11/10，我哋「又飛啦！」先介紹馬航將吉隆坡線劈到HK$1,540起（連稅HK$2,352起），點知今日佢又宣佈晒冷式推出更多航點劈價，當中吉隆坡更狠劈到HK$1,180起（連稅HK$1,959起），呢個價係坐日間機（可早去晚返），國泰HK$1,300仲係坐零晨機，雙方距離拉番遠啦！另一方面，近年已極少見到平機票嘅沙巴亦包括在內：來回HK$1,480起（連稅HK$2,259起），不過去程限坐1/12後先新增逢週三及六出發嘅MH427（19:25/22:25週三，20:15/23:25週六），回程限搭MH426（15:30/18:25週三，16:20/19:15週六），時間一般，要週日返港就唔係呢口價。今次劈價仲包括檳城、浮羅交怡，澳洲悉尼、墨爾本、柏斯、阿德萊德、布利斯班（連稅$5,367起，都OK抵），仲有馬爾代夫呢！HK$2,380起，連稅HK$5,036，最正係佢喺吉隆坡駁機時間唔耐，來回各10-11小時，都仲有呢口靚價，去馬！最後一句：官網雖然已見宣傳（比Zuji平HK$40），但直到執筆一刻（09:45am 15/10）都未正式開賣，反而Zuji有喎！

留意位：

1. 出發日期：18/10 – 12/12，27/12 – 31/1

2. 機票有效期：14日（馬來西亞線）／30日（馬爾代夫、澳洲、印度）

3. 最後出票日期：29/10

馬航官網：www.mas.com.my

Zuji：www.zuji.com.hk

（記得按下面「讚好」Share俾Facebook朋友）

國泰有一排冇出馬來西亞平機票，近期一次過推出檳城同吉隆坡Offer，出發日期到30/11，2-7日有效期，不過有辣有唔辣：飛檳城來回HK$1,700（連稅HK$2,479），冇航班限制，您大可揀早去午返（去程CX633，早上07:55（二／四）或08:20（六）出發；回程CX634 13:00返），雖然比AirAsia貴，但時間靚仔仍有競爭力（上次做Promo就HK$1,600，今次加$100）。不過吉隆坡就……雖然話來回HK$1,300啫（連稅HK$2,079）！但去程焗您坐深夜紅眼機CX791（01:30/05:10），五點幾去到吉隆坡？唔湯唔水啦！搭的士入市中心又要捱附加費，機鐵又未開！究竟有幾多人肯制呢？唔想捱紅眼機？俾多HK$400就可以，回程就冇航班限制，視乎供應。

網址：www.cathaypacific.com

（記得按下面「讚好」Share俾Facebook朋友）

上週因為劈價太細而俾網民鬧爆嘅AirAsia，今日又嚟一個秋冬小劈：飛檳城單程連稅HK$658起，曼谷單程連稅HK$799起，出發日期為1/10 – 31/12，算係即買即飛，但個價只係貴過上週劈超遠期貨少少而已，唔怪得俾網民狂炳啦！Check過系統，呢批機票數量唔多，飛檳城去程得：8,9,11/10、21,24,27,29,30/11、4/12，回程竟然只得17/12一日咁大把！係咪AirAsia未放飛？曼谷就好啲，來回日子都有唔少選擇（當然回程早上06:30大把平飛，您唔會吼掛）。順帶一提，可能AirAsia見上週開倉賣得唔好，佢暗地裡又放番啲平飛，至於邊啲日子同城市有平，不妨自己上番官網慢慢Search。

網址：www.airasia.com

（記得按下面「讚好」Share俾Facebook朋友）

我哋「又飛啦！」曾經喺15/5報導過，AirAsia當時劈售明年春天機票，香港出發唔算超筍，點知今晚00:00開賣嘅1/4/2013 – 30/9/2013出發嘅超遠期貨，一樣唔筍，仲貴咗啲添！先講票價：香港出發，去曼谷（連稅，下同）單程HK$598起（上次HK$498起），來回HK$1,114起（上次HK$1,025起）；布吉HK$638起（上次HK$538起），來回HK$1,326起（上次HK$1,065起）；馬來西亞檳城／沙巴／吉隆坡單程HK$568起（上次HK$498起），來回HK$1,016起（上次HK$876起），搭AirAsia X經吉隆坡轉機往澳洲三城（墨爾本／黃金海岸／珀斯）單程HK$1,394起（上次HK$1,422起），來回HK$3,476起（上次HK$3,452起）；至於澳門出發，飛清邁單程MOP428起（上次MOP288起），來回MOP907起（上次MOP669起）；曼谷／吉隆坡單程MOP528起（上次MOP438起），來回MOP989起（上次MOP827起）；搭AirAsia X經吉隆坡轉機飛墨爾本或珀斯，單程MOP1,389起（同上次一樣），來回MOP3,533起（上次MOP3,481起），以預購超過7個月AirAsia機票嚟講，唔算要即刻郁手個隻，除非您一早已Plan好去旅行，否則有時等佢Last Minute劈價仲實際（雖然價錢會比今次開倉略貴）。不過同上次一樣：澳門朋友如果想飛澳洲就要郁手啦！事關選擇冇香港咁多，呢個價值得去馬。

