AirAsia X日前喺佢官方Facebook，半公開咗佢即將開通吉隆坡<->日本大阪航線（俾晒啲大阪相叫人去估），據小弟得悉佢將於10/8正式公佈詳情。

不過有啲更爆嘅AirAsia X新料要同大家速報。首先係AirAsia X正努力申請名古屋同福岡航點，除咗現有嘅東京羽田外，公司亦積極爭取飛埋東京成田，以便將來併入AirAsia Japan中做埋國際轉機客。此外，AirAsia X已於6月成功向馬來西亞政府申請到4個新航點，包括吉隆坡飛北京、上海、沙地阿拉伯吉達同埋土耳其伊斯坦堡，不過因為唔夠A330飛機用，所以年底前會先開2條新航線（正路當然係北京同上海啦！），等下年新機到貨後先開埋其餘2條。至於歐美市場，由於擔心當地經濟，暫時唔申請。

AirAsia X終於落戶北京、上海，還佢多年心願啦！咁天津同杭州線呢？會唔會功成身退讓番啲運力出嚟？就好似當年佢開香港線後將澳門班次/航線縮減一樣。拭目以待吧！

（記得按下面「讚好」Share俾Facebook朋友）

上個禮拜我哋先報導過，西藏航空公司以空中巴士特製嘅A319作高原飛行，老對手波音當然都有計啦！

廈門航空一直幫襯開波音，佢買嘅第50隻客機剛由波音手上收貨。呢隻737-700有更強嘅引擎推進力，機艙氧氣供應量亦增加，以應付喺稀薄空氣同高溫天氣嘅高原上飛行。廈門航空訂得呢啲機，睇嚟會加強沿海至西藏／新彊一帶嘅航班服務播！

呢架新機亦配備波音新一代嘅Sky Interior設計，加強乘客舒適度，例如頂頭行李櫃以下拉方式開啟，安裝全機械氣壓彈簧，櫃內呎吋亦稍作調整，令空間好用之餘乘客又唔駛頂頭。全機天花板以凹形LED燈光照明，可以根據唔同時段（如登機、進餐、睡眠、著陸）調整多種模式燈光，令乘客更舒服。

（記得按下面「讚好」Share俾Facebook朋友）

一般人搭飛機，都希望有個又靚又索嘅空姐Serve你，但其實航空公司請人唔係靠外表，內涵先重要，例如服務細唔細心，語文能力夠唔夠咁。不過亞洲區嘅航空公司一般又真係鍾意請後生女，所以大家先有錯覺，以為只有靚女先做得空姐。

大陸首家廉航春秋航空，為應付業務需要又要請新一批空姐。一睇入職條件：咦？第一係已婚女性！年紀介乎26-40歲？仲要起碼有3年工作經驗？即係後生女／Fresh Grad者免問！原來春秋講明要借鑒歐美航空大量聘請高齡女士做空姐經驗，話人地咁好服務，自己都想藉此提升機艙服務質素，所以寧請空嫂唔請空姐。哈哈哈！計我話可能係春秋睇中班阿嫂結埋婚生埋仔，唔會咁易轉工卦？咁的確熟女一定比後生女細心又有耐性嘅！不過要廣大乘客改變「搭飛機睇靚女」觀念，似乎仲要啲時間播！

招聘網址：www.china-sss.com

（記得按下面「讚好」Share俾Facebook朋友）

大陸客，你真係羞家！

尋日我先報導澳洲航空一班客機因為Delay，好多乘客因為冇房瞓而被迫瞓香港機場，乘客冇人鼓譟，我仲提出疑問：究竟澳航咁嘅安排，乘客有冇錢賠呢？點知星期五晚香港機場又發生另一單Delay事故，受影響個班大陸pax，同澳航個班外國pax表現簡單差天共地！

蘋果日報今日報導，話香港航空因為一架飛機喺海南島因為被雷擊需緊急維修，導致尾隨多班航機Delay，其中一班原定星期五晚22:50飛去泰國曼谷嘅HX767航班，更被Delay近9小時最後到週六07:20先起飛。

本來港航已經安排咗250名受影響乘客入住酒店，但其中一團60人中華牌知道港航曾因為一班由上海經香港轉飛印尼峇里嘅航機Delay，公司安排唔到約200多名pax 入住酒店，最終向每名乘客賠償HK$2,500，就有樣學樣，堅持唔入住酒店，仲威脅唔上飛機，迫港航賠錢。最後港航屈服，每人賠HK$1,500，仲有啲乘客唔Like添！

