頭先介紹11月上海特價酒店，其實如果依家訂埋機票，都可以好平。去上海要平只有2個選擇：大路之選係搭中國東方航空，佢一向有Early Bird優惠，如果早28日前預訂，來回機票去浦東只係HK$1,210（連稅HK$1,911），去虹橋就係HK$1,500（連稅HK$2,161）！HK$1,210呢口Early Bird價仲適用於濟南、無錫、杭州同南京添！當然港航都係平價之選，不過佢依家做緊嘅Promo出發日期只去到10月尾，唔係今次考慮之列。

想再抵啲，可以試下春秋航空，11月嘅價佢仲未開，不過要執佢單程HK$299飛唔難，有時甚至執到限量版嘅HK$199機票，來回連稅最平都係HK$1,089，只係班次唔多，一日得2班，未必適合彈性需求大嘅旅客。想捕佢11月特價飛，等多半個月左右啦！

東方航空網址：hk.flychinaeastern.com

春秋航空網址：www.china-sss.com

（記得按下面「讚好」Share俾Facebook朋友）

自從廉價航空釜山航空於6月開通香港<->釜山航線後，都幾受歡迎。呢間韓亞航空子公司，一星期對開飛三班，逢一、四、六凌晨機01:50/06:10，回程逢三、五、日晚機20:30/23:05，最好梗係週四凌晨飛週日返玩足4日啦！不過Check過系統，想買呢種組合飛，最快要去到22/9（週四）先買到佢最平嘅HK$1,123（連稅HK$1,884）選擇；如果唔介意平日飛，最快可以喺29/8（週一）去，31/8（週三）同2/9（週五）返都仲有得買。

如果堅想8月飛玩一個Weekend，暫時最平只有18/8（週四）去21/8（週日）返，但要HK$2,318（連稅HK$3,079）。雖然點都平過大韓航空嘅HK$3,730（連稅HK$4,026），但忍一忍就可以慳成千幾蚊，我就一定等下先囉。

網址：www.airbusan.com

（記得按下面「讚好」Share俾Facebook朋友）

一般人搭飛機，都希望有個又靚又索嘅空姐Serve你，但其實航空公司請人唔係靠外表，內涵先重要，例如服務細唔細心，語文能力夠唔夠咁。不過亞洲區嘅航空公司一般又真係鍾意請後生女，所以大家先有錯覺，以為只有靚女先做得空姐。

大陸首家廉航春秋航空，為應付業務需要又要請新一批空姐。一睇入職條件：咦？第一係已婚女性！年紀介乎26-40歲？仲要起碼有3年工作經驗？即係後生女／Fresh Grad者免問！原來春秋講明要借鑒歐美航空大量聘請高齡女士做空姐經驗，話人地咁好服務，自己都想藉此提升機艙服務質素，所以寧請空嫂唔請空姐。哈哈哈！計我話可能係春秋睇中班阿嫂結埋婚生埋仔，唔會咁易轉工卦？咁的確熟女一定比後生女細心又有耐性嘅！不過要廣大乘客改變「搭飛機睇靚女」觀念，似乎仲要啲時間播！

招聘網址：www.china-sss.com

（記得按下面「讚好」Share俾Facebook朋友）

我搭親飛機，最怕遇著中華牌，又嘈又盛，如果搭長途機，一定冇覺好瞓。所以當我睇到呢單新聞，心都涼晒！

話說喺上星期六，一班由馬尼拉飛去宿霧嘅宿霧太平洋航空上，有班大陸傳媒團係機上大聲講細聲笑。當時菲律賓總統阿基諾三世嘅大姐瑪麗亞同佢老公克魯斯亦都坐同一班機上。你知啦！架機咁細（唔係坐A319就係A320），佢地咁嘈，唔煩有鬼！當克魯斯擰轉頭同佢哋講可唔可以細聲啲個陣，有2位旅遊記者好惡咁衝上去佢度，一手揪起佢衣領作勢想打柒佢，好在機員及時分開兩幫人。飛機降落後，呢12位中華牌旅客就被菲律賓警方帶走，經調查後，最後將個2位中華牌遞解出境，Blacklist佢哋，以後咪駛旨意入境！

簡直大快人心！各位下次搭飛機遇著佢地，唔好忍啦！投訴啦！

消息來源：www.theage.com.au

（記得按下面「讚好」Share俾Facebook朋友）

溫洲撞車，人民心驚！你仲夠唔夠膽搭高鐵？中國人反應最快，短程機票由無人吼頓變搶手貨。香港上市個啲國內航空股仲日日升添！唉！

講開國內航空公司，自從第一間廉航：春秋航空宣佈最快明年初喺上海A股市場上市後，國內三大國企航空公司：國航、東航同南航都有風吹出嚟話會搞廉航。據新華社報導，三間航空公司係內部會議上明確提出涉足廉航計劃，但就未有最後決定同時間表。不過隨住全球廉價興起，加上近期連串高鐵事件，國企開廉航只係遲早問題。

問題就係：中國政府一旦一窩瘋搞一樣嘢，都冇乜好下場。搞廉航，看似簡單（同樣做航空之嘛！），但只要留心睇，國際上真係冇乜邊間傳統航空搞廉航係成功嘅。最出名個幾間：Ryan Air, Easy Jet, JetBlue, AirAsia等等都係靠自己，依附阿媽生個批，最像樣似乎係Jetstar（出自澳航）同Virgin America/Australia （出自Virgin ）。連咁大名鼎鼎嘅新航，佢個仔Tiger Australia最近都因為飛安問題被澳洲當局勒令禁飛。如果以為搞廉航就等如用細機+冇service+機票平，邊有咁易？

