作為「又飛啦！」Fans，梗係想日日都有平機票啦！之不過油價呢幾個月升到澎澎聲，某啲航空公司已經頂唔住。印度三間主要航空公司：包括印度航空／翠鳥航空（Kingfisher）同埋捷達航空（Jet Airways）最近已向印度政府求助，皆因銀行已經唔再借錢俾佢哋，周轉不靈危機已殺到埋身。就以翠鳥為例（其實早在上年16/8，我哋已經報導佢冇錢出糧），機師已大舉罷工，唔少航線因為唔夠機師而被迫取消或縮減班次（包括12/3 – 4/4期間臨時取消香港<->孟買航線），而印度航空機師亦要求資方出糧，否則威脅1/4發動罷工。雖然好少「又飛啦！」Fans會飛印度，但由於唔少人會貪平選擇印度航空飛首爾／大阪，又或者搭捷達航空飛歐洲地區（的確佢呢排做得幾平），未買飛者，呢期最好避一避。

新聞來源：aviationnewsdaily.com

（記得按下面「讚好」Share俾Facebook朋友）

我哋知道印尼唔係大家嘅至愛（峇里除外），不過有平嘢點都要講一講（尤其係呢排2-3月筍盤真係差唔多，4月復活節假後又未出）。華航每日有一班來回首都雅加達（實情係台北經香港飛雅加達），呢張機票最近劈到HK$1,700左右，總之連稅就HK$2,243，唔係日日都有，最好自己上佢官網查，而有效期都幾長。不過提一提你，佢回程時間勁早：06:30！介意者請勿考慮，或者用嚟買俾工人回鄉探親用。

留意位：

1. 機票有效期：30日

2. 出發日期：20/2 – 2/4；8/4 – 12/7；20/8 – 22/12

網址：www.china-airlines.com

（記得按下面「讚好」Share俾Facebook朋友）

呢幾日係咁講啲平過HK$1,000嘅機票優惠，原來仲有隻冇乜人知嘅平飛！搭港航飛海南島海口市（唔係三亞），如果肯搭夜機HX157（依家到4/2開22:35/23:55，不過5/2之後開20:40/21:50，早番兩個鐘好好多），來回只係HK$860！連埋稅就HK$1,502。不過請記住，去海口以市內旅遊為主，想陽光與海灘就請去三亞。唔似去三亞通常留喺Resort咁悶，去海口你大可以行街街食餐飽，特別推薦去金龍路美食街，有個1+1餃子廣場，食到你暈，都平死人。

留意位：

1. 最後出發日期：29/3

2. 機票有效期：2 – 14日

3. 去程限搭HX157

網址：www.hongkongairlines.com

（記得按下面「讚好」Share俾Facebook朋友）

我哋曾經介紹過搭國泰廣州飛杜拜只需HK$1,860，嫌煩走車勞動想香港出發？呢隻筍盤要留意！經一起飛旅遊網訂飛，搭國泰直航杜拜或者阿布扎比，來回只需HK$3,913起（未連稅），係就貴咗成二千，不過對時間寶貴又怕煩嘅人，都要俾架啦！官網未出，出發日期去到31/3，出票最後日期為29/2，有效期2日至1個月。

網址：hk.yiqifei.com

（記得按下面「讚好」Share俾Facebook朋友）

好耐冇同大家分享一啲旅遊慳錢小秘技喇！今次就教「又飛啦！」Fans如何喺訂購AirAsia機票時賺取額外折扣！呢個小秘技，唔係之前報過嘅「絕密通道」：呢個方法絕對公開，就係：將來回兩程飛分開訂！唔好揀來回一齊Book，喺某啲情況下，可以幫你慳番7-10%。就以今個復活節旅遊高峰期（即6/4去，9/4返）為例，飛吉隆坡者，如果揀來回一齊訂，回程機票大約由馬幣472.05至610.91不等（其實佢會用港元報價，不過為求容易對比，我哋特別將之換算成馬幣），但如果你分開來回咁訂，去程價錢一樣，回程你會發現全部平7.7%左右（請見以下附圖）。點解會係咁？因為航空公司會跟據唔同地方做唔同Pricing，呢個例子，正好顯示AirAsia喺馬來西亞市場嘅定價較香港為低。當然唔係度度地方Pricing會比香港便宜，亦唔係所有時間都係咁，例如曼谷，我哋試過分開咁訂，仲會貴過一齊訂少少添！所以以後訂AirAsia，不妨做多少少功夫：先揀選來回，睇睇回程價係幾多，然後再Search by 單程回程，睇下兩者有冇差別，如果有就分開訂，冇咪訂來回囉！

網址：www.airasia.com

（記得按下面「讚好」Share俾Facebook朋友）

上年9月提過捷達航空（Jet Airways）飛印度新德里同孟買兩大城市，只需HK$2,096（未連稅，下同），抵過國泰一半有多；事實上，依家上國泰官網訂印度啲飛都冇特價（例如孟買，夠膽死Quote你HK$9,xxx），不過佢最近批俾旅行社有特價喎！去番一起飛訂，飛新德里、孟買、班加羅爾三大城市，來回只係HK$2,813，同捷達距離拉近到只有八舊水，咁就有計傾喇！出票日期到15/1為止，出發日期為2/1至31/3。

網址：hk.yiqifei.com

（記得按下面「讚好」Share俾Facebook朋友）

印尼峇里島都算係熱門旅遊點之一，之不過直航機票貴到出汁，齋機票分分鐘過HK$4K，要平唯有轉機，但飛亞洲區都要轉機咁鬼煩！Citibank依家有個特惠，用PremierMiles卡訂購印尼嘉魯達航空，直航去印尼峇里、雅加達，以及轉機去澳洲悉尼、墨爾本、珀斯做緊買1送1優惠，不過Check過價錢，只有飛峇里島最值得推介（其他個啲都有其他平機票選擇），買2張HK$6,000，連埋稅每人只需HK$3,610，平過自己散訂HK$1,200左右，以直航嚟講幾抵啦！當然來回時間就麻麻地，去程15:45/20:40，回程10:00/14:45，冇辦法，世事總無完美！

留意位：

1. 最後出發日期：31/3（農曆新年已全Full唔駛諗）

2. 卡主必須為同遊人士（就算朋友幫你買，佢必須係同遊人士）

查詢電話：2921 6288 永安旅遊 / 3665 9100 西敏寺旅遊

（記得按下面「讚好」Share俾Facebook朋友）