睇完呢單新聞，如果我係港航，我一定唔ｘ小佢。我已經安排你住酒店仲想屈我錢？咁請問個班入住咗酒店嘅pax呢？有冇一視同仁賠番HK$1,500？不如咁啦！我建議港航以後唔駛煩喇，叫班Ground準備現金／機票兌換券係手，一Delay夠幾粒鐘就派錢，無謂辛苦前線人員啦！你睇條片，見個Ground黑口黑面講堅持講廣東話就知。嘿！國際航空業有規有舉架！點輪到班中華牌話晒事？

（記得按下面「讚好」Share俾Facebook朋友）

新聞來源：hk.apple.nextmedia.com

相關片段

[youtube http://www.youtube.com/watch?v=vcyRm0QZTR0]

澳航呢排真係多事故，之前又話員工罷工，26/8喺香港機場又有一位醉漢喺機上鬧事打傷空中服務員，點知尋日又多一單。

尋日下午17:20，一架由倫敦飛香港嘅波音747 QF30航機抵港。當飛機喺轉飛澳洲墨爾本前90分鐘做例行檢查時，工程人員發現機翼阻力板壞咗。由於未能及時搶修，341位轉機客被迫滯留本港。

由於尋日好多酒店都Full House，航空公司搵極都冇房，最後只好安排有小朋友嘅客去機場貴賓室休息，而其他乘客就要瞓機場，公司有派發毛毯同餐券。到週四早上仲未搞掂，航空公司決定將原本飛去倫敦嘅QF29改飛墨爾本，呢班滯留客最後於8點離港。至於原本QF29嘅客，就被轉去同系國泰嘅CX257同CX253（唔知呢班客又有乜嘢賠呢？我明明睇陳奕迅你迫我睇林峰……）。

消息來源：www.smh.com.au

（記得按下面「讚好」Share俾Facebook朋友）

Ｗeeeeeeeeee~~~~~好Cute！唔知有冇航空公司唔怕死，油番隻玩下？　:P

仲有其他Angry Bird Family嘅機款：www.flightsim.com

（記得按下面「讚好」Share俾Facebook朋友）

今早澳洲時間10:25分，一架加航AC34航班從悉尼前往溫哥華及多倫多。起飛後，機員發現廚房內一部焗爐冒煙，機長立即宣佈回航，喺海上放油後，於中午12:16分安全降落悉尼機場，機上264位乘客並無受傷。機長報告事件只係輕微，但為安全起見必須回航，澳洲運輸安全局亦表示無需調查。喺機場拆除事固焗爐後，班機已於下午1:55分再度起飛。

呢單虛驚其實好少事，不過自從被轉發上大陸微博後，立即引起唔少討論。好多人將佢同溫州動車意外相提並論，並大贊加航關心人命安全。「焗爐冒煙咁小事都回航？」，「回航放油啲錢好貴喎！」，「羨慕，我哋啲領導一定唔捨得俾！」。其實唔係加航特別好，只係大陸班官特別差啫！

消息來源（有片！）：www.smh.com.au

（記得按下面「讚好」Share俾Facebook朋友）

深圳機場第2條跑道已於26/7正式開通，係繼北京、上海、廣州、成都、重慶同昆明機場後擁有多條跑道嘅機場。第2跑道建於現有跑道西邊，長3,800米、闊60米，可以升降大型客機如A380巨無霸。加上同日T3大樓封頂，意味住深圳機場進一步威脅香港機場地位。

近年，深圳機場不斷發展，喺2010年總乘客量高達2671.3萬人次，已經追到香港嘅一半，並打入全球機場50強。而將於明年底使用嘅T3大樓，總面積更係T1+T2加埋嘅3倍！你仲敢睇少佢？

隨住新跑道同新大樓建成，當深圳機場成功舒緩現時升降航班壓力後，下一步必然係爭取開設更多國際航班。依家佢已經有超過80個國內航點，並且有台灣/南韓/曼谷/馬來西亞甚至澳洲悉尼嘅航班。若然今屆大運會順利舉行，國際間必然對深圳更刮目相看。隨住機場硬件提升，加上本身已經有咁多客流量，國際航空公司一定對呢班轉機客虎視眈眈，搵機會落戶深圳。睇怕到時想Cheap Cheap地去美國 / 歐洲，就要去深圳機場出發啦！

（記得按下面「讚好」Share俾Facebook朋友）