今個月2號，Tiger Australia 虎航因為兩度低飛，被澳洲民航安全局（CASA）史無前例下令其所有澳洲國內航班停飛5日。咁大鑊嘢發生後，有人疑似唔識死，又再上演「低飛表演」，今次主角竟然係飛安指數極高嘅泰航！話說喺今個月24號晚20:19分，一架由曼谷飛去澳洲墨爾本機場嘅波音777-3D7客機，喺距離機場約11公里下降途中，飛行高度跌到只有1,000公呎，遠低於民航局要求嘅2,000公呎，最後架機安全降落。澳洲運輸安全局隨後展開調查，初步認為屬「嚴重事故」，暫時未有最後報告。泰航未有回應事件。

前車可鑑，雖云虎航被停飛原因甚多，低飛只屬導火線，但兩單嘢發生時間太近，而且叫得做「嚴重事故」，澳洲當局好難唔用相似方式判罰泰航。至於被罰停飛嘅虎航，已宣佈於下月6號重投服務。冇飛成個月，埋單計數，原來損失高達HK$68,800,000！

相關新聞：www.smh.com.au

（記得按下面「讚好」Share俾Facebook朋友）

我搭親飛機，最怕遇著中華牌，又嘈又盛，如果搭長途機，一定冇覺好瞓。所以當我睇到呢單新聞，心都涼晒！

話說喺上星期六，一班由馬尼拉飛去宿霧嘅宿霧太平洋航空上，有班大陸傳媒團係機上大聲講細聲笑。當時菲律賓總統阿基諾三世嘅大姐瑪麗亞同佢老公克魯斯亦都坐同一班機上。你知啦！架機咁細（唔係坐A319就係A320），佢地咁嘈，唔煩有鬼！當克魯斯擰轉頭同佢哋講可唔可以細聲啲個陣，有2位旅遊記者好惡咁衝上去佢度，一手揪起佢衣領作勢想打柒佢，好在機員及時分開兩幫人。飛機降落後，呢12位中華牌旅客就被菲律賓警方帶走，經調查後，最後將個2位中華牌遞解出境，Blacklist佢哋，以後咪駛旨意入境！

簡直大快人心！各位下次搭飛機遇著佢地，唔好忍啦！投訴啦！

消息來源：www.theage.com.au

（記得按下面「讚好」Share俾Facebook朋友）

尋日，第一家買入A380空中巨無霸嘅中國航空公司：中國南方航空，公佈咗首架A380客艙佈局。上層設有8個頭等艙，採用包廂設計（似Emirates，唔係泰航嘅半包廂），中間設有商務艙，以交錯方法設置70個坐位，提高私隱度，全部設有Flat Bed Seat。經濟客位就有428個，同Emirate/泰航唔同，上層尾部都設有經濟客位。

就咁計，有啲奇怪：泰航經濟艙只設於下層，有435個坐位，但南航上層尾部都有經濟客位喎！但總數只有428，咁係咪代表經濟位好鬆動？頭等艙只有8個，比Emirates（14個）、泰航（12個）、新航（12個）、大韓（12個）都要少，唔通呢8個位好闊好舒服？有期望喎！唔知幾時有得睇真身？

（記得按下面「讚好」Share俾Facebook朋友）

西藏咁大，原來冇自己嘅航空公司。首家以西藏為基地嘅西藏航空今日首航。今早10:26分從拉薩貢嘎機場起飛，經過1:40分鐘飛行到達阿里嘅坤沙機場，成功實現高原對高原飛行。

西藏航空暫時只有一架A319飛機，另外仲有2架分別於8月3日及9月13日交付，公司冀望5年內增至20架，更希望實現國際航班。

飛機特別為高原飛行而改裝，機內嘅供氧系統特別採用6個氧氣樽，途中萬一遇上突變，可以為乘客提供55分鐘氧氣，比一般非高原飛機採用嘅化學氧氣供應機多出33分鐘，令高原飛行更安全。至於你關心嘅空姐，當然請番藏族靚女（仲要大學畢業添）！

