星期五晚，不如講單有趣嘅劈價消息。新加坡吉隆坡呢個1小時黃金短途航線，自從兩三年前重新開放營運後（以往只容許做駁機），三間廉航（包括AirAsia, JetStar同埋Tiger Airways）一直鬥到你死我活，情況就好似香港台北線咁互片。最近JetStar終於忍唔住，駛出終極一劈，推出來回$0免費機票，只要你肯俾油附同機場稅就得，來回只需SGD48（約HK$294），仲平過張香港澳門來回船飛。本來$0機票唔出奇，奇就奇在今次劈價嘅飛絕非遠期期貨，而係Last Minute嘅7月-10月！數量仲要唔少添！如果您打算暑假飛呢兩個城市，可以去JetStar買。唉！羨慕死人！如果小弟住喺新加坡／吉隆坡就幸福啦！真係個個禮拜又飛啦！

網址：www.jetstar.com

（記得按下面「讚好」Share俾Facebook朋友）

呢排陸陸續續有航空公司推出秋季早餐盤，平霸AirAsia梗係唔執輸啦！收到風，佢哋會喺今晚零晨00:00（即週二）起推出18/9至30/11期間出發嘅秋季平機票，遍佈所有航點，以香港出發為例，單程連稅，飛曼谷HK$588（比暑假平成千蚊），布吉HK$788（11月打後進入旅遊旺季），吉隆坡HK$738（一般啦），檳城HK$638（Good），經吉隆坡飛柏斯HK$1,769，黃金海岸HK$2,064，墨爾本HK$2,067；至於澳門出發嘅一樣有平，曼谷約MOP420（誓要同Thai Smile死過），清邁約MOP630，吉隆坡約MOP670。至於一眾國內航線當然有劈啦！想知幾錢可到以下網址瀏覽。（留意，飛曼谷九月打後可能改飛舊機場：廊曼國際機場，不過官方暫時未有公佈，買飛前不妨有心理準備）

網址：www.airasia.com

（記得按下面「讚好」Share俾Facebook朋友）

AirAsia由聽日（4/6）至17/6會推出一批暑假Last Minute平機票（出發日期為11/6 – 10/8），似乎改變佢一向早訂先平嘅銷售模式喎！特價航線覆蓋雖然非常之多，只可惜：竟然唔包香港來回航線！反而澳門同廣洲有。以澳門為例，飛吉隆坡單程連稅約HK$730，飛泰國曼谷HK$705，清邁HK$760，比依家系統所賣價每程平三百蚊左右，來回差六舊，爭好遠啦！澳門Fans一定開心死，不過我估計呢啲平飛唔會有太多供應（始終都係Last Minute，仲要係暑假），到時自己去發掘啦！香港朋友唔介意渡江出發，都值得諗下，就算唔吼澳門，都可以諗下佢其他航點優惠吖！

網址：www.airasia.com

（記得按下面「讚好」Share俾Facebook朋友）

AirAsia每逢週五都會推出”Fabulous Fly-day”優惠，將Last Minute出發嘅機票限時劈出。我哋「又飛啦！」都曾經介紹過下，不過見佢好耐都冇飛香港／澳門優惠，所以先無提。點知今個禮拜嘅Fabulous Fly-day竟然見到香港／澳門優惠！1/6 – 30/6出發，曼谷飛香港單程連稅HK$672（THB 2,690），依家官網平均賣緊HK$1,125（THB4,500），回程平五舊！吉隆坡單程飛澳門連稅HK$473，依家官網就賣緊HK$648 – 798（MYR 259 – 319），都平二百幾。不過去程究竟有冇得平？估計就冇，不如一陣11am上官網望一望，放心！人流一定比開倉少得多，可以慢慢揀，不過記住截止時間為同日4pm，睇啱就爽手喇！

網址：www.airasia.com

（記得按下面「讚好」Share俾Facebook朋友）

尋晚先介紹港龍台灣缺口飛（Open Jaw，即不同城市來回香港）抵玩，今次就介紹同系嘅國泰特價缺口飛。佢隻吉隆坡同檳城來回HK$1,600（未連稅，下同）筍盤都做咗一段長時間，不過原來佢Open Jaw飛都一樣好抵，無論揀檳城入／吉隆坡出，抑或吉隆坡入／檳城出，呢隻7日飛只需HK$1,650，中間你夾隻AirAsia內陸機，或者索性搭5粒鐘巴士就掂啦！當然你可以去AirAsia買兩張獨立單程飛自制Open Jaw，但依家先訂，冇筍嘢喎！況且國泰質素點都高幾皮，兼且出發日期去到12/7（最後訂購日期為30/6），暑假初想平飛馬來西亞？國泰For Sure！

網址：www.cathaypacific.com

（記得按下面「讚好」Share俾Facebook朋友）

AirAsia終於一次過公佈明年春天國際航線嘅價錢，今晚凌晨（16/5）00:00開倉。不過單睇香港出發嘅主要航線，似乎唔係太抵喎（以超早餐盤而言）！除非大時大節都仲有呢啲價啦！香港飛吉隆坡/檳城/沙巴單程連稅HK$498起（來回連稅HK$876起），沙巴都算抵。飛曼谷單程連稅HK$498起（來回連稅HK$1,025起），曼谷大把平機票啦！飛布吉單程連稅HK$538起（來回連稅HK$1,065起），平時早兩三個月訂淡季都只係貴四/五舊，唔駛咁早決定喎！飛墨爾本/黃金海岸/珀斯（經吉隆坡轉AirAsia X） 單程連稅HK$1,422起（來回連稅HK$3,452起），同東航差唔幾，咁我寧願搭Full Carrier。不過澳門出發就堅平，飛曼谷/清邁單程連稅澳門幣288起（來回連稅澳門幣669起），想去清邁就抵啦！吉隆坡單程連稅澳門幣438起（來回連稅澳門幣827起），而飛墨爾本/珀斯（經吉隆坡轉AirAsia X）單程連稅澳門幣1,389起（來回連稅澳門幣3,481起），好過去香港轉機，都諗得過。不過其他東南亞跨國機票就非常有睇頭，詳情可以去AirAsia望一望。

留意位：

1. 訂購日期：16/5 – 20/5

2. 出發日期：4/1/2013 – 22/5/2013

網址：http://www.airasia.com/my/en/promotion/rr1280105b.page（所有航線）
http://www.airasia.com/hk/zh/promotion/rr1280105.page（只限香港出發）

（記得按下面「讚好」Share俾Facebook朋友）

AirAsia下年春季嘅內陸線$0機票詳情經已公佈。由於一律連稅，所以表面上冇$0，實際上有唔少機票本身就係$0。馬來西亞方面，吉隆坡飛檳城HK$57（單程連稅，下同），平過搭巴士！浮羅交怡同丁加奴（去樂浪島）一樣HK$57，超抵玩！泰國方面，曼谷飛清萊HK$29，清邁／喀比／布吉就HK$80；印尼方面，雅加達飛峇里HK$178，夾埋張華航超平機票就掂。仲有一系列東南亞唔同航點出發嘅內陸機票，最平去到HK$5 添！趁週日得閒，上去研究下啦！

留意位：

1. 銷售日期：14/5 00:00 – 20/5 23:59

2. 出發日期：4/1/2013 – 22/5/2013

網址：www.airasia.com

（記得按下面「讚好」Share俾Facebook朋友）