好少介紹瑞士航空，因為佢好少劈價，不過佢最近做緊嘅冬春劈的確有睇頭：經蘇黎世轉飛一眾歐洲城市（除咗大城市如阿姆斯特丹，巴塞隆拿外，仲有冷門嘅布達佩斯，馬拉加，都伯林，總之一大堆）來回淨機票HK$3,400起，連稅HK$6,642起，但最值錢係機票有效期長達3個月，加上Open Jaw（即不同城市往返）一樣有平，例如倫敦入里斯本出，來回連稅只係最低價嘅HK$6,642起，倫敦仲可以揀希斯路（LHR）或城市機場（LCY），須知道LCY位於倫敦市中心，好少航空公司會飛兼夾平呢！相比中東三寶更有睇頭。出發日期為6/2 – 31/5。Check過系統，除咗復活節附近日子冇之外，其他日子唔難搵。直航蘇黎世就貴啲，來回淨機票HK$4,340起，連稅HK$6,650，其實都抵買嘅～

瑞航有樣好：Search Engine中嘅日曆會一次過Show晒整個月來回程邊日有平機票（藍色顯示），慳時又慳錢。

網址：www.swiss.com

（覺得抵請記得按Like同Share俾朋友）

冬季想平飛歐洲，土耳其航空都有貨賣，佢最大優點係選擇城市眾多，亦可以不同城市往返，但缺點係出發日期較短：26/12/2013 – 31/12/2013；07/02/2014 – 28/02/2014，聖誕節及農曆新年都冇。來回各大歐洲城市淨機票HK$2,230起，連稅計，赫爾辛基HK$5,230起／奧斯陸HK$5,240起／日內瓦HK$5,260起／斯德哥爾摩HK$5,270起／威尼斯HK$5,310起／哥本哈根HK$5,320起／里斯本HK$5,340起／米蘭HK$5,370起／布魯塞爾HK$5,380起／阿姆斯特丹HK$5,400起／巴黎HK$5,420起／蘇黎世HK$5,440起／都伯林HK$5,610起／巴黎HK$5,630起／巴塞隆拿HK$5,660起／馬德里HK$5,700起／維也納HK$5,720起／柏林HK$5,730起／杜爾塞多夫HK$5,750起／里斯本HK$5,790起／慕尼黑HK$5,790起／法蘭克福HK$5,900起／愛丁堡HK$6,040起／曼徹斯特HK$6,260起／伯明翰HK$6,270起／倫敦HK$6,450起，機票有效期1個月。Check過系統，供應量唔多，唔係日日有，要上官網細心發掘下。如果筆直多啲，建議大家揀豪華經濟艙（Comfort Class），來回連稅雖然要HK$10K，但土航豪華經濟艙坐位Leg Lenth長達46吋，堪稱全球同類客艙中最大之一，最緊要係餐飲方面盡量跟足商務艙配備呢！

網址：www.turkishairlines.com

（覺得抵請記得按Like同Share俾朋友）

計一計，上一次介紹瑞士航空筍盤已經係10/9/2012，即係將近一年喇！鬼咩！瑞航極少有靚價，今年秋冬又有喇！出發日期：4/10/2013 – 23/1/2014，飛歐洲一眾城市（須於蘇黎世轉機）來回淨機票HK$3,500起，連稅約HK$6K左右，同卡塔爾／阿聯酋航空相若，但機票有效期長達3個月，以瑞航嚟講真係少見，值得留意！至於航點，包括：阿姆斯特丹、巴塞隆拿、伯明翰、布魯塞爾、布達佩斯、哥本哈根、都伯林、佛羅倫斯、里斯本、倫敦（希斯路）、倫敦（城市機場）、馬德里、馬拉加、曼徹斯特、米蘭、尼斯、巴黎、布拉格、羅馬、斯德哥爾摩、維也納、威尼斯、華沙等等，可以揀不同城市往返（Open Jaw）。瑞士航空官網有樣好：佢會幫您用月曆形式Show晒邊啲來回日子有特價飛，唔駛您逐日逐日搵咁煩！

網址：booking.swiss.com

（覺得抵請記得按Like同Share俾朋友）

歐洲秋季平機票陸續嚟，繼卡塔爾航空後，對手阿聯酋都出招，出發日期為7/10 – 15/12（回程不適用於13/12 – 24/12），先講價錢（來回連稅計）：伊斯坦堡HK$6,241起，米蘭HK$6,544起，阿姆斯特丹HK$6,584起，羅馬HK$6,585起，巴黎HK$6,812起，法蘭克福HK$6,923起，威尼斯HK$6,928起，馬德里HK$6,992起，日內瓦HK$7,141起，布拉格HK$7,183起，巴塞隆拿HK$7,188起，里斯本HK$7,190起，倫敦希斯路HK$7,416起，仲有其他歐洲城市，自己上官網望望。來回地點可以選擇Open-Jaw，亦可以免費中停杜拜（補交杜拜機場稅HK$180就得）。不過同舊年比較，今年價錢普遍貴HK$500，雖然阿聯酋貴為全球最佳航空公司，唔通咁就要加價？我哋意見係：唔太吸引！機票有效期1個月，最後出票日期為28/7。

