X
你哋今早搶唔搶到250日圓嘅大阪飛福崗超平機票呢？我哋就失敗喇！鬼咩，Server慢到嘔；不過搶唔到唔駛灰心，更受歡迎嘅札幌線壓軸登場！今日下午官方宣佈，聽早會推出第二擊：大阪飛札幌250日圓機票，明早（6/1）日本時間10:00開賣，一樣去到下午5時截止（應該頭1小時就賣晒架啦）。札幌應該更多人搶，建議大家早20分鐘Load入去撞下彩啦！Good Luck！
（記得按下面「讚好」Share俾Facebook朋友）
萬眾期待，終於嚟啦！上個月16號咪同大家預告定日本新廉航桃子航空會推出5,000張超平價250日元（折合約HK$25）單程機票嘅，今日終於公佈發售日期，將於聽早（5/1）日本時間10:00正式網上及熱線發售（佢就話賣到下午3點為止，唉！我估一粒鐘內都賣清光啦）。今次會先推出第一批特價機票：大阪與福崗，下一波先會賣最多港人Like嘅大阪與札幌。佢冇寫明個別發售Quota，係咪咁簡單一開二2,500張？唔知啦！總之聽早返到公司，記得去佢官網狂按F5喇！
（記得按下面「讚好」Share俾Facebook朋友）
ANA旗下首家新開廉航：桃子航空（第二間咪同AirAsia合作嘅AirAsia Japan囉）將會於明年1/3正式投入服務，以大阪關西為基地，先開設福岡同札幌（新千歲）嘅國內航班。尋日佢哋係官網出咗新聞稿，宣佈2單勁嘢：首先為慶祝首航，公司會推出為數5,000張超平機票，單程只係250日元（未連稅，下同），咁即係HK$26！出發日期為1/3 – 24/3，到時一定爆搶啦！第二係公佈初期機票定價（請睇留意位），最平都係幾舊水港紙一程，都抵吖！至於幾時有得賣，新聞稿冇寫確實日子，只係話12月尾至1月頭，你哋密切留意我哋報導啦！
留意位：
[快樂桃子方案]
大阪（關西）－福岡線 3,780円～11,780円（單程）
大阪（關西）－札幌（新千歳）線 4,780円～14,780円（單程）
[快樂桃子PLUS方案] （可於網路上變更班次）
大阪（關西）－福岡線5,480円～15,780円（單程）
大阪（關西）－札幌（新千歳）線6,480円～19,780円（單程）
（記得按下面「讚好」Share俾Facebook朋友）
如果你係「又飛啦！」忠實Fans，都會了解「早餐盤」呢個Terms，即係航空公司推出早購優惠，愈早訂飛，愈多折扣。今次港航就擺明車馬，推出名為「AP預購優惠」（AP = Advance Purchase），分AP21，AP14同AP7三種（數字即代表提前幾多日），優惠去到明年31/3。去上海同北京，AP21最平分別可以去到HK$1,360同1,570（未連稅，下同），北京呢口價勁抵。至於日本，大阪同東京嘅AP21最低分別可以去到HK$2,200同1,990，大阪如果長期有呢口價唔錯呀！新加坡就HK$1,480，一般！印尼峇里島就HK$3,420，冇計！直航不嬲都好貴，呢個價好過冇！
留意位：
1. 出發日期：北京／上海 – 現在至22/12；27/12 – 19/1；27/1 – 31/3，其他地方：現在至21/12；27/12 – 18/1；27/1 – 31/3
2. 機票有效期：2 – 7日
（記得按下面「讚好」Share俾Facebook朋友）
今早上網搶唔到iPhone 4s？咁搶日本機票啦！我哋近月好少下午出Post，不過呢單猛料唔等得！見對手日本線減價反應熱烈，港航一於唔執輸，推出HK$1,790（未連稅，下同）東京或大阪平機票，平過兩大對手兩舊水。呢單猛料連官網都未宣佈，條款細則未知，估計都係限日發售個隻！出發日期由依家起到14/12，然後5/1至15/1。Check過系統，去東京日日都有HK$1,790（當然唔計Block Out Day）；至於大阪，11月HK$1,790依家只賣剩少數，高一級就HK$2,160，要搭正週末去就HK$2,730。想週末飛？12月及1月仍然有唔少選擇。趁官網未正式宣佈（通常都係週五晚上七點打後上Banner），快啲靜雞雞叫埋同事朋友一齊搶定先！
