20/8 9:11am Updated：國泰港龍fanfares開賣喇！

自由揀日子地點有：台中／吉隆坡／沙巴／峴港／杜拜，出發日期為20/10 – 2/11
指定日子來回地點有：廈門／河內／金邊／濟洲／仰光／札幌，出發日期介乎23/8 – 2/9（札幌為24/10 – 10/10）

－　札幌指定日子來回，得嗰4日？反高潮吧？
－　杜拜直航HK$2,000呢口價的確近年少見
－　吉隆坡唔係零晨機，其實有睇頭
－　台中港龍少劈價，冇人吼嘅？
－　濟洲雖然指定日子來回，但暑假去呢個價的確抵買

國泰港龍fanfares第43週又嚟啦！記得聽早（週二）08:00開倉喎！今次推出11個城市（首次有札幌呀！！！！！！！！！！！！！！！！），自由揀日子出發日期估計為20/10 – 2/11，指定日子一般介乎22/8 – 2/9（暑假出遊，最後機會）：

地點　淨機票｜連稅價（評語）

廈門 HK$590 | HK$1,225（對手抵啲）
台中 HK$690 | HK$1,289（台灣啦喂）
河內 HK$790 | HK$1,435（港航同價）
金邊 HK$790 | HK$1,505（真係幾抵）
吉隆坡 HK$990 | HK$1,667（零晨no way）
濟洲 HK$990 | HK$1,676（嘩好抵喎）
仰光 HK$1,290 | HK$1,888（已成常客）
沙巴 HK$1,490 | HK$2,167（寧等快運）
峴港 HK$1,890 | HK$2,535（自由貨色）
杜拜 HK$2,000 | HK$4,019（嘩超值喎）
札幌 HK$2,990 | HK$3,592（首度登場！！！）

以上只作參考用途，其他稅項及附加費或會有所變動。

國泰FanFares網址： www.cathaypacific.com

港龍FanFares網址： www.dragonair.com

「國泰港龍fanfares往績全紀錄」（by Google Doc)：http://bit.ly/Y5JkUl　<–記得Bookmark！

相關文章；官方親自Share！國泰港龍fanfares至勁搶飛攻略！http://flyagain.la/?p=7434

（覺得抵請記得按Like同Share俾朋友）

16/8 06:14am Updated：隆重宣佈：漏洞已封！下次再會！

連續兩日都有漏洞價機票，今日輪到阿聯酋航空（仲可以坐A380添）。是咁的：一張正常香港直航來回杜拜嘅機票，搭阿聯酋航空來回連稅約HK$7,000左右，但如果經新加坡飛，來回淨機票竟然平到HK$1,640起，連稅HK$2,086起！仲平過齋去曼谷／台北呀！事實上，呢張漏洞票係由兩家航空公司機票所組成：香港<->新加坡係搭聯合航空，新加坡<->杜拜係搭番阿聯酋航空，究竟係邊張機票出現漏洞，暫時仲係一個迷。阿聯酋官網有得賣，唔駛諗，即卜！

呢張漏洞機票有4大賣點：

1. 所有城市皆可免費中停
2. 新加坡來回杜拜，由於是旦一程須於斯里蘭卡科倫坡中停（另一程可揀直航），您亦可以選擇停埋科倫坡玩，都係免費
2. 有里數儲（Emirates Skywards會藉就計5,500里，其他航空公司要稍後研究（聯合航空嗰程係K Class，阿聯酋航空嗰程係X Class）。
3. 出發日期非常長，暫時搵到10/2013至4/2014都有（不過唔係日日有），機票有效期1個月，夠晒您玩盡新加坡 + 斯里蘭卡 + 杜拜三地

由於出發日期／航班選擇組合極多，除咗附圖嘅例子外，建議大家上番阿聯酋官網慢慢Search，搜尋時記得揀”多個目的地／中途停站”，將每一段航程拆出嚟（例如：1. 香港 -> 新加坡；2. 新加坡 -> 杜拜；3. 杜拜 -> 新加坡；4. 新加坡 -> 香港，如果想玩埋科倫坡，可以改成：1. 香港 -> 新加坡；2. 新加坡 -> 杜拜［去程中停科倫坡都得］；3.杜拜 -> 科倫坡：4. 科倫坡 -> 新加坡；5. 新加坡 -> 香港），再用唔同日子搜尋，香港<->新加坡指定坐聯合航空（UA），搵到淨機票HK$1,640就係出擊目標（俾少少貼士您：新加坡去杜拜如果揀EK355，比較易搵出漏洞價）。

