又係AirAsia，今日又有新消息！不過係壞消息。

AirAsia宣佈，由下個月21/9/2011（GMT+8）起，訂購馬來西亞亞航（AK）及AirAsia X（D7）嘅旅客，如需使用AirAsia機場櫃位辦理登機手續，佢會收你每人馬幣10蚊（=HK$30）手續費。之前訂飛嘅客（就算出發日期係21/9/2011後）全部不受影響。登機手續費適用於馬來西亞亞航（AK）所有航點（即包括香港出發去馬來西亞）。至於AirAsia X （D7）除咗日本東京羽田機場、大阪關西國際機場、韓國仁川國際機場同伊朗德克蘭國際機場外，其他航點用櫃台Check-in都會收你手續費。即係話，假設你由吉隆坡搭AirAsia X （D7）去德克蘭，係吉隆坡LCCT櫃台Check-in就會收你HK$30，而回程喺德克蘭就唔收（好奇怪！）。

慶幸嘅係，好多香港人搭嘅泰國亞航（FD）未受影響，繼續提供免費櫃台登機服務（不過遲早都收啦）。總之駛唔駛俾錢，就睇下你買嘅AirAsia係 under 邊間子公司（AK/FD/D7…）。

想慳番呢幾十蚊，就要使用網上或手機登機服務。喺起飛前1小時（AK） / 4小時（D7），都可免費網上Check-in，搞掂後Print番張登機証出嚟就掂。你有行李寄倉，記得拎埋張登機証去Baggage Drop Off櫃台辦理（雖然唔駛俾HK$30，但你都必須喺出發前先去airasia.com 網上購買’加碼行李’服務）。

呢單嘢最慘嘅係，你冇Printer一定要焗俾HK$30！因為AirAsia喺香港機場仲未設有手機 Mobile 2D bar code 掃瞄器同Kiosk，一定要靠張紙登機証上機。不過好在AirAsia依家改咗Check-in政策，最長出發前400日至1小時（AK航班）/4小時（D7航班）已可以做網上check-in，喺香港一次過做晒兩程機位，只係到時你唔見咗張登機証就煩囉～～～

詳情請瀏覽：www.airasia.com

（記得按下面「讚好」Share俾Facebook朋友）

呢排圍繞AirAsia嘅新聞多到痺，單單夠震撼。除咗佢同ANA組成AirAsia日本以及同馬航結盟外，仲有三單猛料今次簡括呈上。

1. AirAsia菲律賓接收新機：AirAsia菲律賓係繼AirAsia、AirAsia X、AirAsia泰國、AirAsia印尼、AirAsia越南後第六間子公司（第七間就係AirAsia日本），以克拉克 （CRK）為基地，前日終於接收咗第一架A320飛機，預計10月份取得相關許可證，開辦飛往新加坡、香港、澳門、曼谷、韓國仁川同國內兩個地點嘅航班。除咗呢架新機外，到明年初將會接收另外3架新機。

2. 進軍歐洲：第八間子公司，好有可能係AirAsia英國！AirAsia一直希望同歐洲廉航結盟，2007年曾經傳佢同英國Easyjet及維珍航空傾合作，不過最終只聞樓梯響。AirAsia老闆費爾南德斯（Fernandes）可能忍唔住索性自己搵「拍乸」。12/8佢喺Twitter留言，表示正前往倫敦，「為聯營計劃作最後相討，稍後將呈交亞航董事局」（Closing off a new potential jv to submit to the board for airasia），咁新「拍乸」究邊係邊個？歐洲廉航業已經鬥到你死我活，佢依家先起步，淨係做歐洲線仲有數維咩？唔通齋做長途廉航？咁自己都有AirAsia X啦！駛乜搵「拍乸」？

3. 收購英超球會：一直以來，AirAsia積極贊助英超同英冠賽事。上屆英冠冠軍，今年英超新升班馬昆士柏流浪，班主艾利史東一直想趁升班賣盤套現。據英國報章報導，AirAsia老闆正準備以1億英磅收購該隊，並已同領隊華域克（Neil Warnock）接觸，而球隊亦於28/7發聲明話已經有第二位買家傾緊（即係佢）。但係人都知阿Fernandes係韋斯咸忠實Fans喎！他日兩隊對賽，佢會唔會……

AirAsia老闆費爾南德斯Twitter：http://twitter.com/#!/tonyfernandes

（記得按下面「讚好」Share俾Facebook朋友）

P.S. 不如睇番前日AirAsia菲律賓接收首架A320新機儀式啦！
[youtube http://www.youtube.com/watch?v=CCDlWg6pU-E]

