X
飛多倫多機票一向貴爆，直航冇過萬唔駛諗。肯轉機？聯合航空原來有隻筍盤，竟然冇人發現：來回淨機票HK$5,040起，連稅HK$7,789起，去程經芝加哥轉機，回程經紐約紐華克（可惜去程頂盡可以停一日芝加哥，回程冇得Stop Over），連稅唔駛八千飛多倫多，比較罕見。最重要係出發日期去到明年31/07，Check過系統，除咗12月中至1月尾冇之外，由依家一直到明年7月都唔難搵到，當中4月復活節長假以及7月暑假更有唔少日子揀！需要返去探親者，趁冇乜人知，靜靜雞入手喇！機票有效期1個月，最後出票日期31/10。
（覺得抵請記得按Like同Share俾朋友）
如果您係「又飛啦！」老fans，都聽過我哋教大家一個飛紐約嘅慳錢方法：揀飛紐瓦克（EWR）機場，唔好飛甘迺迪（JFK）機場，就以今次介紹嘅聯合航空筍盤為例：30/11前香港直飛紐瓦克機場，來回淨機票HK$5,090起，連稅HK$7,540起，比起直飛甘迺迪機場平二千起，就算您搭最平嘅國航或東航，轉機連稅都要六千尾，依家俾多五六舊就可以坐直航，係咪有睇頭先？Check過系統，呢口價供應量一般，需要去紐約嘅，又唔想再等fanfares機票，呢隻筍盤食得過。機票有效期1個月，最後出票日期為30/10。
（覺得抵請記得按Like同Share俾朋友）
16/8 06:14am Updated：隆重宣佈：漏洞已封！下次再會！
連續兩日都有漏洞價機票，今日輪到阿聯酋航空（仲可以坐A380添）。是咁的：一張正常香港直航來回杜拜嘅機票，搭阿聯酋航空來回連稅約HK$7,000左右，但如果經新加坡飛，來回淨機票竟然平到HK$1,640起，連稅HK$2,086起！仲平過齋去曼谷／台北呀！事實上，呢張漏洞票係由兩家航空公司機票所組成：香港<->新加坡係搭聯合航空，新加坡<->杜拜係搭番阿聯酋航空，究竟係邊張機票出現漏洞，暫時仲係一個迷。阿聯酋官網有得賣，唔駛諗，即卜！
呢張漏洞機票有4大賣點：
1. 所有城市皆可免費中停
2. 新加坡來回杜拜，由於是旦一程須於斯里蘭卡科倫坡中停（另一程可揀直航），您亦可以選擇停埋科倫坡玩，都係免費
2. 有里數儲（Emirates Skywards會藉就計5,500里，其他航空公司要稍後研究（聯合航空嗰程係K Class，阿聯酋航空嗰程係X Class）。
3. 出發日期非常長，暫時搵到10/2013至4/2014都有（不過唔係日日有），機票有效期1個月，夠晒您玩盡新加坡 + 斯里蘭卡 + 杜拜三地
由於出發日期／航班選擇組合極多，除咗附圖嘅例子外，建議大家上番阿聯酋官網慢慢Search，搜尋時記得揀”多個目的地／中途停站”，將每一段航程拆出嚟（例如：1. 香港 -> 新加坡；2. 新加坡 -> 杜拜；3. 杜拜 -> 新加坡；4. 新加坡 -> 香港，如果想玩埋科倫坡，可以改成：1. 香港 -> 新加坡；2. 新加坡 -> 杜拜［去程中停科倫坡都得］；3.杜拜 -> 科倫坡：4. 科倫坡 -> 新加坡；5. 新加坡 -> 香港），再用唔同日子搜尋，香港<->新加坡指定坐聯合航空（UA），搵到淨機票HK$1,640就係出擊目標（俾少少貼士您：新加坡去杜拜如果揀EK355，比較易搵出漏洞價）。
漏洞機票，老規舉：千祈唔好打電話／email問航空公司，以免打草驚蛇！漏洞嘅嘢，手快有手慢冇！
（覺得抵請記得按Like同Share俾朋友）
