國泰今年新開香港<->紐約紐瓦克（EWR）直航服務，最近低調地推出兩隻筍盤：首先係香港出發直航，2人同行每人淨機票HK$5,990起，連稅HK$8,467起，出發日期為1/3 – 16/4；22/4 – 30/4，機票有效期1個月，Check過系統，復活節附近日子出發都有位，不過今次重點推介係廣州出發！國泰喺大陸市場做緊限時劈，來回淨機票CNY2,110起（HK$2,700起），連稅CNY4,364（HK$5,586），機票有效期更長達3個月，單人出飛都得！咁真係無敵平啦！但要留意兩大缺點：1. 出發日期限1/3 – 31/3，比較Last Minute；2. 要喺香港等6小時先可轉機飛紐約，但平成三千幾兼可以留美國多兩個月，廣州出發點計都係爆抵！最後出票日期分別為2/3（香港出發）及21/2香港時間晚上8點正（廣州出發），前者官網冇售，要去真旅網買，後者國泰官網中國版有售。

提提您：回程可以唔駛飛返廣州，如果有行李寄艙，只要喺紐約機場同地勤講聲，叫佢哋將行李只掛到香港就得，之後仲可以問國泰攞番最後一程稅款添！

真旅網網址：www.travelzen.com

國泰網址：www.cathaypacific.com

（覺得抵請記得按Like同Share俾朋友）

今個禮拜國泰fanfares出奧克蘭，對手新西蘭航空立即跟，冇計！依家係南半球秋天，淡季嘛！講番呢隻限時劈：出發日期由12/5 – 28/5，回程須於11/6前，來回淨機票HK$4,590起，連稅HK$6,886起，直航呢口價係少見，同一段時間飛奧克蘭，買廉航Jetstar來回連稅都要近HK$7K，仲要轉機兼唔包行李寄艙及飛機餐，點計都係新西蘭航空抵，有心去又唔介意天氣係值得買嘅！記住：只有新西蘭航空執飛先有平，最後出票日期為20/2（週四）早上7:59。

網址：www.airnewzealand.hk

（覺得抵請記得按Like同Share俾朋友）

今個星期港航話飛就飛Last Minute劈，已經開賣，有平貨呀！出發日期為5/3 – 31/3，扣除紫荊會會員減HK$50（首次）或50 eCredit（第二次後）優惠，最抵係峇里島，來回淨機票HK$1,390起，連稅HK$1,960起，唔駛2千直飛，貴虎航HK$4xx，但港航包行李寄艙及飛機餐，計埋條數兩者相若，但港航單人飛都得。次平當然係一眾大陸盤，來回三亞／海口$390，連稅HK$1,076起；上海／南京／杭州HK$490，連稅HK$1,176起，一般平就係台北，來回HK$690，連稅HK$1,338起，冇乜大特別（去程限坐 HX 264 12:05-13:45 或HX284 23:30-01:15+1），機票有效期7日，最後出票日期為21/2。

網址：www.hongkongairlines.com

（覺得抵請記得按Like同Share俾朋友）