網址：www.airasia.com

（記得按下面「讚好」Share俾Facebook朋友）

AirAsia好耐冇推出$0機票，聽晚（18/9）零晨又劈啦！講緊嘅係AirAsia明年春夏機票大開倉，出發日期為1/4至30/9，整整六個月長！今次佢分兩個階段推出：首階段係18/9零晨00:00開始賣，全部係國內線機票，部份淨機票$0起（稅同油附梗係要俾啦）！由於航點非常多，建議您上番官網Check價錢。由於AirAsia系統以連稅及油附報價，搵馬來西亞內陸機票時，若然您見到HK$69或76者，都應該係$0機票，唔駛諗，即搶！西馬飛東馬，或東馬飛西馬者，均以HK$126起步，一見呢批貨就唔怕買；泰國國內線方面，所有HK$28者都屬於$0機票，主要集中喺曼谷飛清萊／董里／佛統，清萊抵買啦！最後印尼，HK$5一睇就知等如$0機票，例如峇里去泗水就係HK$5！峇里去雅加達都係HK$147，買定看門口啦！第時夾番張華航香港雅加達平機票就得。至於國際線劈價將會喺20/9零晨00:00開始，詳情稍後報導！

網址：www.airasia.com

（記得按下面「讚好」Share俾Facebook朋友）

馬航好耐都冇郁手，今日趁馬來西亞立國55週年紀念，將旗下馬來西亞航線劈劈劈！云云眾多航線中，首推吉隆坡！淨機票劈到HK$1,490，連稅HK$2,212，同AirAsia差唔多！仲要可以揀早去晚返：去程MH79 08:45/12:25，回程MH78 19:15/23:05。至於其他城市，係就有，不過唔太抵，其中沙巴馬航聲稱來回淨飛HK$1,955，但Check過系統唔見有（您搵到不妨通知聲）；檳城馬航本身冇直航，只係靠同國泰代碼共享先有直航班次，不過個啲就冇得減。想知飛其他馬來西亞城市有幾劈法，不如上佢官網Look Look。

留意位：

1. 最後出票日期：17/9

2. 出發日期：27/8 – 27/9；2/10 – 10/11

3. 機票有效期：14日（最遲須出發日前7日訂購）

網址：www.mas.com.my

（記得按下面「讚好」Share俾Facebook朋友）

AirAsia逢星期一都會掟一批貨劈一劈，今次目標係由1/11/2012到31/1/2013期間出發嘅機票。香港出發方面，飛曼谷及檳城單程連稅HK$638，澳門出發方面，飛吉隆坡單程連稅MOP638，清邁單程連稅MOP588，只屬一般平，如果咁啱想去呢度者，咪考慮下囉（我又唔信聖誕新年都有呢口價，有就合埋雙眼搶啦）！不過澳門飛曼谷單程連稅MOP398，因為要肉搏微笑泰航，所以冇辦法唯有焗劈。呢個價，澳門Fans仲唔開心咩！今晚零晨00:00開賣啦！

香港出發網址：www.airasia.com

澳門出發網址：www.airasia.com

（記得按下面「讚好」Share俾Facebook朋友）

AirAsia由聽日（4/6）至17/6會推出一批暑假Last Minute平機票（出發日期為11/6 – 10/8），似乎改變佢一向早訂先平嘅銷售模式喎！特價航線覆蓋雖然非常之多，只可惜：竟然唔包香港來回航線！反而澳門同廣洲有。以澳門為例，飛吉隆坡單程連稅約HK$730，飛泰國曼谷HK$705，清邁HK$760，比依家系統所賣價每程平三百蚊左右，來回差六舊，爭好遠啦！澳門Fans一定開心死，不過我估計呢啲平飛唔會有太多供應（始終都係Last Minute，仲要係暑假），到時自己去發掘啦！香港朋友唔介意渡江出發，都值得諗下，就算唔吼澳門，都可以諗下佢其他航點優惠吖！

網址：www.airasia.com

（記得按下面「讚好」Share俾Facebook朋友）