上年仲大鑼大鼓話今年會正式加盟寰宇一家（One World）嘅印度翠鳥航空（Kingfisher Airlines），最近出現財政問題。據印度傳媒引述公司員工透露，7月份嘅糧仲未出，而自上一年起出糧日期已由31號延遲到7號．至於3架租返嚟嘅飛機都欠交租。「不過可能找咗數，就係咁我哋先冇糧出。」該員工無奈表示：「公司話冇錢，出糧日期冇著落。」唔單止欠人工，佢哋仲爭當地飛機燃油供應商同機場服務費用。公司發言人就賴之前印度有銀行罷工所致，咁嘅藉口都講得出，睇嚟真係好唔掂檔，奉勸各位暫時唔好幫襯佢（雖然好少香港人搭呢間航空公司）！

新聞來源：www.business-standard.com

（記得按下面「讚好」Share俾Facebook朋友）

機師一路揸飛機一路玩iPad？仲要攞正牌？真架！長榮為咗方便一眾機師，唔駛次次拎咁大個喼返工（包括重疊疊嘅飛行操作手冊、航空圖、基本配備清單同埋航空日誌等資料），自上個月起已陸續派800台iPad俾機師，裡面裝晒長榮專用Apps，咁機師以後只要一按就睇到飛行操作手冊電子書，又可以用iPad寫飛行報告，一按就Send返台灣總公司。而其他飛行資訊如個人班表、機隊公告、航圖、天氣資訊亦可以一按即有，聽落去真係幾方便！況且減輕飛機重量，長榮又可以慳下油，絕對一舉兩得。

長榮見機師反應唔錯，話會喺今年10月起將之推廣至機艙服務員上，以後機艙阿姐／阿哥（即係事務長，最大粒個位）只需喺iPad嘅客艙服務資訊管理系統Apps一按，即刻有晒所需資訊，就算喺海外都可以迅速將旅客要求、異常狀況等飛行報告Send返總公司。蝦！唔知呢個Apps有冇啲麻煩客戶資訊，等阿姐一按即知然後有所準備呢？

依小弟愚見，iPad Apps的確方便一眾機師／事務長執勤，但如果航行途中，iPad突然瓜柴（例如Hang機、冇電）咁點算呢？長榮話自數碼化後從來未遇上呢種情況，吓？乜冇Contingency Planning咁危？起碼都應該有一套Hard Copy卦？仲有，唔知長榮有冇iPad使用守則？揸緊飛機玩憤怒鳥（Angry Bird），下場會唔會同人地玩「露鳥」一樣架？講清楚好喎～～～

（記得按下面「讚好」Share俾Facebook朋友）

P.S. 圖中嗰位係長榮航空總經理張國煒，呢位有飛行執照嘅長榮太子爺，出名橋王！Hello Kitty飛機就係佢主意，今次iPad新猷唔駛問阿貴都係佢Baby啦！

國泰機艙「露鳥」事件唔單止係城中熱話，全球唔少傳媒都報導過，大大打擊國泰形象。國泰航空行政總裁史樂山已發表聲明，話相中機師同空姐經已離職，但冇講係自己辭抑或被炒．而據今日南華早報報導，表面上雖然已告一段落，但原來仲有手尾跟。

國泰繼上年推出以真實員工為主角，Sell優質服務嘅”People & Service”廣告系列後，見反應唔錯想今年「添食」。新一輯會以一眾著便服嘅機師、機艙服務員、地勤同其他員工為主角，以”Meet the team who go the extra mile to make you feel special”為題，Sell佢地就算落咗班依然樂意為你服務．據報導所講，本來呢輯環球廣告經已準備就緒，發生咗「露鳥」事件後，國泰正考慮叫停，費時等啲口痕友乘機再踩國泰一腳，笑班員工可以俾人客既extra又好feel嘅「服務」！至於幾時先拎番出嚟，消息人士話未有時間表。

計我話咁搞法，冇一年半載都唔駛旨意解凍。面對形象受損，睇嚟國泰依家可以做嘅嘢唔多，我建議國泰不如轉移公眾視線，推銷多啲未來發展（如新航線，新機種），又或者趁秋冬淡季推出更多特價機票，等人客快啲忘記事件。至於Sell服務嘅廣告，擺下先啦！

新聞來源：www.scmp.com

（記得按下面「讚好」Share俾Facebook朋友）

印尼機票一向唔平得去邊，競爭細，班次少。直航首都雅加達，最平嘅就係華航。佢地做緊優惠到31/12，去Zuji出一張0-60天機票HK$1,740（連稅HK$2277），官網都冇呢個Offer。最正係有效期內可以免費改期，平飛嚟講算係唔話得。不過華航出發時間麻麻地：去程16:35/20:20；回程06:25/12:25。無辦法，鬼叫佢係台北駁機咩。

