今日講完長榮機師可以玩iPad，不如又睇下長榮最近有乜筍盤吖！例牌菜台北來回，0-14天有效期，8月出發HK$1,620（未連稅，下同），任你搭邊班都得；26/8至31/10就睇供應而定，價錢由HK$1,320至HK$1,620，但去程限搭BR892（09:50）/852（11:10）/868（13:45）/858（21:00），有早有夜，各取所需，唔錯呀！條款有寫：訂位艙等R/U艙不適用於累計哩程及於機場申請當日機位升等。據小弟所知，長榮Upgrade客要求有時都幾寬鬆，我試過喺台北拎住張長榮U Class Code飛竟然Upgrade我上Business Class！所以唔駛太介意張飛係乜嘢Class Code，話唔定臨場有驚喜！

網址：www.evaair.com

（記得按下面「讚好」Share俾Facebook朋友）

今日AirAsia X又預售下年長途線平機票，出發日期為17/4/2012至10/9/2012（即係搭正旅遊旺季），有晒所有航點。吉隆坡來回澳洲全包HK$2,000有找，不過個陣係冬天吸引力一般。最正當然係飛英國同法國，由吉隆坡飛來回連稅全包收你HK$3,900左右（Check過系統，暑假7至8月仲有）。

AirAsia自從宣佈今年24/10起去倫敦改飛Gatwick格域機場後，吸引力頓然大增，因為個度大把廉航進駐，駁機去歐洲其他城市非常方便。暑假去歐洲，機票一向貴到驚人，香港出發想平都難。AirAsia明顯係一眾想平遊歐洲嘅救星！嫌太早決定？早起鳥兒先有蟲吃嘛！

網址：www.airasia.com

（記得按下面「讚好」Share俾Facebook朋友）

機師一路揸飛機一路玩iPad？仲要攞正牌？真架！長榮為咗方便一眾機師，唔駛次次拎咁大個喼返工（包括重疊疊嘅飛行操作手冊、航空圖、基本配備清單同埋航空日誌等資料），自上個月起已陸續派800台iPad俾機師，裡面裝晒長榮專用Apps，咁機師以後只要一按就睇到飛行操作手冊電子書，又可以用iPad寫飛行報告，一按就Send返台灣總公司。而其他飛行資訊如個人班表、機隊公告、航圖、天氣資訊亦可以一按即有，聽落去真係幾方便！況且減輕飛機重量，長榮又可以慳下油，絕對一舉兩得。

長榮見機師反應唔錯，話會喺今年10月起將之推廣至機艙服務員上，以後機艙阿姐／阿哥（即係事務長，最大粒個位）只需喺iPad嘅客艙服務資訊管理系統Apps一按，即刻有晒所需資訊，就算喺海外都可以迅速將旅客要求、異常狀況等飛行報告Send返總公司。蝦！唔知呢個Apps有冇啲麻煩客戶資訊，等阿姐一按即知然後有所準備呢？

依小弟愚見，iPad Apps的確方便一眾機師／事務長執勤，但如果航行途中，iPad突然瓜柴（例如Hang機、冇電）咁點算呢？長榮話自數碼化後從來未遇上呢種情況，吓？乜冇Contingency Planning咁危？起碼都應該有一套Hard Copy卦？仲有，唔知長榮有冇iPad使用守則？揸緊飛機玩憤怒鳥（Angry Bird），下場會唔會同人地玩「露鳥」一樣架？講清楚好喎～～～

（記得按下面「讚好」Share俾Facebook朋友）

P.S. 圖中嗰位係長榮航空總經理張國煒，呢位有飛行執照嘅長榮太子爺，出名橋王！Hello Kitty飛機就係佢主意，今次iPad新猷唔駛問阿貴都係佢Baby啦！

想去台灣，旅客年齡加埋超過100歲，可以留意下華航新Promotion。由依家到10/12，只要2人或以上而年齡加埋又超過100歲，整個組合一齊訂華航台灣旅遊產品，一經成功登記，每組可獲US$100（即係HK$770）回贈，只需喺回程抵港當日，旅客代表去番香港機場一號客運大樓F區華航詢問櫃檯，可即時領取支票。

最著數當然係2位加埋已經超過100歲啦！咁每人就慳番HK$390，3人行就每人慳HK$260，幫補下燃油附加費都唔錯架！之前佢要求組合成員必須有一對夫妻同行，4/8起經已取消咗，咁當然值得推介啦！

留意位：

1. 優惠期至10/12/2011，必須於當日之前完成全部旅程

2. 限額優惠，先到先得，額滿即止

3. 每組旅客須於出發10日前向華航申請

網址：www.china-airlines.com

（記得按下面「讚好」Share俾Facebook朋友）

國泰機艙「露鳥」事件唔單止係城中熱話，全球唔少傳媒都報導過，大大打擊國泰形象。國泰航空行政總裁史樂山已發表聲明，話相中機師同空姐經已離職，但冇講係自己辭抑或被炒．而據今日南華早報報導，表面上雖然已告一段落，但原來仲有手尾跟。

國泰繼上年推出以真實員工為主角，Sell優質服務嘅”People & Service”廣告系列後，見反應唔錯想今年「添食」。新一輯會以一眾著便服嘅機師、機艙服務員、地勤同其他員工為主角，以”Meet the team who go the extra mile to make you feel special”為題，Sell佢地就算落咗班依然樂意為你服務．據報導所講，本來呢輯環球廣告經已準備就緒，發生咗「露鳥」事件後，國泰正考慮叫停，費時等啲口痕友乘機再踩國泰一腳，笑班員工可以俾人客既extra又好feel嘅「服務」！至於幾時先拎番出嚟，消息人士話未有時間表。

計我話咁搞法，冇一年半載都唔駛旨意解凍。面對形象受損，睇嚟國泰依家可以做嘅嘢唔多，我建議國泰不如轉移公眾視線，推銷多啲未來發展（如新航線，新機種），又或者趁秋冬淡季推出更多特價機票，等人客快啲忘記事件。至於Sell服務嘅廣告，擺下先啦！

新聞來源：www.scmp.com

（記得按下面「讚好」Share俾Facebook朋友）