作為「又飛啦！」Fans，配合我哋嘅1. 獨立票價分析；2. 獨家嘅國泰港龍fanfares往績全紀錄Excel（http://bit.ly/Y5JkUl）；3. 週二第一時間追蹤搶飛實況，基本上搶飛已經快過人，不過原來仲有一啲搶飛攻略，您可能唔知道！話說今日國泰港龍舉行記招，一方面宣佈fanfares網站已錄得3,000,000人次，另一方面國泰航空市務傳訊經理張承恩小姐（圖右）以及港龍航空市務經理吳潔玲小姐（圖左）都趁機同大家Share以下五大獨門搶飛攻略，等大家傍下身咁話（圖中係國泰航空市務及常客計劃總經理羅世民先生）！
招式1. 登記國泰及港龍嘅網上專訊：即係eDM，佢哋會喺週二零晨Send Email俾您，話您知下一輪fanfares有乜賣（註：我哋「又飛啦！」通常會喺週二零晨00:30前Post文上Facebook，照計速度同eDM有得揮架，哈哈！）
招式2. 記得之前做定Asia Miles會員：大家都知Asia Miles會員買fanfares可以有500里數賺，但呢樣唔係重點！據國泰航空市務傳訊經理張承恩小姐表示，如果您本身已經係Asia Miles會員，搶飛時只需Login您戶口，咁就唔駛重新再打一大堆個人資料（如人名，聯絡電話，電郵地址等等），變相又快人幾秒。話明係秒殺機票，差之毫釐，謬之千里，搶唔到平飛，一里都冇得去！
招式3. 護照要有6個月以上有效期：因為fanfares機票一般都頗為Last Minute出發，如果要即買即飛，護照有效期唔夠6個月，香港地勤有權唔俾您登機（因為目的地海關亦有權拒絕您入境），所以呢點都幾重要！仲有：如果心儀嘅目的地係需要簽證入境（例如美國／越南等），請一早申請定先，因為就算有fanfares機票，您都未必趕得切辦簽證（尤以美國為甚），咁就真係見fanfares化水鳥～～～
招式4. 如果有4個或以上朋友想一齊搶fanfares，港龍航空市務經理吳潔玲小姐就建議大家分開訂，每人負責訂兩位，因為要一個人訂晒咁多位，輸入個人資料太需時，就唔夠人搶喇！咁您會問：如果我哋呢Pair搶到，另一Pair搶唔到又點算？國泰航空市務傳訊經理張承恩小姐就話：咁您可以上番國泰港龍網站買番同時間來回機票，以平均成本下，拉勻都有著數。
招式5. 先考慮自己旅遊喜好：一早問自己究竟最想去邊度？一見有fanfares就立即出擊，唔好三心兩意！因為據官方統計：熱門航點一般喺頭1小時沽清，而六成以上fanfares機票亦會喺首1小時內賣出，所以切記Don’t Think Too Much，否則Next Week Good Luck！
最後，我哋亦親自問咗國泰航空市務傳訊經理張承恩小姐，一啲Fans成日查詢嘅問題：
Q：fanfares幾時完結？
A：由於市場反應都唔錯，暫時會Keep住做落去。
Q：暑假係咪加價？
A：其實fanfares機票定價係參照當時市場價格去決定，所有價格係反映市場現況。
Q：暑假賣飛數量會否增加／減少？
A：我哋每次大約推售1,500-2,000張fanfares機票，暑假期間大致相同。
Q：有唔少Fans反映可否早啲公佈週二fanfares資訊？
A：暫時未有計劃改變，當然可以考慮。其實約朋友一齊搶fanfares，可以試下利用手機即時通訊軟件，例如whatsapp/Line等建立討論群組，咁就更方便快捷約腳出擊。
希望以上攻略能幫大家慳錢去旅行，真係嗰嗰禮拜「又飛啦！」。
（記得按下面「讚好」Share俾Facebook朋友）
