今日收到風，卡塔爾航空聽日（週三）會推出秋冬早餐盤，由13/6至4/7訂購2/9至14/12秋冬時份嘅歐洲機票，淨票價低至HK$2,450起：不過跟開「又飛啦！」嘅Fans，都深知佢不嬲「妹仔大過主人婆」 – 即係佢下欄（油附連稅）仲貴過張機票！Check過系統，未特價嘅歐洲秋冬機票一般做緊淨票HK$3,500左右，咁即係大約減千零二千蚊左右，連稅大約六千左右，好抵架啦！暫時淨係知道以下航線有得減：巴塞隆拿、柏林、布魯塞爾、布加勒斯特、布達佩斯、哥本哈根、法蘭克福、日内瓦、倫敦、馬德里、曼徹斯特、米蘭、莫斯科、慕尼黑、尼斯、奧斯陸、巴黎、羅馬、索非亞、斯德哥爾摩、斯圖加特、威尼斯、維也納、蘇黎世（嘩！差唔多乜歐洲城市都有），想知佢邊個城市賣幾多錢，一陣00:00上官網望一望，或者聽早囉！提提你，由2/9起卡塔爾航空香港<->多哈會增至每日2班，多咗航班，多啲供應，希望可以繼續保持歐洲平霸三寶之一地位啦！

網址：www.qatarairways.com/hk

（記得按下面「讚好」Share俾Facebook朋友）

之前介紹過唔少7月平飛東京選擇，但最後出發日期一般只去到7月中，不過今次介紹隻達美東京筍盤，最後出發日期竟然去到30/7，都咪話唔誇張！只要30/6前訂飛，去官網買2-7日機票，淨飛低至HK$1,600，連稅HK$2,522，比之前澳門航空MOP$1,700仲要平，話晒係香港出發，仲要係早去（08:20/13:55）晚返（19:20/23:00）呢？Check過系統，暫時見唔少日子都有位，不過相信呢單猛料一傳開就好快去晒（7月喎）！至於8月，暫時未見有航空公司出筍嘢，又或者咁睇啦：就算冇，一到9月你慌佢唔平俾你咩！上星期四隻HK$1,800日航秋冬早餐盤咪係好例子囉！

網址：zt.delta.com

（記得按下面「讚好」Share俾Facebook朋友）