AirAsia今日公佈一系列新舉動，除咗展示以亞洲為本嘅企業新形象，以及週末空服人員新制服外（男女會改穿牛仔褲，增加Weekend氣息），當然仲有大家至關心嘅平機票優惠啦！今次唔止平，仲有啲直頭唔駛錢（當然要俾油附）！國際航線平機票將會於下週三16/5 零晨00:00正式開倉，而馬來西亞／泰國／印尼嘅國內線會率先於下週一14/5 零晨00:00推出。至於包括邊啲航線，AirAsia話會喺明日週六下午公佈，估計樣樣都有架啦！出發時間為明年4/1/2013 – 22/5/2013遠期期貨。不過都係個句：根據近年AirAsia開倉經驗，佢啲筍盤通常集中Weekday，大時大節更免問，所以估計到時唔會太多網友搶到心水飛（Server一定爆硬），有就有，冇就隨緣啦各位旅遊師主～～～～

呀！仲有仲有！AirAsia X 又公佈一條新航線，呢次係吉隆坡飛北京！22/6起啟航，以取代天津航線。北京去程開紅眼機零晨02:50！咁突然嘅舉動，好多強國網友都喺新浪微博鬧爆AirAsia冇特別善後～～～其實係人都知，AirAsia不嬲以天津為北京之輔助航點，既然主角有著落，做阿二光榮謝幕，唔出奇，只係點解唔做一至兩個月嘅Parallel Run？

網址：www.airasia.com

（記得按下面「讚好」Share俾Facebook朋友）

AirAsia今晚00:00起會推出一系列全新早餐盤，由1/10/2012 – 31/1/2013出發，香港出發飛曼谷／檳城單程連稅HK$525起（來回連稅約HK$1,049），飛沙巴／吉隆坡單程連稅HK$625起 （來回連稅約HK$1,154），經吉隆坡轉機飛澳洲，珀斯單程連稅HK$1,567 （來回連稅約HK$4,035），墨爾本／黃金海岸單程連稅HK$1,831（來回連稅約HK$4,726），同新廉航Scoot有得Flight！至於澳門朋友，梗有你份！澳門飛曼谷／清邁單程連稅MOP335起（來回連稅約MOP764），吉隆坡單程連稅MOP565起（來回連稅約MOP1,109），抵到無朋友！仲有東南亞城市短途對飛優惠，今晚00:00一於趁開倉搶飛啦！（不過據經驗，呢啲平飛唔會日日都包括，究竟邊日有邊日冇？一陣開倉自己睇）

留意位：

1. 最後出票日期：1/4

2. 出發日期：1/10 – 31/1

3. 以上所有價錢均為連稅

網址：www.airasia.com

（記得按下面「讚好」Share俾Facebook朋友）

一眾施主，搶糧啦喂！今晚凌晨00:00 AirAsia正式開倉，大賣出發日期為11/9至明年31/1嘅秋冬早餐盤。香港飛吉隆坡單程$143（來回連稅HK$818）；檳城HK$163（來回連稅HK$981）；沙巴／曼谷／布吉單程HK$193（來回連稅HK$843）；搭AirAsia X經吉隆坡轉飛墨爾本單程HK$405（來回連稅HK$3,157）；黃金海岸HK$471（來回連稅HK$3,158）；珀斯HK$289（未回連稅HK$3,026）。之前同大家分析過，東南亞冇連稅八九舊就唔好去馬，剛剛就符合我哋要求，咁梗係堅搶啦！特別係一眾澳洲筍盤，連稅三千頭，喂講真吖，香港直航啲稅都要你二千幾呀陰公！仲有其他馬來西亞／曼谷出發嘅航點，有啲短途航線都係$0，依家去以下網址Check下價錢先，今晚早啲返屋企捕佢開倉喇！一次過開手機／iPad／電腦狂轟啦～～～

網址：www.airasia.com

（記得按下面「讚好」Share俾Facebook朋友）

AirAsia耐唔耐都會曬冷式推出超平早餐盤（以往就大把$0機票賣，依家已經無呢支歌仔唱喇），前幾日佢又喺Facebook度預告本週三凌晨00:00再度開倉。今次會推出出發日期為10/2012至3/2013年嘅早餐筍盤，價錢同地點應該今日內公佈，放心，我哋會同大家講架啦！總之星期二晚早啲返屋企，等凌晨00:00開倉啦！不過事實上，AirAsia近年已經學似一般航空公司咁推出Last Minute（例如出發日1-2個月內）平機票，有時分分鐘唔貴得幾多。我哋覺得如果開倉價飛曼谷／吉隆坡連稅HK$700/800，或者大節日港紙千鬆啲有找，咁買定先冇壞，否則只係差幾百蚊，忍下手好啲，因為改期費用仲貴過買新機票，以玩AirAsia遊戲嚟講，唔化算囉！

