淡季去開恩茲，有著數架！之前同大家講過：由依家到30/6 期間，經國泰官網訂購開恩茲機票（不論係經濟客艙（包括fanfares機票），特選經濟艙，商務甚至頭等艙），如果係31/10前出發，佢會加送兩項優惠：

1. HK$100國泰航空免稅品預訂電子禮券，您可以喺出發前上國泰免稅品網上商店（http://www.cathaypacific.com/dutyfree）揀定心水免稅品，用呢張禮券即減HK$100（用嚟買飛機模型就最抵喇），然後上機取貨；

2. 一大堆開恩茲旅遊優惠，例如遊輪或潛水活動、參與當地旅遊團、文化公園入場、Skyrail纜車或直升機之旅、餐廳優惠等，夠晒實際。

由於國泰官網最新Upgrade咗，申請優惠嘅網址亦更新咗：http://bit.ly/122MUAt，記住：30/6截止！

依家飛去開恩茲，來回淨機票HK$5,100起（連稅HK$7,697起），賣點係長達3個月有效期！唔同一般平機票玩兩星期咁短，您大可以沿住東海岸，慢慢玩晒澳洲各大城市。至於天氣，依家一般都有廿度左右，其實一啲都唔凍，涼快非常添！

申請HK$100免稅品電子禮券步驟：

1. 先去國泰官網購買香港單程或來回開恩茲機票（價錢不限），記得係31/10前出發嘅，每次預訂只可換一張HK$100，所以建議兩人去就分開兩次訂，如此類推，咁就可以每人都有HK$100現金券喇！

2. 去呢度（http://bit.ly/14WXxsV），Click “登記表格”，填寫個人資料，國泰會喺十四日內核實。記得睇清楚條款及細則呀！

3. 經國泰核實後，國泰會send返一封email俾人客，裡面會有呢張HK$100免稅品預訂電子禮券編號，您只需喺國泰免稅品網上商店（http://www.cathaypacific.com/dutyfree）揀定心水免稅品，結帳時輸入禮券編號，即可減HK$100喇！

（覺得抵請記得按Like同Share俾朋友）

剛過去嘅Weekend，版主飛咗一轉名古屋。多謝以下Fans：Leo Lung, Yung Cheung, Christina Cheung（有去千里馬藥房，名牌護膚用品7折！仲有中國人做Sales，唔駛雞同鴨講！地下零食部我亦掃咗唔少）, Po Cheng, Stephen Wong, Malik Yeung, Simon Leung（太通口的確方便，下次會考慮住嗰度，另外雞翼係可以帶上機！）, Meg Cho, Teresa Lam，4/6小弟出Post問意見，您哋都俾咗好多有用資訊，萬謝！

名古屋，您可以話冇乜嘢玩，但其實勝在夠細，由機場坐Express電車入市中心都係20分鐘左右，單程約HK$88左右，抵過香港機場快線。

講到買嘢，個人認為名古屋仲正過東京／大阪，因為商店夠集中，幾乎所有日本大型百貨公司及著名商店，您都可以喺”榮區”搵到，一次過搞掂晒，唔駛好似東京咁走嚟走去咁煩，好適合Weekend飛去Shopping人士。尤其7月初正值日本大激安，唔想請假去掃貨，以後可以轉戰名古屋（況且國泰成日出名古屋fanfares，而且比大阪或東京，名古屋免費機票更加容易換到）。

至於名古屋三大名吃，小弟都試過，報告如下：

1. 蓬萊軒鰻魚飯（頂）－　絕對要食！今次去榮區松板屋店食，排咗接近1小時，不過真係值回票價。呢個人人必點嘅鰻魚套餐，主角鰻魚燒至甘香，全冇魚骨，而最有趣係一道菜可以變出三種食法：首先分四分之一，唔加調味料，就咁鰻魚+日本米飯食；另外嘅四分之一係加伴菜，再撈埋鰻魚 + 日本米飯一齊食；之後嘅四分之一，係以茶漬方法，加入Wasabi + 紫菜，變身成鰻魚湯飯！最後四分之一就隨您心意，一個套餐，三種味覺感受，正斗呀！

2.世界の山ちゃん炸雞翼（左）－　一食上癮！雞翼Size有手指公到食指咁大，隻隻一樣，雞翼配以特製的醬汁，小小辣，但又唔係好咸，外皮鬆脆，但雞肉嫩滑，配以超凍日本啤，嘩～人生一大樂事！（溫馨提示：名古屋機場離境大堂亦有一間分店，不過係Take Away，可以當手信買少少返香港益下朋友。

3. 矢場味噌豬排飯（右）－　呢間又係人龍店，但好多都係遊客（就算係日本人，睇佢拎住旅遊書都知佢唔係Local）。圖中乃鼎鼎大名嘅鐵板味噌豬排，不過非常失望：豬扒勁肥膩，最慘係肥膏同豬肉黏埋一齊，最終一半豬扒被迫報銷。唉！絕對冇下次！

講住咁多先，遲啲有時間會講下名古屋玩免費WiFi方法。

（覺得正請記得按Like同Share俾朋友）