漏洞機票，老規舉：千祈唔好打電話／email問航空公司，以免打草驚蛇！漏洞嘅嘢，手快有手慢冇！

網址：www.emirates.com

（覺得抵請記得按Like同Share俾朋友）

首爾，上海，杜拜，昆明，四個截然不同嘅地方，只要您肯一張機票玩晒佢，淨機票只係HK$3,708起，連稅HK$5,590，仲可以暑假飛添（您冇眼花，真係咁抵）！學生哥或想飛長Trip者，今次就要俾足心機留意下，皆因要留心以下教學，再自己努力慢慢Search，先搵到呢批筍價。咁點樣飛呢？經我哋反覆研究後，只要用以下步驟就可以玩晒4個城市（當中首爾同上海Trip可以同杜拜及昆明Trip拆開，分兩次玩唔駛一連請咁多假），留心要揀啱日子，因為有部份航程唔係日日有航班，建議行程如下：

第一程：香港飛首爾，中停上海浦東（即飛，唔好Stop-over），每日都得

第二程：首爾飛上海浦東，直航，每日都得

（玩完上海，您可以買春秋航空單程機票返香港；到一段日子後，再買另一張春秋航空單程上番上海，繼續以下行程，當然您有權唔返香港一路玩落去啦）

第三程：上海飛杜拜，中停昆明（即飛，唔好Stop-over），揀週一／二／六是旦一日

第四程：杜拜飛昆明，直航，揀週二或六

第五程：昆明返香港，直航，每日都得，但以週二或六平機票機會較大

就以附圖為例，8/7香港飛首爾，14/7首爾飛上海，16/7上海飛杜拜，20/7杜拜飛昆明，27/7昆明飛香港，淨機票正係HK$3,708，連稅HK$5,590。不過呢口價供應量唔太多，俾多HK$333就易搵啲。如果第二及第三程相隔時間耐，淨機票會升到HK$4,263（即係多HK$555），埋單都係HK$6K左右。呢隻搞鬼筍盤，唔單止暑假出發，去到今年年底都有，實在係另一奇趣大發現。呢隻Fare官網訂唔到（因為冇Multi-City揀），去ZUJI發掘下啦！

網址：www.zuji.com.hk

（覺得抵請記得按Like同Share俾朋友）

08:50am Updated：#fanfares分析#

國泰港龍fanfares開賣啦！

自由揀日子地點有：桂林／青島／台北／杜拜，出發日期為14/7 – 27/7，名古屋／多倫多，出發日期為24/9 – 7/10
指定日子地點有：台中／新加坡／首爾／墨爾本／珀斯，出發日期介乎17/5 – 27/5

－　台中指定日子，嗯～
－　首爾啲指定來回日子，真係幾難揀
－　多倫多自由揀日子！就算9月都抵啦！平成三千蚊以上！
－　杜拜暑假呢口價（HK$2,000 / 連稅HK$4,123），值得推介！

國泰港龍fanfares第二十九週又嚟啦！記得聽早（週二）08:00開倉喎！今次推出11個城市，上次自由揀日子出發日期為7/7 – 20/7（峴港同巴黎就17/9 – 30/9），指定日子一般介乎9/5 – 20/5，估計今次又係順延一週咁上下（即係完全踏入暑假喇），不過長途航線有機會係9月打後：

地點　淨機票｜（連稅價）評語　自由／指定日子（估計）

桂林 HK$690 | HK$1,353（都算幾抵）（自由日子）
台中 HK$690 | HK$1,318（港航仲平）（自由日子）
台北 HK$990 | HK$1,618（唔算太筍）（自由日子）
青島 HK$990 | HK$1,653（值得考慮）（指定日子）
新加坡 HK$1,090 | HK$1,854（可以一買）（自由日子）
首爾 HK$1,190 | HK$1,943（瞓身推介）（指定日子）
名古屋 HK$1,790 | HK$2,537（暑假都值）（自由日子）
墨爾本 HK$1,990 | HK$4,657（互劈再減）（自由日子）
珀斯 HK$1,990 | HK$4,652（獨市經營）（指定日子）
迪拜 HK$2,000 | HK$4,123（少見筍盤）（指定日子）
多倫多 HK$3,990 | HK$6,351（平到你驚）（指定日子）

國泰FanFares網址： www.cathaypacific.com

港龍FanFares網址： www.dragonair.com

「國泰港龍fanfares往績全紀錄」（by Google Doc)：http://bit.ly/Y5JkUl　<–記得Bookmark！

相關文章；官方親自Share！國泰港龍fanfares至勁搶飛攻略！http://flyagain.la/?p=7434

（記得按下面「讚好」Share俾Facebook朋友）

如果您係大專生，又可以喺15/5 – 15/6期間去旅行（奇怪！呢段時間唔係考試季節咩），國泰港龍有Special著數俾您！佢推出咗一批航點嘅專屬優惠，只限正在就讀指定大專學院嘅學生，地點覆蓋眾多，包括（來回未連稅，下同）：