（記得按下面「讚好」Share俾Facebook朋友）

呢排報咗唔少航空公司2至3月淡季筍盤，又點會少得AirAsia個份？好多航線都有得平，例如香港飛曼谷約HK$688（單程連稅，下同）啦，曼谷南落布吉抑或北上清邁同樣HK$256；吉隆坡飛峇里就HK$418，落新加坡平到HK$129（平到痴根～）；總之大把Offer你不如上佢官網睇睇。順帶一提，AirAsia X都推出咗香港經吉隆坡轉機飛珀斯（HK$1,526）／墨爾本（HK$1,656）／黃金海岸（HK$1,656）／基督城（HK$2,350）優惠，雖然出發日期為1/5 – 30/6係秋天接近入冬時間，不過叫起手要去嘅，呢個價堅抵。

留意位

1. AirAsia亞洲區2 – 3月優惠：訂位日期至8/2，出發日期至31/3

2. AirAsia X 5-6月優惠：訂位日期至14/2，出發日期1/5 – 30/6

網址：www.airasia.com

（記得按下面「讚好」Share俾Facebook朋友）

出得急報，梗係超筍！AirAsia X為慶祝新航線：吉隆坡<->悉尼於1/4開通，今早開始靜雞雞推出首航優惠，單程連稅約HK$523起，來回連稅約HK$1423.5起，如果你好彩夾到香港<->吉隆坡平機票（呢張你預連稅HK$1.5K），加埋分分鐘港紙三千有找，抵到爆啦（因為香港直航悉尼稅都要二千幾）！依家先開賣，官網首頁未有廣告Banner，趁依家冇乜人知，閃訂！不過要留意，回程時間係夾唔到即日返香港嘅（悉尼返到吉隆坡約下午5:30，最後一班返香港／澳門機係四點幾走），咁咪索性留喺吉隆坡玩多一陣先走囉！去程就冇問題一定夾到，因為佢開夜機23:40。

留意位：

1. 出發日期：1/4 – 30/6

2. 最後出票日期：22/1

網址：www.airasia.com

（記得按下面「讚好」Share俾Facebook朋友）

又係AirAsia，今日又有新消息！不過係壞消息。

AirAsia宣佈，由下個月21/9/2011（GMT+8）起，訂購馬來西亞亞航（AK）及AirAsia X（D7）嘅旅客，如需使用AirAsia機場櫃位辦理登機手續，佢會收你每人馬幣10蚊（=HK$30）手續費。之前訂飛嘅客（就算出發日期係21/9/2011後）全部不受影響。登機手續費適用於馬來西亞亞航（AK）所有航點（即包括香港出發去馬來西亞）。至於AirAsia X （D7）除咗日本東京羽田機場、大阪關西國際機場、韓國仁川國際機場同伊朗德克蘭國際機場外，其他航點用櫃台Check-in都會收你手續費。即係話，假設你由吉隆坡搭AirAsia X （D7）去德克蘭，係吉隆坡LCCT櫃台Check-in就會收你HK$30，而回程喺德克蘭就唔收（好奇怪！）。

慶幸嘅係，好多香港人搭嘅泰國亞航（FD）未受影響，繼續提供免費櫃台登機服務（不過遲早都收啦）。總之駛唔駛俾錢，就睇下你買嘅AirAsia係 under 邊間子公司（AK/FD/D7…）。

想慳番呢幾十蚊，就要使用網上或手機登機服務。喺起飛前1小時（AK） / 4小時（D7），都可免費網上Check-in，搞掂後Print番張登機証出嚟就掂。你有行李寄倉，記得拎埋張登機証去Baggage Drop Off櫃台辦理（雖然唔駛俾HK$30，但你都必須喺出發前先去airasia.com 網上購買’加碼行李’服務）。

呢單嘢最慘嘅係，你冇Printer一定要焗俾HK$30！因為AirAsia喺香港機場仲未設有手機 Mobile 2D bar code 掃瞄器同Kiosk，一定要靠張紙登機証上機。不過好在AirAsia依家改咗Check-in政策，最長出發前400日至1小時（AK航班）/4小時（D7航班）已可以做網上check-in，喺香港一次過做晒兩程機位，只係到時你唔見咗張登機証就煩囉～～～

詳情請瀏覽：www.airasia.com

（記得按下面「讚好」Share俾Facebook朋友）