2009年，中國投資顧問已經有報告指出，中國發展廉航潛力巨大，有超過7成內陸線（約780條航線）都適合做廉航。個陣國內已經有三家民營廉航開業，包括奧凱航空、鷹聯航空同埋春秋航空。結果呢？奧凱航空因欠款同股東嘈交而被勒令停航兩次，依家只係豆鼓咁細嘅規模；鷹聯最後被重組為成都航空，只有春秋同後來嘅吉祥航空叫住站得住腳。

其實國內搞廉航，有3個問題好難搞，第一係要有足夠數量嘅機師應付龐大嘅客運量（因為廉航要不停飛，無理由同一個機師飛足成日卦？）；第二係國內民眾唔接受乜都要俾錢嘅消費模式；第三係航空管制，點解搭國內航班成日誤點？皆因國內航道有限，廉航用同一架機密密飛，你呢班遲到，會連帶影響同日航班。你間廉航成日唔準時，邊會有人幫襯你？仲有飛安呢？廉航密密飛，飛機損耗比一般航空高，你班國企如果好似高鐵咁，一句口號就匆匆上馬，到時搞唔搞得掂架？高鐵已經怕怕啦！咁多問題一日搞唔好，中國（特別係個班坐食山崩嘅國企）大力搞廉航？嗯！

（記得按下面「讚好」Share俾Facebook朋友）

好眼瞓呀？不如睇下呢張喺Jetstar網站嘅摘圖，睇下有乜唔妥吖？包你醒神！（我估聽朝早就冇得玩lu…）

原圖網址：www.jetstar.com

（記得按下面「讚好」Share俾Facebook朋友）

尋日，日本ANA正式宣佈同馬來西亞AirAsia合作，成立新廉航AirAsia Japan（エアアジア・ジャパン），以東京成田為基地，開拓國內及遠東區市場(如韓國，中國及香港)，預計今年8月申請航線，明年8月開航。新公司中，全日空佔51%，AirAsia佔49% （其中16%股份無投票權，故全日空實際上擁有67%股權）但係，ANA已經同香港第一東方集團合資成立另一間廉航，以大阪關西機場為基地嘅「桃子航空」（Peach Aviation）喎！點解ANA會連氣開2間？自己人打自己人乎？

原因好簡單：日本廉航市場實在太大！而且佢睇中嘅唔係國內市場，而係中國！

自從日本政府陸續開放天空，近一兩年已經有多家海外廉航進駐，如馬來西亞AirAsia X，中國春秋航空、韓國EastarJet、菲律賓Cebu Pacific、澳洲JetStar等等，深受旅客歡迎，但原來據統計，國內實際利用過廉航嘅旅客只有5%左右，而受訪嘅年青人中，有35%表示願意搭廉航，咁你話個餅幾巨大吖！當2013年，成田機場嘅每年總升降由22萬架升到27萬架時，多咗個50,000架次，必定係廉航搵食嘅世界。既然俾海外公司爭，咁點解唔自己食盡佢？尤其係，當佢老對手日本航空依家申請咗破產保護，近來仲要Cut人，自身難保，佢仲唔快手快腳食埋日航個份（雖然日航都同JetStar傾緊合營，但未見下文囉）？

雖然佢都有「桃子航空」係手，但你要明白，打仗最高心法，就係將敵人收為已有！ 既然AirAsia係亞洲區最Top嘅廉航，日本人當然知佢勁揪。與其同佢鬥，點解唔一早化敵為友，一齊合作搵真銀？

事實上，AirAsia一直好想係東北亞插旗，事關佢睇中巨大嘅中國市場，但苦冇落腳基地（香港一定冇行，澳門受制於澳門航空專營協議，而台灣又受制於航線不足問題），下下派AirAsia X A330，飛咁長成本高，而且大陸客有幾何去馬來西亞？依家能夠落戶日本，可以派番佢最拿手嘅A320，狂開東京<->上海/北京等沿海城市航線，實行賺盡人仔。正所謂「神女有心、襄王有夢」，ANA梗係唔介意收多個「老婆仔」啦！

不如重溫下尋日記招情況啦！

（記得按下面「讚好」Share俾Facebook朋友）

[youtube http://www.youtube.com/watch?v=DTBL_dlgrdU&w=425&h=349]

你冇眼花! 來回香港<->泉州晉江機票只需$470起(CNY$390)! 比油附連稅(CNY558/HK$670)仲要平呀!

深圳航空推出香港<->泉州晉江特價機票, 8月中打後的飛普遍為單程CNY180(HK$217)起. 以8月19日(星期五)出發, 8月21日(星期日)返為例, 機票價為CNY380(HK$470), 連稅CNY948(HK$1,138).

航班方面, 香港每日有2班機來回泉州晉江, 航程約1小時左右:

香港 -> 晉江

ZH9042 : 13:05 / 14:10
ZH9050 : 15:55 / 17:10

晉江 -> 香港

ZH9041 : 10:50 / 12:05
ZH9049 : 13:45 / 14:50

泉州係歷史古城, 以前係”海上絲綢之路”起點, 必去景點有「開元寺」、「狀元街步行街」、「祟武古城風景區」、「九日山」等等. 至於美食, 泉州絕對大把你嘆. 去市中心最繁榮嘅豐澤區, 有條泉州美食街, 集合晒泉州各縣市同外地小食, 例如泉州肉粽、面線糊、海蠣煎, 南安洪瀨嘅貽慶雞爪、官橋嘅和豆腐幹、晉江安海嘅土筍凍(比北角福建食店個D更正宗)、永春嘅石鼓白鴨、德化嘅苦萊湯等. 而泉州嘅東、西街亦都係食嘢好去處. 搵一至兩個景點, 然後集中搵好嘢食, 咁嘅Weekend夠滿足吧!

網址 : http://global.shenzhenair.com/