長榮靜咗一排，依家又郁手劈過！不過今次您必須有萬事達卡。長榮兵分三路：第一路係Last Minute機票，由依家至12/7出發飛台北，指定搭BR828（07:30/09:10）或BR810（21:45-23:25），回程冇限制，視乎供應，2人同行HK$900（每人每張，未連稅，下同），3人同行HK$880，4人同行HK$860，即係多一人減HK$20，不過Check過系統，可供發售日子賣少見少，暫時仲有5, 6, 8 , 9 , 10/7早機BR828有位（可能稍後又放位都唔定，總之大家自己Search啦），奇怪嘅係：揀BR810唔用萬事達卡優惠，1人飛都只係HK$810咋喎！定價真奇怪！另一路，就係來回任揀航班（當然視乎供應），咁2人同行HK$1,200，3人同行HK$1,180，4人同行HK$1,160，適用日子由依家至12/7；25/8 – 28/9；1/10 – 31/10，由於唔包暑假旺季高峰期，係咪好筍？我會寧願等下有冇Last Minute筍盤。最後一路係商務艙劈價，2人同行HK$2,388，3人同行HK$2,288，4人同行HK$2,188，多一人減一舊，小弟覺得最抵之選！事關出發日期橫跨整個暑假至31/10，雖然路途短，但佢商務艙一樣俾足Service！小弟試過，食物美味，服務貼身，比經濟客艙高幾皮，絕對值得俾多一千（其實暑假旺季，只係差幾舊）！提提您：想坐Hello Kitty最新雲彩機，記得去程揀BR858（21:00/22:40），回程揀BR857（18:10/19:50）呀！

網址：www.evaair.com

（記得按下面「讚好」Share俾Facebook朋友）

長榮第五架Hello Kitty機：「雲彩機」，已經由22/6起正式投入服務，以後又可以同Hello Kitty一齊飛台北啦！呢架A330-200機，機身嘅Hello Kitty會坐喺筋斗雲上，同你一齊雲上飛翔，睇落都幾龍珠Feel。至於航班方面，同上次一樣：香港->台北BR858（21:00/22:40），放工去機場啱啱好；台北->香港BR857（18:10/19:50），返到香港都唔太夜，絕對可以週五去週日返，唔駛請假都可以同Hello Kitty Say Hello啦！

網址：evakitty.evaair.com

（記得按下面「讚好」Share俾Facebook朋友）

尋日我哋「又飛啦！」先講華航Weekend將12/7前出發嘅台北／高雄飛劈至HK$815，長榮一於照跟！Promotion理由都係一樣：慶祝香港旅遊展嘛！唔理啦，講番隻盤先：出發日期同華航一樣去到12/7，同樣2-7日機票，去程可揀早機，不過長榮就必須2人同行，淨機票價每位HK$950，貴過華航舊幾水，又要2人同行，捧邊間場，自己諗啦！提提你，佢寫明截止購買日期為19/6 23:59止，比華航更公開透明。

網址：www.evaair.com

（記得按下面「讚好」Share俾Facebook朋友）

長榮Hello Kitty機已於上週三（23/5）起至下月21/6暫停香港<->台北服務，但22/6後，全新嘅彩繪機又會派嚟香港同大家見面！長榮已公佈兩架全新Hello Kitty彩繪機詳情：第四隻名為「歡樂機」（圖），係A330-200航機，主題為「Hello Kitty Happy Music Time」，希望為各位乘客一齊譜出旅程嘅快樂序曲，佢已經喺上週三率先飛嚟香港俾大家先睹為快，由依家到六月會不定期飛往不同地點，等多啲亞洲區內Fans好好欣賞，1/9起就會投入台北<->札幌線懷抱；而21/6起負責跑香港<->台北線嘅，會係第五隻Hello Kitty機：「雲彩機」，同樣係A330-200機，以「Hello Kitty Speed Puff」為主題，將自由自在嘅筋斗雲神話重現，飛咗上天，乘客就好比坐喺大型筋斗雲上飛翔，都幾有龍珠Feel，暫時未有真身睇住，都係等長榮稍後公佈啦。