（記得按下面「讚好」Share俾Facebook朋友）
特別報告！急急急！繼日航同ANA推出日本平機票後，國泰依家先嚟個反擊，推出限時優惠，飛日本東京／大阪／名古屋／福岡來回只需HK$1,990（未連稅，下同），為2-7日機票，購買限期到本週六5/11晚上23:59，出發日期為10/11 – 14/12以及5/1 – 15/1，時限同CO HK$1,888差兩星期，都算可以，總之假期高峰期就免問啦！上次執唔到國泰平機票嘅你，今次快趣啲啦！仲有仲有！依家上佢官網訂日本機票，只需再登記，就可獲贈「無印良品X國泰航空旅行套裝」一份，每位合資格嘅乘客更可獲贈無印良品 Muji to GO 香港國際機場店九折購物優惠券一張添！
（記得按下面「讚好」Share俾Facebook朋友）
今日打風，稍有時間，幫大家深入Agoda「陣營」搵盡大阪酒店優惠！
方便之選：Hotel Vista Grande Osaka
想住熱鬧地區酒店，呢間係不二之選，位於心齋橋區，一出嚟就係道頓堀川，同東京新宿歌舞技町差唔多，完完全全係不夜城，24小時開嘅書店、咖啡店、拉麵店，仲有大量酒吧開到夜一夜，而且乜都有得賣嘅Donki一出酒店就見到。依家Agoda做緊優惠到明年31/3：入住1晚67折，3晚6折（只係3晚先有6折，多一晚都做番67折，奇），每晚港紙八百幾（未連稅，下同），房間又唔差，所以我最推呢間。
網址：http://www.agoda.com.hk/asia/japan/osaka/hotel_vista_grande_osaka.html
舒適之選：Fraser Residence Nankai Osaka
日本比較少Service Appartment，咁就要試一試喺TripAdvisor.com中網民評價大阪酒店榜中排第2位嘅Fraser Residence Nankai！佢最大賣點係房間夠大，最基本嘅房都有300呎大，以日本標準嚟講已經好唔錯（一般平價酒店只有180-200呎左右），而且房內有齊Service Appartment必備：洗衣機、微波爐同廚房，床仲係King Size嘅席夢思！正到痺呀！距離南海難波站行去只係2分鐘，依家Agoda做緊特價到明年31/3：入住2晚7-85折，平均每晚九百幾。
網址：http://www.agoda.com.hk/asia/japan/osaka/fraser_residence_nankai_osaka.html
型爆之選：Hotel Brighton City Osaka Kitahama
唔喺位於心齋橋購物區，位於商業區，環境靜啲，但交通都算方便，由地鐵堺筋線北浜站5號出口行去酒店只係1分鐘，直達新大阪JR站只係10分鐘。佢最大賣點係裝修型格，而且房間夠晒寬敞，廁所有齊淋浴間同浴缸，喺日本嚟講少見。依家Agoda做緊特價到今年年底，房價58折，平均每晚七百幾，輸地點，但贏性價比。
網址：http://www.agoda.com.hk/asia/japan/osaka/hotel_brighton_city_osaka_kitahama.html
（記得按下面「讚好」Share俾Facebook朋友）
日航減，ANA又減，港航點會坐視不理？佢又推出東京/大阪/沖繩3個航點平機票優惠，去東京只需HK$1,750，大阪HK$2,040，沖繩HK$1,940，訂購日期到30/9止，出發日期為25/10至15/12，機票有效期7日，Check過系統，仲有唔少平價飛，快手叫埋朋友一齊Book喇！
至於我哋之前提過嘅一起飛訂購港航東京機票來回HK$1,619，出發日期只去到29/10，以上嘅Plan可算係特價接捧盤。
（記得按下面「讚好」Share俾Facebook朋友）
X