除咗拉薩飛阿里外，西藏航空仲有重慶/成都飛拉薩嘅航線，暫時網站未有特價票推出。如果有一日香港直飛拉薩就正囉！

網址：www.tibetairlines.com.cn

（記得按下面「讚好」Share俾Facebook朋友）

溫洲撞車，人民心驚！你仲夠唔夠膽搭高鐵？中國人反應最快，短程機票由無人吼頓變搶手貨。香港上市個啲國內航空股仲日日升添！唉！

講開國內航空公司，自從第一間廉航：春秋航空宣佈最快明年初喺上海A股市場上市後，國內三大國企航空公司：國航、東航同南航都有風吹出嚟話會搞廉航。據新華社報導，三間航空公司係內部會議上明確提出涉足廉航計劃，但就未有最後決定同時間表。不過隨住全球廉價興起，加上近期連串高鐵事件，國企開廉航只係遲早問題。

問題就係：中國政府一旦一窩瘋搞一樣嘢，都冇乜好下場。搞廉航，看似簡單（同樣做航空之嘛！），但只要留心睇，國際上真係冇乜邊間傳統航空搞廉航係成功嘅。最出名個幾間：Ryan Air, Easy Jet, JetBlue, AirAsia等等都係靠自己，依附阿媽生個批，最像樣似乎係Jetstar（出自澳航）同Virgin America/Australia （出自Virgin ）。連咁大名鼎鼎嘅新航，佢個仔Tiger Australia最近都因為飛安問題被澳洲當局勒令禁飛。如果以為搞廉航就等如用細機+冇service+機票平，邊有咁易？

2009年，中國投資顧問已經有報告指出，中國發展廉航潛力巨大，有超過7成內陸線（約780條航線）都適合做廉航。個陣國內已經有三家民營廉航開業，包括奧凱航空、鷹聯航空同埋春秋航空。結果呢？奧凱航空因欠款同股東嘈交而被勒令停航兩次，依家只係豆鼓咁細嘅規模；鷹聯最後被重組為成都航空，只有春秋同後來嘅吉祥航空叫住站得住腳。

其實國內搞廉航，有3個問題好難搞，第一係要有足夠數量嘅機師應付龐大嘅客運量（因為廉航要不停飛，無理由同一個機師飛足成日卦？）；第二係國內民眾唔接受乜都要俾錢嘅消費模式；第三係航空管制，點解搭國內航班成日誤點？皆因國內航道有限，廉航用同一架機密密飛，你呢班遲到，會連帶影響同日航班。你間廉航成日唔準時，邊會有人幫襯你？仲有飛安呢？廉航密密飛，飛機損耗比一般航空高，你班國企如果好似高鐵咁，一句口號就匆匆上馬，到時搞唔搞得掂架？高鐵已經怕怕啦！咁多問題一日搞唔好，中國（特別係個班坐食山崩嘅國企）大力搞廉航？嗯！

（記得按下面「讚好」Share俾Facebook朋友）

好眼瞓呀？不如睇下呢張喺Jetstar網站嘅摘圖，睇下有乜唔妥吖？包你醒神！（我估聽朝早就冇得玩lu…）

原圖網址：www.jetstar.com

（記得按下面「讚好」Share俾Facebook朋友）

Yeah！Good News！擁有全球首架波音787 Dreamliner 航機嘅ANA，喺網上宣佈將商業首航獻俾香港！預計10月左右以包機形式由東京成田機場來港，呢個唔單止係航空迷大事，實情係全球焦點！香港今次真係要多謝ANA。想搭呢班機去東京？到時請留意旅行社或ANA藍天假期公佈詳情，因為只會跟團飛出，未必有網上訂飛服務。

新一代787標榜寧靜又慳油，以大量較輕嘅複合材料建造，加上安裝效能更高嘅發電機，令總體燃料節省高達2成，有助飛得更遠、更慳錢。至於大眾關心嘅經濟客位，由於採用固板坐位（即係椅背不可向後側，只可向前滑低），令坐位距離由以往31吋增加至34吋，配合10.4吋Panasonic eX2 IFE 個人視聽娛樂系統，將飛行樂趣大大提升。