網址：evakitty.evaair.com

（記得按下面「讚好」Share俾Facebook朋友）

週末冇買華航HK$665平機票？長榮囉！為咗推廣佢新加班嘅BR810（21:45/23:25），只要唔介意夜去嘅（我就不知幾Like，放工飛去玩埋夜晚），HK$810（連稅HK$1,549）一樣抵買到震，回程冇限制搭邊班，視乎供應。Check過系統，HK$810呢隻H Fare（有效期2-7日）去程只有週一、二、四先有，如果想週五先走，就要買Class R（有效期1-14日），貴HK$150即係HK$960（連稅HK$1,699），週三及日就冇咁平，唔知點解咁定價，出發日期由1/6至12/7（29/6除外）。講多少少你聽，BR810係會用佢旗下美國麥道MD-90型號航班執飛，對香港人嚟講會比較陌生，皆因MD機向來極少嚟香港，雖然唔係乜嘢A380咁特別（其實用佢旗下子公司立榮舊機改長榮塗裝），不過如果你係飛機迷，絕對值得一試，因為麥道早於1997年已經同波音合併，MD機已經賣少見少。放心，MD機一向飛安良好，尤其係長榮管理！

網址：www.evaair.com

（記得按下面「讚好」Share俾Facebook朋友）

見華航6月頭台北線劈得咁過癮（短短2日我哋錄得過千個Like！史無前例）？長榮點會唔跟？佢將新開嘅去程一頭一尾航班：BR828（07:30/09:10）及BR810（21:45/23:25）劈劈劈，價錢同佢航班號碼一樣：BR828 = HK$828（未連稅，稅就HK$729）BR810 = HK$810，雖然比華航貴百幾蚊，但勝在去程仲有早機揀（華航早機爆晒），咁頭一日俾你玩足成日，個百幾蚊唔係錢啦下話！回程一樣俾你任揀航班，視乎供應量啦！7/6 – 12/6就加番上HK$1,050，不過都算抵買。

留意位：

1. 出發日期：2/6 – 6/6（HK$828）；1/6 – 5/6（HK$810）；1/6 – 12/6（HK$1,050）

2. 機票有效期：2 – 7日

3. 最後出票日期：11/5（HK$810/828）；31/5（HK$1,050）

網址：www.evaair.com

（記得按下面「讚好」Share俾Facebook朋友）

飛日本或韓國首爾，一般都係搭直航啦！不過如果你想一次過玩埋台灣（事實上有十個喺「又飛啦！」FB發問者，有六/七個都關於台灣嘅），長榮呢隻Promo就要留意。佢俾你免費停一次台北（來回任揀，兩次皆停加HK$1,000），咁飛首爾就HK$1,900（未連稅，下同），而日本方面，東京成田HK$1,800；福崗HK$2,000；大阪HK$2,270；札幌HK$2,670；小松HK$2,800，當中會遇上Hello Kitty飛機架！如果想一雞兩味，又或者係老堅Hello Kitty迷，呢個價著實唔錯，否則梗係寧願俾多少少搭直航算啦！

留意位：

1. 機票有效期：0 – 14日

2. 出發日期：8/4 – 26/4；29/4 – 28/6

3. 若需更改航班日期或停留台北，可於購票後經長榮航空訂位部辦理

4. 香港-台北來回航段僅可乘搭由長榮航空營運之航班

網址：www.evaair.com

（記得按下面「讚好」Share俾Facebook朋友）

爆單未經證實嘅壞消息俾大家知，長榮Hello Kitty環球機自上年23/12開始執飛香港<->台北線後（BR 857/858）一直深受歡迎，不過「又飛啦！」收到料，長榮會於23/5起重新調配Hello Kitty機，將其中兩部彩塗機由台北桃園調去台北松山，分別執飛東京羽田同埋上海虹橋，自此Hello Kitty機會同香港朋友講Bye Bye。未搭過／想Encore者，快快趣趁23/5前坐啦！官方未有正式公佈，相信一Confirm，餘下機票定必好快搶清光，各位「又飛啦！」Fans行動要快啦！

（記得按下面「讚好」Share俾Facebook朋友）