想平平地去歐洲，其實國航真係諗得過，事關佢下欄費（稅 + 油附）比一般航空公司平幾舊至一千（你睇卡塔爾航空就知，來回倫敦嘅下欄費竟然高達港紙四千都夠膽死）。依家國航又推出新一年度優惠機票，涵蓋多條航線，其中歐洲線繼續貫徹佢平霸精神，例如飛莫斯科平到HK$1,640（未連稅，下同），去羅馬就HK$2,640起，去歐洲多國（如德國法蘭克福、慕尼黑、杜塞爾多夫；英國倫敦、法國巴黎、希臘雅典、意大利米蘭、瑞典斯德哥爾摩）就HK$3,240起，加埋稅都只係四五千蚊左右，點都平通街。不過當然一分錢一分貨，起碼未必有AVOD設備，十幾粒鐘機會悶啲咁囉（記住必須喺北京轉機）！咁咪自己帶定iPad/iPhone上機自娛一番囉～～～

留意位：

1. 莫斯科機票出發日期：1/1 – 31/3

2. 其他歐洲機票出發日期：1/1 – 19/1；27/1 – 2/4；21/4 – 30/6

3. 以上機票有效期：3個月

網址：www.airchina.hk

（記得按下面「讚好」Share俾Facebook朋友）

你冇眼花，真係HK$2,780飛意大利羅馬！連稅只係HK$4,759！單買一張香港<->歐洲機票都唔得啦！國航早前推出嘅歐洲平機票優惠，以為賣晒啦，點知俾我哋發現仲有少量平盤喎！由依家到21/12，以及26/12 – 31/12，佢最平嗰張來回機票賣HK$2,640，不過官網內好難搵到，HK$2,780就有，雖然唔係日日都有呢口價，但已經勁唔錯啦！四千幾全包去歐洲喎！最緊要係轉機時間唔耐，喺北京來回都係停個幾小時而已，非常合理。

你冇興趣去羅馬？咁你大可以經羅馬轉飛其他歐洲城市嘛！歐洲大把廉航選擇，駛乜捱貴機？

網址：www.airchina.hk

（記得按下面「讚好」Share俾Facebook朋友）

中國國航為慶祝佢首架777-300ER投入服務，喺7月尾起至8月底喺網上搞咗個「國航飛機我命名」徵名大賽，勝出者可以幫佢首架777-300ER命名，而國航亦會送出8套雙人來回機票及精美紀念品俾富創意嘅網民。本來係一件「低成本、高效益」嘅Online Marketing Campaign，只可惜活動欠細心策劃，引發唔少網民批評。

1. 忽略做票

由於只有微博用戶先可投票，而開戶絕無難度（國內有唔少「空帳戶」、「假粉絲」），結果引發大量假票，搞到國航拿拿林關閉投票，將疑似做馬嘅票數「歸零」，然後重開投票，但已經引起唔少網民怨聲載道大呼投票唔公平。

2. 突然改變玩法

8月6日前，本來實行1位微博用戶/1命名/5票/1天，希望多啲票數從而帶動更多轉發機會，但8月6日後重開投票後，即刻改番1位微博用戶/1命名/1票/1天，咁對於本來票數少嘅網民唔公平，因為依家只得1票，任啲Friend點投都追唔到前領者啦！

3. 真係改乜都得？

表面上任你改名，即改即上載俾人投票，結果有啲名無耐就被人「河蟹」。由於總冠軍以票數定勝負，唔少網民覺得國航你既然咁怕啲敏感字眼（如「動車號」）羸出，咁不如一早就用「專業評審」（咁即係內定？）定勝負算吧！駛乜扮晒開明咁核突？

4. 揀錯獎品？

活動大獎係1張雙人來回德國法蘭克福機票，另有3張雙人來回日本沖繩機票作抽獎用。有憤青話日本同德國都曾經對中國人民情感帶嚟傷害，作為代表國家嘅航空公司，唔應該送呢啲地方嘅機票喎！

活動網址：http://client.sina.com.cn/zt/airchina/index.shtml

（記得按下面「讚好」Share俾Facebook朋友）

如果你錯失上月尾法航巴黎直航HK$5,300優惠嘅話，想平飛巴黎，依家唯有「​背靠祖國」喇！經Zuji.com.hk訂國航及東航，由31/8起開始有平飛賣，東航做特價來回HK$3,540（連稅HK$6,080），Check過系統，9月仲有少量，10有唔少；國航更加平，來回HK$3,200 添（連稅HK$5,531 ）！平多近HK$500，不過9月份啲飛勁爆，10月中後期開始有番位。兩者雖然要轉機，但揀到以下組合，來回只係16-17小時，比直航多5-6小時，以咁嘅價錢嚟講絕對可以接受。

