X
好耐冇同大家講德國漢莎航空，冇他嘅！佢稅項連燃油附加費比一般歐洲航空公司都貴，冇特價一定唔吼佢（除非您去德國，咁佢抵喎），佢終於推出冬春優惠：飛歐洲各大城市，由依家到30/12/2012出發，來回就HK$3,680（未連稅），如果2/1/2013 – 31/3/2013先出發，就進一步減到HK$3,380（未連稅），機票有效期1個月。話就話機票港紙三千幾，事實上佢下欄（稅及油附）仲貴過張機票！直航德國就HK$3.1K，經德國轉飛歐洲城市就起碼HK$3.5-4.5K以上。今次優惠中，最平就係直航慕尼黑（連稅HK$6,396）同法蘭克福（連稅HK$6,522），轉機飛其他歐洲城市一般連稅HK$7K以上，雖然轉機價唔算好筍，但Check過系統，明年3月尾復活節期間出發竟然有呢個價喎！仲要係唔少地點都有添！由於今次劈價覆蓋城市眾多，想知心水歐洲城市有冇平，建議您上佢官網慢慢Check。由於明年復活節同今年一樣中間夾住清明節，請3日假就變出9日長假，復活節一於飛歐洲啦！分分鐘仲平過您飛日韓添呀！
（記得按下面「讚好」Share俾Facebook朋友）
近排有朋友問小弟：想去北歐睇北極光，點樣飛先最抵？查實我都未睇過（亦好想去），所以花時間幫佢做Research，發現原來唔難兼唔貴！尤其係明年農曆新年出發，機票來回連稅都唔過HK$10,000！是咁的，就以北歐其中一個熱門欣賞北極光之城：挪威Tromso為例，香港出發當然冇直航啦！最抵方法就係先搭俄羅斯航空經莫斯科飛去挪威首都奧斯陸，再轉SAS航空飛去Tromso（兩套機票要分開購買）。「羅宋湯」航空不嬲以平霸見稱，Search過系統，明年農曆新年期間出發來回奧斯陸連稅HK$7K左右，至於內陸嗰程就向SAS官網買，來回連稅都係HK$2K咁上下，加埋約HK$9K左右。由於冬天冇乜人去莫斯科，「羅宋湯」航空往往會突然殺出超平筍盤（今年秋冬暫時未有），所以分分鐘仲有得平！如果心急（或想同成班親戚朋友去），不如依家出咗飛先，否則等一等無壞。事實上，睇北極光好睇運氣，因為要視乎當日天氣情況，落雪或厚雲層就睇唔到，不過綜合唔同旅遊專家意見，一至三月都係理想時間：好天就得啦！既然明年農曆新年假特別長，想圓您嘅極光夢？依家要Plan定啦！
俄羅斯航空網址：www.aeroflot.ru
SAS航空網址：www.flysas.com
參考遊記：挪威–實現極光夢(六)極光團
（記得按下面「讚好」Share俾Facebook朋友）
法航之前推出過歐洲冬季優惠，飛各歐洲城市HK$4,150起（未連稅，下同），出發日期為1/10/2012至31/3/2013。如果您唔介意11月後先起程，咁法航可以平多HK$600俾你：除咗直航巴黎維持舊價（HK$4,150起）外，基本上飛歐洲各城市都係HK$3,550起，稅由於要轉機關係，您預HK$3.5K以上，連稅HK$7k頭，仍算係合理偏低水平，如果未搭過法航，可以一試。機票有效期為1個月，最少需逗留5日或橫跨一個週日。想停留巴黎？去或回程俾多HK$750就掂，加埋亦只係HK$4,300起，掃番幾個LB袋乜都抵晒啦！Check過系統，12-1月供應唔少，2月中過完農曆年後至3月都有一定數量，不過月尾貼近復活節連假就冇喇。想知您心水城市有冇特價飛，上佢官網睇睇。
（記得按下面「讚好」Share俾Facebook朋友）
數歐洲平機票，今次終於嚟到英航啦！佢推出冬季筍盤，由3/10至31/12，去英國及一眾歐洲城市來回只需HK$4,380起（未連稅，下同），以倫敦為例，連稅大約您預HK$8K左右，比前幾日報嘅新西蘭航空略貴，不過英航勝在劈價地點繁多，尤其係英倫三寶，除倫敦外仲包埋鴨巴甸、貝爾法斯特、愛丁堡、格拉斯哥、利茲（Leeds Bradford）、曼徹斯特、紐卡素及澤西島。至於歐洲，基本上大路地點必有，冷門嘅建議您直接上官網搵。英航有樣好，佢會順便提供一啲平酒店俾你訂埋，例如倫敦Hilton London Docklands一晚兩人房都只係HK$1,070，巴黎Novotel Paris Tour Eiffel亦只收HK$1,430一晚，兩間都係唔錯嘅4星，呢口價抵呀！記得最後出票日期為25/9，要訂請快手。