福州／廈門／海口／三亞：HK$550（同平時fanfares價差唔多）

長沙／杭州／昆明／桂林／寧波／南京／溫州／武漢：HK$850（同上）

鄭州／青島／西安：HK$1,060（西安係幾抵買）

沙巴：HK$1,430（馬航差冇幾喎～）

峴港／河內／胡志明市／金邊：HK$1,580（峴港／金邊最抵，其他一般）

濟洲／釜山／首爾：HK$2,000（梗係首爾正啦～）

福岡／名古屋／東京／大阪：HK$2,500（同ANA價錢一樣，競爭力一般）

加德滿都：HK$1,800（強力推介！港龍2人同行每位都要HK$2,300，依家1人飛都得）

阿布達比／巴林／杜拜／阿卜杜勒／利雅德：HK$2,400（以價論價係幾抵玩，不過始終唔係後生仔熱門旅行地點）

阿德萊德／布利斯本／開因茲／墨爾本／珀斯／悉尼：HK$3,160（同fanfares淡季價相若，冇乜特別）

倫敦／法蘭克福：HK$5,060（倫敦呢口價值呀！法蘭克福都OK Good）

溫哥華／多倫多：HK$6,110（飛加拿大機票長期高企，尤其係多倫多，呢個價有So！）

至於受惠院校包括：城市大學／浸會大學／香港理工大學／嶺南大學／香港中文大學／香港教育學院／香港大學／香港科技大學／香港公開大學／香港樹仁大學／珠海書院／恆生商學院／東華學院／明愛專上學院／明德學院／香港高等科技教育學院

至於機票有效期：亞洲區短途為2-7日，中亞及長途就2-14日。

官網係出唔到呢隻飛，暫時要向各大旅行社出票（出票時須出示有效學生証），例如搵安運滿FUN問下。最後出票日期為14/6。

查詢電話：3913 6000

（記得按下面「讚好」Share俾Facebook朋友）

09:48 26/3 Updated：

自由揀日子地點：三亞／台中／杭州／東京成田／墨爾本，出發日期為26/5 – 8/6

指定日子地點：武漢／首爾／新加坡／悉尼／杜拜，出發日期除咗杜拜係介乎30/3 – 4/4，其他均介乎2/4 – 7/4

－　首爾同多倫多極速沽清

－　東京竟然仲有唔少？呢隻堅筍喎！

－　杜拜指定日子剛好跨過復活節同清明節，雖然逗留日子有9日，淨係玩杜拜可能太長，建議自己再買杜拜飛其他中東甚至歐洲城市機票，盡量發揮呢隻平機票優點

國泰港龍fanfares第二十二週又嚟啦！記得聽早08:00開倉喎！今次推出11個城市，上次自由揀日子出發日期為19/5 – 1/6，指定日子一般介乎21/3 – 26/3期間出發，估計今次又係順延一週咁上下：