網址：www.emirates.com

（覺得抵請記得按Like同Share俾朋友）

法航剛剛再推出春季歐洲機票劈盤！今次比上次更平：淨機票HK$3,540，連稅後由HK$6,242起，出發日期為1/5到30/6，機票有效期最少五日或跨一個週日，最長一個月，非常夠用。地點則有八十多個，基本上法航飛得都有，巴黎梗係包括啦！直航連稅HK$6,242係非常有競爭力（除非國泰有fanfares），至於其他城市包括（須於巴黎轉機）：倫敦，曼徹斯特，愛丁堡，格拉斯哥，里斯本，巴塞隆拿，馬德里，日內瓦，蘇黎世，威尼斯，米蘭，佛羅倫斯，羅馬，布達佩斯，布拉格，柏林，哥本哈根，雅典，巴黎，尼斯，馬賽，波爾多，里昂，斯特拉斯堡……數之不盡！連稅大多係HK$7K左右，只係倫敦超貴係HK$8,401，咁就唔諗佢啦！留意：如果想中停巴黎，可以俾多HK$750就得。執筆一刻，Check過系統，供應量充足，有心趁春季感受浪漫又便宜嘅歐洲（春季酒店比夏季平好多，小弟啱啱去完），法航值得諗下（小弟亦剛剛搭完法航，啲飛機餐真係唔錯！服務亦有中上水準）。

網址：www.airfrance.com.hk

（記得按下面「讚好」Share俾Facebook朋友）

22:00 4/2 Updated：漏洞已封

嘩！呢個必定係「又飛啦！」成立以來見到最大嘅漏洞價！是咁的：香港飛葡萄牙馬德拉島首府豐沙爾（Funchal），來回連稅只需HK$2,734起！如果回程揀里斯本出發，仲平啲！來回連稅只需HK$2,542（US$326）起，係連稅呀！香港飛豐沙爾要轉兩程機，先搭阿聯酋航空飛杜拜（仲可以搭A380），然後轉番阿聯酋航空飛里斯本，里斯本飛豐沙爾個程就改搭葡萄牙TAP航空。由於阿聯酋航空同葡萄牙航空有代碼共享協議，所以就算成套機票都用葡萄牙航空編號出票，來回最長嗰兩程都係搭阿聯酋航空。香港飛歐洲，淨係俾稅同燃油附加費，來回起碼HK$2K-3K，今次來回歐洲機票連稅竟然只係HK$2,542起？唔駛講，9999999999999999999999999999999999%係漏洞價！Check過系統，漏洞價雖然唔係日日有，但基本上覆蓋全年，包括暑假呢！趁依家仲係歐洲假日時間，航空公司IT部門冇人處理，今晚拿拿聲搶啦！呢個價無論阿聯酋航空抑或葡萄牙航空官網都冇，但喺全球各大機票網站都有，例如expedia.com，香港就有cheaptickets.hk，據網友報料，暫時知道去expedia.com買係會收到e-ticket嘅，其他就暫時未有消息，如果大家試過其他網站買到而又有e-ticket，請報料！至於呢啲漏洞機票，據之前往績，航空公司多數會認數，不過為保障自己，建議大家買咗後靜觀其變，唔好Book酒店住，等航空公司稍後公佈點樣處理先再決定，就算唔認數，反正都會退番錢俾您，毫冇損失吖！梗係訂咗先算啦！

expedia網址：www.expedia.com

例子：5/3香港飛豐沙爾，14/3里斯本返香港

cheaptickets.hk網址：www.cheaptickets.hk

例子：5/3香港飛豐沙爾，14/3豐沙爾返香港

豐沙爾．馬德拉島資料：zh.wikipedia.org

（記得按下面「讚好」Share俾Facebook朋友）

「又飛啦！」好少介紹瑞士航空，因為佢好少減價，不過機會又嚟啦！佢將歐洲各航點機票劈劈劈，淨機票價錢由HK$3,800起（日內瓦更低至HK$3,400），連稅預七千幾起，以瑞士航空嚟講算係抵啦！出發日期30/10/2012 – 31/3/2013，有5個月有效期，機票有效期1個月，值得去佢官網望望。今次劈價目的地非常之多，基本上覆蓋主要歐洲城市，包括：阿姆斯特丹、巴塞隆拿、伯明翰、布魯塞爾、布達佩斯、柏林、哥本哈根、都伯林、杜爾塞多夫、佛羅倫斯、法蘭克福、日內瓦、漢堡、漢諾威、里斯本、倫敦（希斯路）、倫敦（城市機場）、盧森堡、馬德里、馬拉加、曼徹斯特、米蘭、慕尼黑、尼斯、紐倫堡、巴黎、布拉格、羅馬、斯德哥爾摩、斯圖加特、維也納、威尼斯、華沙、蘇黎世（打都打到手軟）。瑞士航空官網有樣好：佢會幫你用月曆形式Show晒邊啲來回日子有特價飛，唔駛您逐日逐日搵咁煩！

網址：booking.swiss.com

（記得按下面「讚好」Share俾Facebook朋友）

今早先介紹維珍冬季飛倫敦平盤，今晚就講下阿聯酋航空，佢近日晒冷一批歐洲唔同城市嘅平盤，包括：聖彼得堡、倫敦、巴黎、法蘭克福、羅馬、米蘭、阿姆斯特丹、莫斯科、曼徹斯特、漢堡、維也納、尼斯、馬德里、哥本哈根、紐卡素、格拉斯哥、杜塞爾多夫、布拉格、里斯本、巴塞隆拿、日內瓦，不過又係11-12月冬天出發（出發日期為1/11 – 10/12；25/12 – 31/12），機票有效期3-30日，至於價錢，連稅價計：倫敦HK$7,208、羅馬HK$6,237、巴塞隆拿HK$7,184、巴黎HK$6,559、法蘭克福HK$6,827（其他可上官網Search）。以價論價，連稅價Keep番住六／七千左右，只算一般抵，不過佢又俾番高水準服務您，只求最平嘅，揀國航東航啦！我估起碼平多一千以上。

網址：http://www.emirates.com/hk/chinese/

（記得按下面「讚好」Share俾Facebook朋友）