（記得按下面「讚好」Share俾Facebook朋友）
呢期劈價焦點轉至長途：最近小弟親身搭過嘅土耳其航空（有埋Flight Report，詳情請睇番FB Page Album），剛晒冷式推出歐洲70條航線早餐盤，淨機票HK$2,990起，連稅一般五千尾六千頭，抵嘅程度拍得住平霸三寶：國航／東航同卡塔爾！出發日期為12/11/2012至28/2/2013（農曆新年6/2/2013 – 11/2/2013除外），最凍時間！機票有效期長達3個月。至於航線同價錢，熱門嘅例如雅典HK$6,210（連稅，下同）、巴塞隆拿HK$6,360、柏林HK$6,460、布達佩斯HK$6,090、開羅HK$6,130、法蘭克福HK$6,610、倫敦HK$7,120、慕尼黑HK$6,520、巴黎HK$6,360、布拉格HK$6,060、羅馬HK$6,040、威尼斯HK$6,020、維也納HK$6,450同埋蘇黎世HK$6,200等等，其他城市請上佢官網睇睇。至於我上次搭嘅豪華經濟艙（Comfort Class），一般比經濟位貴HK$3-4K左右，我就一定俾（長途機嚟講，加呢個價絕對超值），咁您呢？
（記得按下面「讚好」Share俾Facebook朋友）
乜嘢叫「追求性價比」？就係俾同一舊錢，獲得最大享受：呢個就係最佳例子！去歐洲十幾粒鐘，想俾多少少即幫自己Upgrade？土耳其航空幫到您！只要早啲訂佢機票（例如27/9打後出發），揀豪華經濟客位（Comfort Class）只需HK$6,540起（未連稅），竟然仲平過土航嘅經濟客位，全球航空公司得佢先有！其實我哋「又飛啦！」早在上年12月已經講咗土耳其航空呢個「小漏洞」：只要提早訂，即可以經濟客位價錢揀豪華經濟客位。豪華經濟客位係介乎經濟與商務艙之間，座位大啲舒適啲（事實上，佢長達46吋嘅Leg Length係全球同類客艙中最大之一），最緊要係餐飲方面盡量跟足商務艙配備，總之一句：咁既價，抵到爆！連埋稅，飛倫敦HK$11,760，羅馬HK$9,714，巴黎HK$10,033，蘇黎世HK$9,870，巴塞隆拿HK$10,027，比平霸三寶（卡卡／羅宋湯／國航）嘅經濟客位貴三四千左右，但Upgrade喎！相比其他航空公司同級客位（例如英航），起碼平四千以上，所以想豪歎一番又想慳荷包，早訂土航係最Smart方法。小弟今年初就訂咗土航暑假出發飛歐洲，坐豪華經濟客位來回連稅竟然只係HK$8K！依家先訂，起碼HK$20K啦！所以早起鳥兒真係有蟲吃架！
（記得按下面「讚好」Share俾Facebook朋友）
好耐冇提過阿聯酋航空嘅劈價盤，事實上佢好耐都冇晒冷式劈價，依家佢一次過為1/11 – 10/12出發嘅各短／長途3-30日機票盡劈。首先講最近嘅曼谷，特價後經濟艙HK$1,945（連稅，下同），比AirAsia貴七至八舊，但服務質素高九皮，加上佢包埋行李寄艙同飛機餐，點都係抵！商務客位來回HK$4,050，如果學之前教你個招：1程經濟1程頭等（可以喺A380機裡沖涼），來回HK$4,965，小弟試過，阿聯酋頭等絕對物超所值；歐洲方面，去巴黎HK$6,547起、倫敦希斯路HK$7,760、倫敦格域HK$7,492、羅馬HK$6,520、巴塞隆拿HK$7,206，仲有好多數唔晒，自己上官網睇；美洲方面，多倫多HK$10,610（抵坐）、紐約HK$9,800（諗得過，始終股務比東航高廿皮）；至於去Hub杜拜就HK$6,616，直航嚟講算OK抵。雖然全部都劈，不過要小心揀：歐洲11月己經好凍，未必係今次搶貨目標（平過佢嘅，稍後排隊有），反而曼谷同杜拜都減到合理水平，值得19/7限期前出手掃貨。
（記得按下面「讚好」Share俾Facebook朋友）
X