地點　淨機票（連稅價）評語　自由／指定日子（估計）

三亞　HK$490（HK$1,208）可以考慮（自由揀日子）

台中　HK$590（HK$1,273）熱門之選（自由揀日子）

武漢　HK$590（HK$1,308）鍾意先諗（自由揀日子）

杭州　HK$690 （HK$$1,408）一般抵買（自由揀日子）

首爾　HK$$990（HK$1,796）瞓身去搶（指定日子）

新加坡　HK$1,090 （HK$1,906）一般抵買（指定日子）

杜拜　HK$1,490（HK$3,704）值得入手（指定日子）

東京　HK$1,790 （HK$2,605）難得筍盤（自由揀日子）

悉尼　HK$1,990 （HK$4,903）淡季常客（指定日子）

墨爾本　HK$2,890 （HK$5,663）見怪不怪（自由揀日子）

多倫多　HK$4,490（HK$6,946）瞓身搶購（指定日子）

國泰FanFares網址： www.cathaypacific.com

港龍FanFares網址： www.dragonair.com

「國泰港龍fanfares往績全紀錄」（by Google Doc)：http://bit.ly/Y5JkUl　<–記得Bookmark！

（記得按下面「讚好」Share俾Facebook朋友）

11:30 5/2 Updated：#fanfares分析#

－　自由揀日子嘅地方包括：吉隆坡／高雄／杭州／胡志明市／大阪／紐約，出發日期一如預期為復活節後：7/4 – 20/4

－　高雄同大阪已率先沽清（自由揀日子，唔奇）

－　主打嘅吉隆坡，班次多，唔駛硬食零晨機，今次國泰有誠意喇！

－　芝加哥同倫敦雖然係指定日子來回，但係Last Minute新年出發，適合跟大陸放長假嘅您入手

－　紐約自由揀日子，賣咗三個幾鐘竟然仲有剩？您走漏眼喇！

國泰港龍fanfares第十五週又嚟啦！記得聽早08:00開倉喎！今次推出11個城市，以長途最有睇頭．上次自由揀日子出發日期為15/3 – 28/3，估計今次係四月中復活節打後喇！

－　主打嘅吉隆坡HK$990（連稅HK$1,731，隔咗三個禮拜又出現，今次仲係升呢個主打！第六期4/12嗰次做HK$990主打都係自由揀日子，今次應該都係）

－　鄭州HK$290（連稅HK$977，又一隻連稅唔駛過千蚊機票，99%係指定日子來回，買嚟遊機河都抵）

－　武漢HK$390（連稅HK$1,077，指定日子來回啦！）

－　高雄HK$590（連稅HK$1,245，呢個價50/50，唔肯定係咪自由揀日子來回，係就發啦～起碼平過華航）

－　杭州HK$690（連稅HK$1,377，自由揀日子居多）

－　胡志明市HK$790（連稅HK$1,520，越南筍盤隔咗四期又返嚟啦！係咪指定日子來回？50/50）

－　杜拜HK$1,390（連稅HK$3,496，下欄仲貴過張機票！應該係指定日子來回，以價論價就好抵，如果唔係需要留太耐，可以玩下，停杜拜太耐會悶）

－　大阪HK$1,590（連稅HK$2,393，估計係指定日子來回，如果唔係，同樂桃相若，梗係搶啦）

－　芝加哥HK$1,990（連稅HK$4,386，第九期曾經係自由揀日子，唔知今次有冇奇蹟呢？用嚟駁機上多倫多就最Perfect）

－　倫敦HK$2,990（連稅HK$6,352，前一期HK$3,690係自由揀，呢個價必定係指定日子來回啦！不過倫敦機票需求大，話晒都係直航機，估計呢個價好快被掃光）

－　紐約HK$3,990（連稅HK$6,386，美國東岸孖寶一齊上！梗係堅抵啦，上次第三期都係自由揀日子，今次仲貴HK$1,000，應該都係一樣，亦估計好快被掃光）

記住：先搶可自由揀來回日子嘅飛先，然後再睇指定日子來回嘅飛，此外每個地點均設有獨立售賣日期，有啲為1日，有啲為6日，留心啦！

國泰FanFares網址： www.cathaypacific.com

港龍FanFares網址： www.dragonair.com

「國泰港龍fanfares往績全紀錄」（by Google Doc)：http://goo.gl/F8jom　<;;;–記得Bookmark！

（記得按下面「讚好」Share俾Facebook朋友）

雖然汶萊距離香港頗近，但向來好少港人會去旅遊，無他嘅！機票貴嘛！淨係得皇家汶萊航空有直航。不過如果想飛去墨爾本或杜拜玩，留意喇！極少減價嘅皇家汶萊航空，最近推出咗香港飛墨爾本及杜拜優惠，經首都斯里巴加灣市轉機，來回淨機票一律HK$2,930，連稅計，飛墨爾本HK$5,320，飛杜拜HK$4,750，出發日期為22/4至30/5。可能冇乜人知道，Check過系統，仲有唔少供應。呢隻盤有兩大賣點：第一係計埋稅都超平，墨爾本呢個價竟然接近AirAsia X，飛杜拜就比直航嘅阿聯酋差千幾二千：除非您能夠以fanfares價入手國泰相同途程，否則梗係皇家汶萊抵搭啦！您未必聽過佢大名，實情係呢間代表汶萊嘅國家航空公司，無論機隊抑或服務均極有水準（鬼叫國家咁有錢咩）！同區內頂級航空公司有得Flight！今次用咁平價錢就搭到，正！另外賣點係回程可以免費停一晚汶萊首都斯里巴加灣市：原因係回程不能即日轉機，需要停留一晚，咁您大可以乘機觀光下，有幸嘅話，見到吳尊唔奇架！首都唔大，大半日應該睇完，正所謂專登去就冇謂，順道玩就正斗，反正唔駛加錢嘛（當然食宿要自費啦）！

網址：www.bruneiair.com

（記得按下面「讚好」Share俾Facebook朋友）