睇番近排文章，原來我哋好耐冇幫大家搵美國平機票，好啦！今日先嚟隻三藩市：搭聯合航空直航，來回淨機票HK$5,370起，連稅HK$7,668起，機票有效期1個月，出發日期由7/9 – 11/12；24/12 – 27/12；明年13/1 – 28/1；4/2 – 31/3，基本上係淡季標準價。聯合好少突劈長途機票，有心下半年或明年初飛三藩市嘅fans，呢口價甚有參考作用，如果鐘情直航嘅，除非您搏fanfares啦！否則呢個價都值得考慮，官網有售，最後出票日期為31/8。
（覺得抵請記得按Like同Share俾朋友）
今日搶唔到國泰馬爾代夫fanfares？唔緊要！陽光與海灘嘅靚島，世上仲有好多，就好似今次介紹嘅塞班島，8月份暑假超旺季出發，竟然仲有特價飛！搭聯合航空，可免費中停關島，來回連稅HK$6,140起，機票有效期長達45日。Check過系統，供應主要集中喺21/8後出發，如果唔夠假期，齋去關島來回連稅HK$5,610起，慳HK$530，不過建議如果去得嘅話，呢HK$530唔好慳，去埋塞班島啦！提提您：雖然關島同塞班島都係美國托管，持有BNO及特區護照入境係可以享有免簽證逗留45天的（護照有效期須超過6個月）。
（覺得抵請記得按Like同Share俾朋友）
仲有兩個禮拜就係7.1回雞假鳥～～～仲未Plan去邊度好？熱門地方就唔駛諗（例如東京機票連稅要HK$6K以上，點去），平平地嘅，就有今次嘅介紹：搭越南航空飛胡志明市，淨機票HK$1,706，連稅HK$2,436，已經係亞洲區內（唔計大陸）比較合理價錢，不過都有代價：要請週五（28/7）1日假，因為去程係早機07:55，回程週一（7/1）係早機10:40返，計番落就有足3日玩。如果想1日假都唔請呢？得！搭聯合航空，一樣價錢（連稅HK$2,436），週五（28/7）晚搭22:50夜機去，回程週二（2/7）早上05:00返，返到香港08:45，拿拿聲返工，一樣玩足3日而唔駛請假！不過個人認為前者比較實際啲，後者都係留番真係連年假都冇嘅朋友們玩啦！兩套機票都可以去ZUJI訂購。
（覺得抵請記得按Like同Share俾朋友）
聯合航空為慶祝四月份開始香港<->關島航線增至四班（以後逢週一／三／五／六各對開一班直航)，推出特價機票，來回淨機票HK$3,800起，連稅HK$5,040起，機票有效期長達21日，呢口價比較少見。Check過系統，供應量充裕，連六月尾出發都有！回雞假，暑假初，一於去關島陽光與海灘啦喂！最後出發日期為30/6。
（記得按下面「讚好」Share俾Facebook朋友）
19/10我哋「又飛啦！」先報導達美有隻1月份筍盤，單人飛東京都只係HK$1,640（連稅HK$2,506），同級對手聯合必定反擊啦下話～佢就整隻1月份出發（最後出發日期為31/1）嘅筍盤：飛東京來回HK$1,600，連稅只係HK$2,459，比對手平近五十，又係早機去晚機返（去程UA78 10:35/15:40，回程UA79 17:20/21:55），又係單人飛都得，差幾十蚊，揀邊間，自己諗！Check過系統，數量唔太多，要買就上官網睇睇。講開又講，小弟近排有第六感，國泰就嚟推日本劈價飛（都有一排冇做日本航點），尤其係週中限時搶個批，我哋會密切為大家留意國泰最新動向！
（記得按下面「讚好」Share俾Facebook朋友）
X