頭先同大家講國泰飛歐洲嘅秋冬Offer。呢啲著數係人都知（因為國泰都賣行廣告），咁鮮為人知個啲呢？今次獨家爆料俾你！

大家都知道，今年秋冬，國泰推出咗洛杉磯、三藩市、溫哥華同多倫多特價機票，但如果你肯喺大陸出發，可以再幫你慳幾千！

尋日，國泰推出咗重慶出發嘅美洲特價機票。由重慶出發去紐約、三藩市、洛杉磯、溫哥華（經香港），最平CNY3,890起（未連稅，下同），機票有效期係3個月！旅遊日期必須為13/9至31/12 。

重慶 – 香港 – 紐約  CNY4,690（HK$5,628，香港出發賣緊HK$7,500）

重慶 – 香港 – 洛杉磯/三藩市  CNY4,150（HK$4,980，香港出發賣緊HK$5,160）

重慶 – 香港 – 溫哥華  CNY3,890（HK$4,668，香港出發賣緊HK$6740）

一睇個價，洛杉磯同三藩市因為香港都有平盤而變得唔吸引。紐約同溫哥華長期冇得減，呢口價真係流晒口水～特別係需要停留耐一啲嘅旅客，因為香港出發嘅平機票，頂盡都係1個月有效期，3個月機票就極少有得減。

不過你會話：嘩！咁點去重慶先？其實去重慶買單程機票唔貴呀！深圳出發個啲都係幾舊水包晒，係就辛苦啲，但可以先去重慶玩幾日，然後出發去紐約，一次兩遊。回程返香港直接入境，唔返重慶。

呢啲特價飛需要喺大陸旅遊網買，「一起飛」呢間國內網上旅行社我幫襯過，冇乜問題，起碼喺香港有辦事處，有人接聽電話（雖然要講普通話），況且有香港旅行社牌照，信得過。

訂票網站：hk.yiqifei.com

（記得按下面「讚好」Share俾Facebook朋友）

繼日本後，國泰今日又曬冷！一次過盡推佢歐洲直航平機票，去倫敦、法蘭克福、米蘭、巴黎、羅馬、阿姆斯特丹都係HK$4,990起。Check過系統，呢批HK$4,990飛喺秋天真係限量供應，倫敦最快去到11月先有；其他地方10月只有少量供應。11月開始則任訂唔嬲，但個陣歐洲已經日短夜長兼開始凍囉……

留意位

1. 出發日期：20/9/2011 – 31/12/2011；10/1/2012 – 19/1/2012；28/1/2012 – 31/3/2012

2. 優惠期：10/9/2011

3. 最短/最長逗留期限：2日/2個月

4. 連稅最低價：倫敦HK$8,555；法蘭克福HK$8,106；米蘭HK$7,385；巴黎HK$8,627；羅馬HK$7,398；阿姆斯特丹HK$7,530

5. 機票只適用於香港來回倫敦、阿姆斯特丹、法蘭克福 、米蘭 、巴黎 、羅馬之國泰航空航班及倫敦來回其他城市之英國航空航班；倫敦來回歐洲其他城市之英國航空、西班牙國家航空及匈牙利航空航班

網址：www.cathaypacific.com

（記得按下面「讚好」Share俾Facebook朋友）

有一單新鮮滾熱辣嘅國際航空大事，比今日股市跌千點仲爆！

AirAsia同馬航今日聯合宣佈，簽署合作戰略協議，從此結束互鬥多年嘅局面。根據協議，雙方會以股份互控方式，馬航大股東「國庫控股」（ Khazana）將會持有10%AirAsia，而AirAsia母公司Tune Air將會持有馬航20.5%股份。此外雙方小股東將免費獲發認股權證，馬航小股東將以30股送1股AirAsia認購證，而AirAsia小股東則以10股送1股馬航認購證。而馬航原本CEO就今日正式起身。

雙方表示今次協議有助減低營運成本，喺購買飛機、維修、地勤、貨運、餐飲、員工訓練等加強合作，避免再互相競爭。當地分析師估計雙方合作每年可以帶嚟超過26億港元嘅協同效益。

喺航線方面，馬航同意日後集中高端航運業務，以後廉航服務就俾晒AirAsia，所以旗下廉航Firefly將會「光榮結業」。我相信正係AirAsia肯同馬航合作原因，事關近年Firefly已不斷透過超低價機票，食晒AirAsia喺東馬市場，而且成本高昂一直困擾AirAsia，今次合作，既可保住自己大半江山，又可藉共用資源減輕成本，有So吖！而馬航方面，可以專心發展Full Service Carrier又可收復老對手，梗係Happy啦！

不過班員工就慘囉！合併呢家嘢，你估1+1=2咩？馬航同AirAsia根本係兩家唔同文化公司嚟，一家係老爺式半政府機構，乜嘢都講架構論資排輩；AirAsia就活力十足，鼓勵員工創新，所以員工大部份係後生仔女。叫佢地工作上合作喎！點頂呀？

至於一般「旅民」，呢單嘢究竟是禍是福，唔可以咁快下定論住。當然合併後馬來西亞航空業會重回壟斷局面，喺冇競爭下，低票價（甚至$0票價）會唔會成為歷史？但另一方面，近年環球航空業成本激增（尤其係燃油），加上新一輪經濟衰退已迫在眼前，雙方繼續鬥只會兩敗俱傷，甚至倒閉。反正今次合作戰略協議有效期為5年（5年後可以再續5年），依家試婚先，睇定啲，長遠計未必壞事。

新聞稿：http://www.khazanah.com.my/docs/JointPressRelease-090811.pdf

（記得按下面「讚好」Share俾Facebook朋友）

中國國航為慶祝佢首架777-300ER投入服務，喺7月尾起至8月底喺網上搞咗個「國航飛機我命名」徵名大賽，勝出者可以幫佢首架777-300ER命名，而國航亦會送出8套雙人來回機票及精美紀念品俾富創意嘅網民。本來係一件「低成本、高效益」嘅Online Marketing Campaign，只可惜活動欠細心策劃，引發唔少網民批評。

1. 忽略做票

由於只有微博用戶先可投票，而開戶絕無難度（國內有唔少「空帳戶」、「假粉絲」），結果引發大量假票，搞到國航拿拿林關閉投票，將疑似做馬嘅票數「歸零」，然後重開投票，但已經引起唔少網民怨聲載道大呼投票唔公平。

2. 突然改變玩法

8月6日前，本來實行1位微博用戶/1命名/5票/1天，希望多啲票數從而帶動更多轉發機會，但8月6日後重開投票後，即刻改番1位微博用戶/1命名/1票/1天，咁對於本來票數少嘅網民唔公平，因為依家只得1票，任啲Friend點投都追唔到前領者啦！

3. 真係改乜都得？

表面上任你改名，即改即上載俾人投票，結果有啲名無耐就被人「河蟹」。由於總冠軍以票數定勝負，唔少網民覺得國航你既然咁怕啲敏感字眼（如「動車號」）羸出，咁不如一早就用「專業評審」（咁即係內定？）定勝負算吧！駛乜扮晒開明咁核突？

4. 揀錯獎品？

活動大獎係1張雙人來回德國法蘭克福機票，另有3張雙人來回日本沖繩機票作抽獎用。有憤青話日本同德國都曾經對中國人民情感帶嚟傷害，作為代表國家嘅航空公司，唔應該送呢啲地方嘅機票喎！

活動網址：http://client.sina.com.cn/zt/airchina/index.shtml

（記得按下面「讚好」Share俾Facebook朋友）