嘩！呢篇劈價稿，同「太陽由西邊升起」一樣咁爆！一直以嚟，唔少「又飛啦！」Fans都問蘇梅島有冇平機票，由於只有曼谷航空有直航班次，要佢減，算把啦！蝦！點知佢真係失驚無神嚟個大劈價！曼谷航空推出2人同行優惠，由1/11 – 31/11出發，每人淨機票只需HK$2,690，連稅HK$3,400，比起平時起碼平HK$2,800以上，接近半價！以買蘇梅線散飛嚟講，呢口價簡直係神蹟呀（套票會有，但始終要俾旅行社限死你住邊間酒店，點都唔夠自己直接上官網買咁Free）！不過佢有一啲規定：去程限揀週一／二／三／日，回程限揀週一至六，如果只想玩Weekend就唔得啦！另外航班方面，去程限搭PG806（17:05/19:20），回程限搭PG805（11:35/15:55），時間亦唔算好，不過唔駛轉嚟轉去，加上咁嘅價錢，乜都抵番晒啦！

網址：www.bangkokair.com

（記得按下面「讚好」Share俾Facebook朋友）

尋日介紹農曆新年平機票，今次講番近啲：聖誕節！凍冰冰嘅聖誕，總有人寧願飛東南亞避寒，今年聖誕假喺週二（25/12）及週三（26/12）放，只要請週一平安夜（24/12）假就可以連到5日大假啦！況且某啲公司都會喺平安夜放半日，換言之請半日就得．Check過系統，發現港人勁Like嘅曼谷，仲有筍盤推介：唔係常見嘅非洲／中東航空公司，最平嘅竟然係泰航！只需週五（21/12）放工後搭晚上20:45 TG607飛曼谷，回程Boxing Day週三（26/12）14:00搭TG638返香港，來回官網仲賣緊HK$2,360，連稅HK$3,093，依家AirAsia連稅都要HK$3,182，唔駛講您都知邊個抵！26/12下午機坐位已賣少見少，聖誕節想平飛曼谷就要快手！

網址：www.thaiairways.com

（記得按下面「讚好」Share俾Facebook朋友）

5/9更新：據airlineroute 報導，泰航將A380首航日期由原定的28/10推早到6/10，首飛航線（曼谷->香港）維持不變，而泰航A380曼谷來回香港之服務時間亦延長至明年30/3止

喺香港想搭A380，繼阿聯酋／新航同埋中國南方外，泰航將會加入巨無霸陣型！之前我哋「又飛啦！」都有跟進過泰航首架A380裝配過程，最新消息係呢隻機將會於28/10至14/12執飛香港<->曼谷航線，淨機票價同其他航班一樣：HK$1,700，連稅HK$2,433，不過咪咁開心住：佢執飛航班時間認真麻麻，香港去程TG601 13:25/15:10，曼谷回程TG600 08:00/11:45，對於講求時間嘅旅客就……不過對於一眾飛機迷者，點都要試下卦？事關呢隻A380暫時只會服務香港到14/12咋！15/12起就轉飛曼谷<->法蘭克福，16/1起就曼谷<->東京成田，16/2起就飛曼谷<->巴黎，繼續做親善大使，所以想搭就要快手訂啦～

網址：www.thaiairways.com

（記得按下面「讚好」Share俾Facebook朋友）

唔少「又飛啦！」Fans都想平飛蘇梅島，但直航由於被曼谷航空獨市經營，想佢劈都難（唔劈都爆）！轉機係其中一個平飛蘇梅島方法．其中馬航屬下嘅廉航飛螢航空（Firefly）一向有做吉隆坡蘇邦來往蘇梅島平機票，而11/8起更新增檳城飛蘇梅島，逢二／四／六各對開一班，又多一個平方法去蘇梅島啦！不過可惜來回時間夾唔到AirAsia班次（飛螢檳城飛蘇梅島14:15，回程15:05，而AirAsia香港飛檳城19:05，回港15:40），做唔到即日轉機，算啦！順便玩埋檳城囉！由11/8 – 31/10出發，最平單程馬幣7元起，連稅馬幣199（約港幣HK$520），來回都揀到呢隻Fare嘅話，來回連稅約HK$1,040，仍算唔錯之選，不過check過系統，數量唔多，搵唔搵到睇你彩數啦！

