「又飛啦！」一直堅持唔平唔報精神。前陣子，日本廉航樂桃航空曾推出過大阪來回連稅約HK$1,800推廣，我哋都力叫大家忍手（仲俾fans鬧添），話口未完，樂桃航空終於駛出終極一劈，呢次就要堅買喇：出發日期5/11 – 26/12；7/1 – 13/3（只適用於週二、三、四），暫時知道大阪單程返香港有勁劈：淨機票JPY 1,500（HK$117）起，連稅以及手續費JPY3,315（HK$259）起，至於香港去程就未有資料，今晚（18/9）香港時間23:00開賣，建議一齊上去睇，如果冇，就齋買回程先，去程可以等樂桃劈價或轉買新廉航香港快運，反正佢去程係早機，單程連稅HK$1,055，兩者合計，來回連稅亦只不過HK$1,431，時間仲好過樂桃紅眼零晨機啦！連埋其他航點（包括國內及國際線），樂桃今次全部均一價JPY 1,500，限量15,000張，應該係秒殺格局，記得今晚23:00衝入官網搶喇！以上價錢不包括行李寄艙及飛機餐。

溫馨提示：1. 用Chrome瀏覽器搶飛比較方便，因為佢有Google Translate功能，一按即把日文翻譯回中文；2. 郵政編碼打HK或其他數字都得；3. 未有護照者，可先打000000（或身份證號碼），稍後致電樂桃航空更改（3071 3564），免費嘅；4. 填英文名稱時，必須冇空格（例如您喺CHAN TAI MAN PETER，咁名就打TAIMANPETER）；5. 去程回程分開Book，總數會抵啲架～

網址：www.flypeach.com

（覺得抵請記得按Like同Share俾朋友）

廉航樂桃航空香港飛沖繩？一直只聞樓梯響，但台北飛沖繩呢？樂桃就會於9月正式開航。今晚（12/8）香港時間23:00，樂桃再度大劈台北<->沖繩新航線：單程NT$999起（約HK$260起），來回連稅NT$2,298起（約HK$596起），出發日期為20/9 – 26/10，呢段日子包括香港三個Weekend假：中秋／國慶及重陽節，配合淡季超平香港<->台北機票，玩晒台北 + 沖繩來回機票連稅分分鐘HK$2,000左右，抵玩啦！不過提提您：呢口價喺31/7曾經出現過，供應量不多，今次會唔會添多啲飛？一陣23:00上官網望望（以上樂桃航空機票價格不包行李寄艙及飛機餐）。

網址：www.flypeach.com

（覺得抵請記得按Like同Share俾朋友）

樂桃航空今日除咗加推9月大阪平機票外，今晚11:00起，佢仲首度推出27/10/2013 – 29/3/2014冬天至明年春天早餐盤，單程例價HK$888起，如果識得拆開兩個單程買，回程揀日元結算，可以平多HK$200左右（當幫補下行李費用啦），來回連稅低至HK$2,113起。入唔入得過？如果您堅要去嘅，日子啱心水係可以嘅（大時大節相信唔會平，無謂幻想太多），否則相信更平機票is yet to come。溫馨提示：以上價格唔包行李寄艙同飛機餐；此外如果一陣搶唔到，可能因為太多網友一齊搶票中，如果佢哋最終冇俾錢，系統稍後會放番啲飛出嚟，所以一見唔啱價，唔駛太搶心或冒目見乜價都搶，Keep住按F5，睇下系統會唔會再放番啲平飛出嚟，所以越夜去買，分分鐘仲有驚喜添！

網址：www.flypeach.com

（覺得抵請記得按Like同Share俾朋友）

19:05 2/7 Updated：樂桃航空剛剛加推一批9月份出發飛大阪嘅單程$798平機票，來回連稅最平HK$1,879（不包行李及飛機餐），日子如下：

去程：2, 7, 8, 9, 14/9
回程：1, 6, 7, 8, 14, 15, 27, 28, 29/9

樂桃航空今晚23:00起翻劈大阪9至10月機票，同上次（13/6）幾乎一樣：單程HK$798起，來回連稅HK$1,879起（唔包行李寄艙同飛機餐），出發日期1/9 – 26/10，只限加班機（MM63/64），去程逢週一／六／日以及17/9， 24/9，15/10嘅零晨01:4o出發，回程就逢週五／六／日以及16/9，23/9，14/10嘅晚上22:20出發．提提您：建議大家分開兩程買，香港去大阪用HK$結算，大阪返香港去日本版網站，會再平多HK$200，用嚟幫補下行李費都好吖！除此之外，樂桃國內線都有優惠，其中大阪飛札幌／仙台／鹿兒島單程JPY 3,980（折合HK$322），相當吸引，上次入唔到手者，今晚23:00再搶喇！最後出票日期為2/7 21:59。