不過，呢種坐位其實Out緊喎！事關3年前國泰曾經為旗下長途機改裝過，諗住椅背傾斜唔到可以慳番啲位開多一、兩行賣飛，結果顧客無不坐到腰酸背痛，怨聲載道（包括我，曾經寫過email向國泰投訴）。到近期先宣佈陸續改裝番旗下777-300ER嘅經濟客位，重新俾椅背向後傾斜。ANA依家先嚟用，因住俾班架仔投訴到暈呀！

點都好，再一次感謝ANA對香港嘅寵愛。我都希望買到飛，等我密切留意開賣消息，第一時間係呢度報導！

先睇下客機內部設計片段。廁所有窗口，光光猛猛，好感動呢！睇片啦！

網址：www.ana.co.jp

（記得按下面「讚好」Share俾Facebook朋友）

[youtube http://www.youtube.com/watch?v=G_mN1waur6A]

正當香港機場為興建第3條跑道進行諮詢時，原來鄰埠澳門近年亦為未來機場發展進行討論。上年委託法國公司ADP　Ingenierie負責研究及制訂「澳門國際機場整體發展規劃」，詳細決定將於今年8月底公佈。初步想法係分4個階段擴建機場，包括填海，擴建客運大樓以及將鄰近嘅北安碼頭連成一體，務求強化廉航中心及開拓商務飛機客源。

方向非常正確，但係顧問公司初步預料客流量會於2015年/2020年/2030年增長至560萬/700萬/1,100萬人次，係咪保守咗呢？更因為依家機場客運量可承載600萬人次而建議唔擴建住，等到2020年前先做，我認為太遲喇！呢個正係「雞先定蛋先」問題。

自從2008年起兩岸續步開始直航後，澳門機場作為中轉站嘅角色已不再存在，幸好總乘客人數未有明顯下跌，只係由高峰期2007年嘅549.9萬人次減到2010年嘅407萬，全賴吸引國際廉航進駐（如AirAsia、虎航、捷星、宿霧太平洋、吉祥航空），開拓東南亞市場。不過，澳門航空業受制於專營權限制，想加開新航線亦阻手阻腳。

16年前，當澳門政府興建機場時，就將傾番嚟嘅45個海外航權以及57個國內航點經營權，連同地勤服務、機場配套同營運權交晒俾澳門航空（以下簡稱「澳航」）。從此，澳航就控制晒澳門嘅航空業，雖然有航權係手，但只要佢老哥計唔掂條數，就會將航線閒置一旁，結果因為壟斷而令澳門冇乜海外航線，令澳門人多年來飽受「有航權冇航線」慘況。近年佢先放下3條航線特許俾非凡航空經營，但最終因為佢地經營不善倒閉而收番。有人認為，非凡事件突顯咗澳門搞國際航班根本冇市場，但我認為反而要大搞特搞，唔止搞一間，起碼3-4間，總之開盡晒45個航點，做大個餅，正如當年開放賭權一樣，邊有人諗到今日澳門賭業嘅繁榮盛世？澳門要繼續發展賭業及博覽業，就一定要有足夠嘅國際航班，齋做大陸客唔係長遠之計。

所以顧問初步估計2015年只增加160萬人次，即係每日只增加4,383人？如果澳門政府繼續守抱殘月，單靠外資航空公司發展業務或者會嘅！大膽啲，同澳航買番晒所有專營權吧！澳航唔賣？叫中央政府出手吧（澳航大股東係中國國航）！其實澳門搞廉航市場一定大，非凡失敗只係航點選擇不理想，而且新航空公司需要時間站穩住腳，況且又冇加入國際航空聯盟，做唔到Code Sharing嘅客，唔可以就咁批死澳門本土航空業發展。

另一方面，儘快將北安碼頭融入機場，首先最快最容易嘅係提供免費接駁巴士服務，長遠就要興建接駁輕軌，甚至擴建客運大樓時一併收納其中，吸納更多港客。無理由眼白白睇住外資航空係澳門搞得有聲有色，而自己就被人綁手綁腳卦？

（記得按下面「讚好」Share俾Facebook朋友）