之前錯過咗國泰飛曼谷$990限時劈價？今次補番數，不過係坐皇家約旦航空：由依家到26/9以及4/10 – 31/10出發飛曼谷，2人同行每張淨機票HK$990，連稅HK$1,923，機票有效期7日，比上次5月做GV2個陣貴兩舊幾，但呢個價仍然係市場上呢刻最低個批，勝在佢出發時間都幾正：逢週二、四、六、日先有機，去程夜機21:35出發，放工先出機場，去到曼谷仲係23:25，入埋市區放低行李即去蒲，時間啱啱好；回程搭16:15中午機，返到香港20:05，返到屋企沖埋涼執番行李都唔會太夜。只需請週五一日假，就併出3月3夜旅程，機票咁平，抵請假！呢個特價官網冇，上真旅網就有。

網址：www.travelzen.com

（記得按下面「讚好」Share俾Facebook朋友）

AirAsia好耐冇推出$0機票，聽晚（18/9）零晨又劈啦！講緊嘅係AirAsia明年春夏機票大開倉，出發日期為1/4至30/9，整整六個月長！今次佢分兩個階段推出：首階段係18/9零晨00:00開始賣，全部係國內線機票，部份淨機票$0起（稅同油附梗係要俾啦）！由於航點非常多，建議您上番官網Check價錢。由於AirAsia系統以連稅及油附報價，搵馬來西亞內陸機票時，若然您見到HK$69或76者，都應該係$0機票，唔駛諗，即搶！西馬飛東馬，或東馬飛西馬者，均以HK$126起步，一見呢批貨就唔怕買；泰國國內線方面，所有HK$28者都屬於$0機票，主要集中喺曼谷飛清萊／董里／佛統，清萊抵買啦！最後印尼，HK$5一睇就知等如$0機票，例如峇里去泗水就係HK$5！峇里去雅加達都係HK$147，買定看門口啦！第時夾番張華航香港雅加達平機票就得。至於國際線劈價將會喺20/9零晨00:00開始，詳情稍後報導！

網址：www.airasia.com

（記得按下面「讚好」Share俾Facebook朋友）

今日呢單料勁爆！飛曼谷經濟位有平機票唔係新聞（我哋「又飛啦！」差唔多每個禮拜都有報），但如果我話您知：搭商務客位仲平過經濟位，您一定好驚訝！講緊嘅係斯里蘭卡航空：由依家到年底（除28/9 – 4/10；17/12 – 27/12外），飛曼谷嘅商務客位竟然劈到來回淨機票HK$1,570起，連稅HK$2,256起，機票有效期14日，比其他航空公司嘅商務艙平超過HK$3K！喂！佢A330有180度Flat Bed床架！泰航就算上星期做特價，經濟客位劈盡來回淨機票都要HK$1,480（賣晒添），依家坐商務喎！而斯里蘭卡本身嘅經濟位亦賣緊淨飛HK$1,120，差四舊幾水有得坐商務，連我自己第一眼都好懷疑睇錯！最搞笑係：就算過埋年底，明年坐商務亦只係貴HK$210（HK$1,780，連稅HK$2,467），抵成咁，即刻卜啦！不過平價梗有代價：就係時間麻麻地：逢一／四／六各對開一班，去程開下午18:15/20:00（可以趕入城食埋晚飯），回程開下午13:15/16:55。

網址：www.srilankan.com

（記得按下面「讚好」Share俾Facebook朋友）

AirAsia今晚零晨00:00又開倉，不過只算小至中劈：賣明年3/1至31/3出發，香港飛吉隆坡單程HK$638起（連稅，下同），檳城單程HK$568起，來回連稅你預HK$1.3-1.5K左右，比平時賣六舊以上，預購三至半年嚟講，都值得入貨；澳門出發同樣有優惠，飛吉隆坡單程HK$549起，曼谷單程HK$498起，清邁HK$549起。一如以往，唔會日日有咁平，要自己發掘架！依家立即去官網Check下啦喂！

