#又有漏洞：多謝fans Polly Cheng報料，今日報嘅長榮HK$660機票出現漏洞：本來最後出發日期為15/4，但如果選擇日期時揀到最後（4月13去，4月15回），然後揀”彈性旅遊日期”，入到去見九宮格表後再按”後7日”，您會發現打後一直到10/7都有HK$660選擇！復活節週六去週二返來回HK$740，5.1 + 佛誕長假期有HK$660！嘩呢個真係堅抵！有買趁手！

漏洞機票，老規舉：千祈唔好打電話／email問航空公司，以免打草驚蛇！漏洞嘅嘢，手快有手慢冇！

情人節限定劈，剛剛又有一隻：長榮將於一陣13:14推24小時限劈，仲首度開賣4月份台北平機票：出發日期17/2 – 15/4，來回台北淨機票HK$660起，連稅HK$1,308，去程限坐BR810（21:45/23:25），俾多HK$30去程可以坐Hello Kitty航班BR858（21:05 / 22:45）及BR828（07:30/09:10），呢個值得推介！不過呢兩隻盤回程都有航班限制。另一隻淨機票HK$740，去程限坐BR852（11:20/13:00）及BR868（13:40/15:20），回程冇限制睇供應，亦可以坐Hello Kitty航班BR857（18:10/20:00）。機票有效期7日，最後出票日期為15/2 13:14止。

網址：www.evaair.com

（覺得抵請記得按Like同Share俾朋友）

今日情人節，一於送呢份平平大禮俾Honey：8月搭菁英嘉印號（Celebrity Silhouette）郵輪，由意大利威尼斯上落船，帶佢去晒希臘米克諾斯（Mykonos）睇小白屋，仲有著名歐洲中古城：克羅地亞杜布羅夫尼克（Dubrovnik）／希臘古城遺址：土耳其以弗所（Ephesus）／英國皇室避暑勝地：希臘科孚島（Corfu），每人最平HK$6,430起（內艙房），連稅HK$9,188起。除番開，每人每晚連稅最平只係HK$1,312起，已經包食包住包交通，相比起自己搭飛機+住酒店+搵嘢食，既慳錢又慳時間（瞓醒就上岸），係玩地中海最Easy最抵方法，況且8月係超旺季呢！平時一票難求。至於香港<->威尼斯機票，8月去暫時最平係俄羅斯航空，來回連稅約HK$7.8K，以8月黃金檔期嚟講，算平啦！

如果俾多少少住海景房，每人最平HK$10,330起，連稅HK$13,088起，有靚景之餘又可以有享用一隻”123go!”3選2優惠，等您可以：1.免小費（價值HK$656）；2. 雙人經典飲品套票（價值每日US$88，約HK$686，7晚2人加埋都成HK$4,800，激抵）；3. 每房US$200，約HK$1,560，船上消費額，用嚟做SPA又得，去船上幾間額外付費嘅餐廳Fine Dining又得。

相比起其他郵輪，菁英遊輪走時尚豪華路線，唔似一般咁老餅，最潮係船上有首個由Apple 授權嘅海上Reseller 同埋iLounge，有Apple職員開班教大家用蘋果Gadgets ，學Photo及Video Editing，旅行中都有新嘢學，Fit晒有態度嘅後生仔，仲有獨家嘅船上戶外真草草坪，俾您喺海上野餐或者玩木球！至於菁英嘉印號，本身係2011年先落水，船上設施都好新淨，超過12萬嚬，最多可以載2,886人，佢隻行亞洲嘅姊妹船菁英千禧號（Celebrity Millennium）今個Weekend會停泊喺啟德郵輪碼頭，大家經過時記得留意下：認住煙囱上個”X” Logo，就係正貨標誌。

出發日期：3/8 及 17/8, 2014

網址：www.celebritycruises.com

查詢電話：2316 1308

（覺得抵請記得按Like同Share俾朋友）

澳門嘅朋友發達啦！皆因AirAsia推出情人節癲劈盤！即搶啦！出發日期為1/9 – 31/12，2人或以上出發（即係單人飛唔得），飛吉隆坡來回連稅MOP 1,176起（每人MOP 588），飛清邁來回連稅MOP 1,776起（每人MOP 888），呢口價回歸到AirAsia剛落戶澳門之時！Check過系統，供應量都唔錯，唔太難搵，10.1 + 重陽節長假期如果肯早少少日子出發（如23/9或24/9）都仲有呢口價。至於香港朋友，來回馬交船費都要HK$300，唔太值得囉！記住：買單人冇呢口價，Search 嗰陣記得揀2人或以上呀！最後出票日期為16/2。

網址：www.airasia.com

（覺得抵請記得按Like同Share俾朋友）

今日情人節，各間航空公司都推出限定劈盤，斯里蘭卡航空又嚟趁熱鬧，推出機票86折優惠，只限今日購票。Check過系統，最抵都係一批30/6前出發機票，例如馬爾代夫來回HK$2,700起（連稅HK$4,084），科倫坡HK$3,380起（連稅HK$4,815），巴黎HK$3,200起（連稅HK$5,682），法蘭克福HK$3,400起（連稅HK$5,978），全部都中停曼谷（不用轉機）及於科倫坡轉機，機票有效期1個月（科倫坡3個月）。Check過系統，呢批平飛主要集中喺5至6月，暑假冇，秋天會貴少少但仍屬合理範圍。飛巴黎及法蘭克福連稅唔過HK$6K都有得諗，馬代呢口價不過不失。至於曼谷，因為仍有黑色旅遊警示，暫不作推介。

網址：www.srilankan.com

（覺得抵請記得按Like同Share俾朋友）

拿拿林搶啦！酷航剛開倉呀！只限情人節入手！出發日期由依家到25/10（暑假，復活節，總之乜節日都包埋），飛新加坡HK$730起（來回連稅計，下同），飛澳洲仲抵：飛珀斯HK$2,663起，悉尼／黃金海岸HK$2,572起，比國泰平一半以上！呢口價應該係近期新低，況且單程都有平，方便一眾Working Holiday人仕平去澳洲打工。以上價錢不包行李寄艙及飛機餐。至於之前推介嘅商務倉，今次未見明顯平，都係入番經濟倉實際啲。最後出票日期為14/2 23:59。

網址：www.flyscoot.com

（覺得抵請記得按Like同Share俾朋友）