網址：www.flypeach.com

（覺得抵請記得按Like同Share俾朋友）

本週二，我哋「又飛啦！」率先同大家報料，話日本樂桃航空將於1/9 – 26/10期間指定日子增加一班來回香港<->大阪班次，今日就正式宣佈新班次有劈價！香港飛大阪單程連稅HK$798起，至於大阪返香港就未有公佈價錢，如果同價，來回連稅估計約HK$1,879起（唔包行李寄艙同飛機餐），出發日期由1/9 – 27/10期間，去程逢週一／六／日以及17/9， 24/9，15/10嘅零晨01:4o出發，回程就逢週五／六／日以及16/9，23/9，14/10嘅晚上22:20出發，今晚香港時間23:00開倉！上次佢劈同一時段出發嘅機票，來回連稅低至HK$1,200左右，今次貴咗六舊，不過唔駛捱超遠期貨，有辣有唔辣囉！提提您：建議大家分開兩程買，香港去大阪用HK$結算，大阪返香港試下去日本版網站，可能會平一啲，以上次經驗，平約HK$100左右，幾個人去，加埋條數分分鐘賺番行李寄艙費添呀！

網址：www.flypeach.com

（覺得抵請記得按Like同Share俾朋友）

急報急報！各位樂桃航空Fans請注意！餓咗好耐嘅大阪超平機票終於返嚟啦！香港飛大阪單程HK$600，來回連稅HK$1,493（不包行李寄艙及飛機餐），出發日期為2/9至26/10。根據樂桃官網講法，本來係今晚香港時間23:00先開倉，但已經被我哋「又飛啦！」率先發現官網已經偷步放出大阪返香港嘅HK$600超平機票！香港去程就未見有HK$600蹤影（最平仲係見到HK$888未連稅），建議大家先入手回程，再喺今晚23:00搶埋去程。其實官網日本版回程賣得仲平，只係5,000日元，連稅6,500日元，折合HK$507，拆開買又平多HK$233！如果唔等得或者擔心去程冇HK$600，可以先去香港版網站照樣買番HK$888機票，回程去日本網站賣，計番條數，其實冇蝕底（去程俾多HK$288，回程慳番HK$233）！起碼Play Safe嘛！咪食飯住，搶咗飛先喇！

網址：www.flypeach.com/hk

（記得按下面「讚好」Share俾Facebook朋友）

樂桃航空今日中午起翻劈春夏大阪機票，單程HK$698起，來回連稅HK$1,699起（不包行李寄艙同飛機餐），出發日期為19/2 – 11/7。Check過系統，HK$698呢口價，去程四月中下旬仲有少量日子（如16/4 – 25/4），回程淨係得11/4同23/4兩日揀，其實四月中大阪仲有少少櫻花睇到，四月尾就冇啦！至於七月暑假頭段，去程仲有3, 4, 9, 10, 11/7，回程只有9, 10, 11/7三日，其實可以飛去玩激安喎！

網址：www.flypeach.com

（記得按下面「讚好」Share俾Facebook朋友）

想飛去大阪睇櫻花？依家要入手啦！樂桃航空今日下午6點起推出早餐盤，出發日期1/3 – 31/5（26/4 – 7/5不適用），單程HK$698，來回連稅HK$1,699。Check過系統，4月櫻花高峰期香港去程有唔少日子HK$698，不過回程得番3/4，5/4，19/4，20/4，24/4呢5日先有HK$698；至於3月尾嘅復活節假期呢？咁當然冇咁平啦！其他日子就有唔少供應。溫馨提示：呢個價係唔包行李寄艙同飛機餐嘅，如有需要就要另外購買。

網址：www.flypeach.com

（記得按下面「讚好」Share俾Facebook朋友）