網址：www.airasia.com

（記得按下面「讚好」Share俾Facebook朋友）

「又飛啦！」一直為大家率先披露泰航A380飛香港事件，今日又有新進展！再度「全港首報」：之前話佢會提早嚟香港（由原定28/10提前至6/10），今次就掉番轉：最後服務日期由原定嘅14/12推遲到明年30/3！換言之有多三個月搭泰航A380！正呀！不過之前提過嘅HK$1,480體驗價就唔會延長（事實上亦被搶得七七八八）。一收到料，我哋立即Check下農曆新年飛曼谷仲有冇A380航班機位先（去程TG601／回程TG600），依家仲有！不過如果想平到淨機票HK$1,870（連稅HK$2,652），就要請1日假：8/2年廿八（週五）搭TG601 13:25起飛，回程初四嘅A380 TG600係有位嘅！不過唔想咁早返（佢開08:00），可以揀番其他航班，價錢一樣HK$1,870，最夜暫時仲有16:00走嘅TG606，請1日假變到5日假都仲有呢口價搭A380，抵到震吖！趁未有人知，快手訂啦！您應該知道農曆新年曼谷機票一向好搶手啦！

網址：www.thaiairways.com

（記得按下面「讚好」Share俾Facebook朋友）

港龍自今年七月起，開辦香港<->清邁直航服務，初期去到九月底為止，但見反應唔錯，港龍已於30/7正式宣佈擴展至全年服務，以後去清邁唔駛經澳門／曼谷轉機啦（當然轉一轉平好多）！呢條線，港龍一直做開HK$2,400（連稅HK$3,183）來回特惠機票，唔係超平，不過鬼叫佢獨市經營，幫你慳番唔少轉機時間喎！Check過系統，呢口價貼近農曆新年大假竟然仲有得賣！例如7/2年廿七（週四）搭KA232 18:35/20:50去，13/2大年初四（週三）搭KA 233 18:20/22:20返，呢一刻仲有！只需請1.5日假，就變出6.5日旅程（週四半日，週五一日，週六假設唔駛返工）。唔想請假？得！多謝您HK$4,480（連稅HK$5,263），相差成HK$2,080，梗係請假抵啲啦！平飛所餘無幾，最緊要快！

網址：www.dragonair.com

（記得按下面「讚好」Share俾Facebook朋友）

5/9更新：據airlineroute 報導，泰航A380曼谷來回香港之服務時間延長至明年30/3止

「又飛啦！」又一隻全港首報！早在21/8，我哋已率先報導泰航將於6/10至14/12派首架A380投入香港<->曼谷航線，原來佢順便靜雞雞減埋價，希望大家以劈頭價體驗全新A380服務！同一段日子（6/10 – 14/12）搭泰航飛曼谷，來回只需HK$1,480（連稅HK$2,246），比官網平HK$220，雖未至於大劈，不過以泰航嚟講，呢個價已接近低線，值得出遊！除咗搭A380航班（去程TG601 13:25/15:05，回程TG600 08:00/11:45），其他航班一樣有呢個價，基本上係冇限制，售完即止。最後出票日期為28/9，機票有效期0-14日，官網未有得賣住，去真旅網啦！

網址：www.travelzen.com

（記得按下面「讚好」Share俾Facebook朋友）

國泰好耐冇做限時劈價，今晚零晨開始佢又開倉喇！今次目的地有三個：曼谷HK$990（未連稅，下同），胡志明市HK$1,790，悉尼HK$3,390，出發日期各有不同：曼谷就1/11 – 14/12（Under HK$1,000搭國泰，合埋雙眼搶啦！），胡志明市1/9 – 30/9（算係Last Minute Offer，比平時平成千蚊），悉尼1/10 – 9/11（春天咋喎！未熱番晒，嗯～～），開倉日期至本週六1/9午夜00:00前。Check過系統，呢一刻曼谷仲有唔少位，早去午返都得（例如去程CX755 09:40/11:25，回程CX754 12:40/16:25），不過好可惜所有週日回程都被國泰Hold起晒！胡志明市就全部都有；悉尼優惠期雖然包括10月及11月，但系統只係放咗10月尾打後嘅飛，唔知點解？Anyway，逢係國泰限時劈價嘅，今晚臨瞓前好搶啦！聽早起身先？唔知仲有冇靚日子呢？

網址：www.cathaypacific.com

（記得按下面「讚好」Share俾Facebook朋友）