網址：www.fireflyz.com.my

（記得按下面「讚好」Share俾Facebook朋友）

AirAsia逢星期一都會掟一批貨劈一劈，今次目標係由1/11/2012到31/1/2013期間出發嘅機票。香港出發方面，飛曼谷及檳城單程連稅HK$638，澳門出發方面，飛吉隆坡單程連稅MOP638，清邁單程連稅MOP588，只屬一般平，如果咁啱想去呢度者，咪考慮下囉（我又唔信聖誕新年都有呢口價，有就合埋雙眼搶啦）！不過澳門飛曼谷單程連稅MOP398，因為要肉搏微笑泰航，所以冇辦法唯有焗劈。呢個價，澳門Fans仲唔開心咩！今晚零晨00:00開賣啦！

香港出發網址：www.airasia.com

澳門出發網址：www.airasia.com

（記得按下面「讚好」Share俾Facebook朋友）

8月去曼谷？依家訂，未算貴！之前介紹過斯里蘭卡航空HK$1,100（未連稅），仍然有售，不過時間唔就嘅話（佢逢一／四／六先有機），俾多六舊水，泰航原來仲有筍嘢執！官網仲有一批來回HK$1,700（連稅HK$2,468）嘅Special飛，有啲日子都可以做到早去午後返，反而AirAsia依家先訂竟然賣到來回連稅HK$2.5K，仲未包行李寄艙同飛機餐呢？呢隻Fare機票有效期長達1個月，夠長未？暑假想一家大細飛曼谷，泰航啦！唔駛諗！

網址：www.thaiairways.com

（記得按下面「讚好」Share俾Facebook朋友）

25/6我哋「又飛啦！」先介紹過AirAsia推出一批秋季早餐盤，其中包括澳門出發飛曼谷（單程連稅MOP420）。不過一嚟俾泰國微笑航空追住打，另一方面一日4班機來回，澳門咋喎！點都要先去咁啲貨，所以由今日起至8/7，AirAsia再將澳門曼谷線減少少：去程連稅MOP398起，回程連稅MOP444起。雖然每程只係減幾十，但來回只需MOP842（HK$817），又唔係超遠期貨，仲想點？Check過系統，呢一批平飛主要集中喺10月尾11月，澳門朋友，睇啱即食啦！

網址：www.airasia.com

（記得按下面「讚好」Share俾Facebook朋友）

又嚟一個秋季早餐盤情報！今次輪到斯里蘭卡航空，佢推出3日限時劈優惠，由尋日開始到27/6 為止，所有由15/9 – 15/11出發及15/11前回程機票，30日有效期，經濟客位一律減15%，商務客位就減30%（當然稅及油附冇得減）。我哋「又飛啦！」就揀咗兩個熱門城市為例，飛曼谷經濟客位減至HK$1,100，連稅HK$1,786，講真我寧願揀AirAsia（今日佢都減呀），不過商務客位就唔同嘞！機票只需HK$1,660，連稅HK$2,346，嘩！國泰／泰航呢個價連經濟位都冇得坐啦！去馬（留意逢一／四／六先有機）！第二個就係馬爾代夫馬里，經濟客位HK$3,480，連稅HK$4,681，以小弟經驗，咁嘅價可以去馬里，只得佢咋！俾多千五，建議坐商務客位，淨機價HK$5,910，連稅HK$7,111，如果去Honeymoon旅行，梗係坐商務啦！話晒一生一次，豪下好應該吖！

網址：www.srilankan.com

（記得按下面「讚好」Share俾Facebook朋友）