組合建議

東航

去程：MU510 19;30/22:00，上海停2小時後 MU553 23:55/06:20（放工即去機場，第二程機啱啱好時間瞓覺）

回程：MU554 13:40/07:00，上海停3小時後 MU701 10:00/12:40

國航

去程：CA118 08:30 / 11:55，北京停1.5小時後 CA933 13:35 / 18:40

回程：CA934 20:20 / 12:25，北京停3小時後 CA115 15:30 / 19:00（回程食完晚飯即瞓）

呢個組合嘅飛賣少見少，想去巴黎掃貨就拿拿聲訂位嘞。

網址：www.zuji.com.hk

（記得按下面「讚好」Share俾Facebook朋友）

每年聖誕新年，都有唔少香港人返美加同當地住嘅親人過節。Check過唔少航空公司，如UA，CX，個段大時大節期間冇特價，想平平地返去，不如坐國航。

我哋Test過個段高峰期，發覺以下美加地點仲有特價飛！

溫哥華：23/12去2/1返 HK$3,780（連稅HK$5,634）

三藩市：23/12去2/1返 HK$6,890（連稅HK8,510）回程要停2次

洛杉磯：21/12或24/12去2/1返 HK$3,200（連稅HK$4,800）

紐約：22/12去2/1返 HK$6,910（連稅HK$8,571）回程要停2次

多倫多？二萬幾呀！完全天價，都費事報出嚟。

網址：www.airchina.hk

（記得按下面「讚好」Share俾Facebook朋友）

溫洲撞車，人民心驚！你仲夠唔夠膽搭高鐵？中國人反應最快，短程機票由無人吼頓變搶手貨。香港上市個啲國內航空股仲日日升添！唉！

講開國內航空公司，自從第一間廉航：春秋航空宣佈最快明年初喺上海A股市場上市後，國內三大國企航空公司：國航、東航同南航都有風吹出嚟話會搞廉航。據新華社報導，三間航空公司係內部會議上明確提出涉足廉航計劃，但就未有最後決定同時間表。不過隨住全球廉價興起，加上近期連串高鐵事件，國企開廉航只係遲早問題。

問題就係：中國政府一旦一窩瘋搞一樣嘢，都冇乜好下場。搞廉航，看似簡單（同樣做航空之嘛！），但只要留心睇，國際上真係冇乜邊間傳統航空搞廉航係成功嘅。最出名個幾間：Ryan Air, Easy Jet, JetBlue, AirAsia等等都係靠自己，依附阿媽生個批，最像樣似乎係Jetstar（出自澳航）同Virgin America/Australia （出自Virgin ）。連咁大名鼎鼎嘅新航，佢個仔Tiger Australia最近都因為飛安問題被澳洲當局勒令禁飛。如果以為搞廉航就等如用細機+冇service+機票平，邊有咁易？

2009年，中國投資顧問已經有報告指出，中國發展廉航潛力巨大，有超過7成內陸線（約780條航線）都適合做廉航。個陣國內已經有三家民營廉航開業，包括奧凱航空、鷹聯航空同埋春秋航空。結果呢？奧凱航空因欠款同股東嘈交而被勒令停航兩次，依家只係豆鼓咁細嘅規模；鷹聯最後被重組為成都航空，只有春秋同後來嘅吉祥航空叫住站得住腳。

其實國內搞廉航，有3個問題好難搞，第一係要有足夠數量嘅機師應付龐大嘅客運量（因為廉航要不停飛，無理由同一個機師飛足成日卦？）；第二係國內民眾唔接受乜都要俾錢嘅消費模式；第三係航空管制，點解搭國內航班成日誤點？皆因國內航道有限，廉航用同一架機密密飛，你呢班遲到，會連帶影響同日航班。你間廉航成日唔準時，邊會有人幫襯你？仲有飛安呢？廉航密密飛，飛機損耗比一般航空高，你班國企如果好似高鐵咁，一句口號就匆匆上馬，到時搞唔搞得掂架？高鐵已經怕怕啦！咁多問題一日搞唔好，中國（特別係個班坐食山崩嘅國企）大力搞廉航？嗯！

（記得按下面「讚好」Share俾Facebook朋友）