所以我一直都唔明，既然AirAsia喺印尼有Hubs，點解唔開多啲香港印尼航線？棉蘭航線嘅失敗只係揀錯地點而已。你試下開香港<->峇里吖！班班坐滿都得呀。

網址：www.zuji.com.hk

（記得按下面「讚好」Share俾Facebook朋友）

有一單新鮮滾熱辣嘅國際航空大事，比今日股市跌千點仲爆！

AirAsia同馬航今日聯合宣佈，簽署合作戰略協議，從此結束互鬥多年嘅局面。根據協議，雙方會以股份互控方式，馬航大股東「國庫控股」（ Khazana）將會持有10%AirAsia，而AirAsia母公司Tune Air將會持有馬航20.5%股份。此外雙方小股東將免費獲發認股權證，馬航小股東將以30股送1股AirAsia認購證，而AirAsia小股東則以10股送1股馬航認購證。而馬航原本CEO就今日正式起身。

雙方表示今次協議有助減低營運成本，喺購買飛機、維修、地勤、貨運、餐飲、員工訓練等加強合作，避免再互相競爭。當地分析師估計雙方合作每年可以帶嚟超過26億港元嘅協同效益。

喺航線方面，馬航同意日後集中高端航運業務，以後廉航服務就俾晒AirAsia，所以旗下廉航Firefly將會「光榮結業」。我相信正係AirAsia肯同馬航合作原因，事關近年Firefly已不斷透過超低價機票，食晒AirAsia喺東馬市場，而且成本高昂一直困擾AirAsia，今次合作，既可保住自己大半江山，又可藉共用資源減輕成本，有So吖！而馬航方面，可以專心發展Full Service Carrier又可收復老對手，梗係Happy啦！

不過班員工就慘囉！合併呢家嘢，你估1+1=2咩？馬航同AirAsia根本係兩家唔同文化公司嚟，一家係老爺式半政府機構，乜嘢都講架構論資排輩；AirAsia就活力十足，鼓勵員工創新，所以員工大部份係後生仔女。叫佢地工作上合作喎！點頂呀？

至於一般「旅民」，呢單嘢究竟是禍是福，唔可以咁快下定論住。當然合併後馬來西亞航空業會重回壟斷局面，喺冇競爭下，低票價（甚至$0票價）會唔會成為歷史？但另一方面，近年環球航空業成本激增（尤其係燃油），加上新一輪經濟衰退已迫在眼前，雙方繼續鬥只會兩敗俱傷，甚至倒閉。反正今次合作戰略協議有效期為5年（5年後可以再續5年），依家試婚先，睇定啲，長遠計未必壞事。

新聞稿：http://www.khazanah.com.my/docs/JointPressRelease-090811.pdf

（記得按下面「讚好」Share俾Facebook朋友）

中國國航為慶祝佢首架777-300ER投入服務，喺7月尾起至8月底喺網上搞咗個「國航飛機我命名」徵名大賽，勝出者可以幫佢首架777-300ER命名，而國航亦會送出8套雙人來回機票及精美紀念品俾富創意嘅網民。本來係一件「低成本、高效益」嘅Online Marketing Campaign，只可惜活動欠細心策劃，引發唔少網民批評。

1. 忽略做票

由於只有微博用戶先可投票，而開戶絕無難度（國內有唔少「空帳戶」、「假粉絲」），結果引發大量假票，搞到國航拿拿林關閉投票，將疑似做馬嘅票數「歸零」，然後重開投票，但已經引起唔少網民怨聲載道大呼投票唔公平。

2. 突然改變玩法

8月6日前，本來實行1位微博用戶/1命名/5票/1天，希望多啲票數從而帶動更多轉發機會，但8月6日後重開投票後，即刻改番1位微博用戶/1命名/1票/1天，咁對於本來票數少嘅網民唔公平，因為依家只得1票，任啲Friend點投都追唔到前領者啦！

3. 真係改乜都得？

表面上任你改名，即改即上載俾人投票，結果有啲名無耐就被人「河蟹」。由於總冠軍以票數定勝負，唔少網民覺得國航你既然咁怕啲敏感字眼（如「動車號」）羸出，咁不如一早就用「專業評審」（咁即係內定？）定勝負算吧！駛乜扮晒開明咁核突？

4. 揀錯獎品？

活動大獎係1張雙人來回德國法蘭克福機票，另有3張雙人來回日本沖繩機票作抽獎用。有憤青話日本同德國都曾經對中國人民情感帶嚟傷害，作為代表國家嘅航空公司，唔應該送呢啲地方嘅機票喎！

活動網址：http://client.sina.com.cn/zt/airchina/index.shtml

（記得按下面「讚好」Share俾Facebook朋友）