星期一先介紹樂桃航空大阪出發返港首航特價HK$498，誰不知一開唔駛半小時已經搶清光。至於香港出發嘅，今早樂桃航空先通知我哋會喺今日香港時間下午3:30開賣！單程連油附只需HK$698（咦！貴咗兩舊？同埋唔知回程仲有冇呢口價？），出發日期為2/7 – 11/7、21/7 – 6/8、1/9 – 27/9（好在我張飛係七月中去，如果唔係實激Q死）。講真比佢最平只差兩舊水，暑假去就梗係超抵，九月先出發就不如等埋其他航空公司稍後推出嘅淡季劈盤。我估一陣下午3:30開賣時又學上次咁，唔駛10分鐘就搶清光，食完飯下午返到公司，記得準時捕佢開倉啦！提提你，呢口價未包括兩地機場稅、交易手續費HK$42以及行李寄艙費。

網址：www.flypeach.com

（記得按下面「讚好」Share俾Facebook朋友）

AirAsia日本今日終於公佈首批航線詳情：1/8起會率先開航東京<->札幌及福岡，3/8就開埋東京<->沖繩航線。東京札幌每日三班來回，早午晚各一，基本上停25分鐘即走，真係一機走天涯（25分鐘夠唔夠上落客？我擔心會Delay）！東京福岡同樣每日兩班，早午各一，而東京沖繩就每日一班中下午機，詳情可留意AirAsia日本官網。講到標準價錢，東京札幌單程HK$458起（連稅，下同），東京福岡單程HK$518起，東京沖繩單程HK$668起，首航當然會劈價益街坊！有幾平？單程HK$0.5（另加每程HK$15手續費）！限售10,000張！不過適用日期有啲特別：唔係由首航日開始，而係28/8（想食埋暑假高峰期嘛），一直到28/11，淡季日子，不過真係好平囉！唔理啦！先搶咗東京札幌線先，遲啲先買番香港東京線秋天平機票。今晚香港時間23:00開倉，記得一陣去搶啦！想喺AirAsia開倉時暢通無阻去搶票，可睇番我哋之前介紹嘅文章：三招教你突破AirAsia Waiting Room限制，搶飛快人一步！

AirAsia日本網址：http://www.airasia.com/jp/ja/promotion/rr1450811.page

AirAsia香港網址：http://www.airasia.com/hk/zh/promotion/rr1450811.page

（記得按下面「讚好」Share俾Facebook朋友）

ANA近期動作多多，繼旗下以大阪關西為基地嘅廉航樂桃航空於1/7開通香港<->大阪航線外，另一方面與AirAsia合資成立嘅AirAsia日本，亦將於今日宣佈1/8首航。以東京成田機場為基地，開辦東京至札幌、福岡及沖繩航線，航班與價錢會喺今日記招一併公佈。單睇首批航線，對港人嚟講最吸引必定係東京<->札幌啦！皆因香港直飛札幌機票價錢長期高企，連稅冇七八千都埋唔到單，以後有AirAsia日本，只要加張平價香港<->東京機票（唔太難搵），咁就可以平飛札幌；至於沖繩，港航直航機票都幾平下，可以不理；至於福岡，比較少港人前往，加上港龍間唔中劈價，除非AirAsia日本有$0機票啦！首航8至10月平機票會於今晚香港時間23:00開賣，有幾平？稍後Update大家！

網址：www.airasia.com

（記得按下面「讚好」Share俾Facebook朋友）

上星期樂桃航空（即係我哋之前叫嘅桃子航空，依家官方正式正名為樂桃航空）推出香港飛大阪HK$888（連油附，不連稅，下同）優惠後，今日再度出擊，宣佈於本週三（30/5）香港時間下午3:30再推出首航優惠，由1/7 – 12/7大阪出發返港嘅機票，單程由HK$888（即係8,888 JPY）再減至HK$498（4,980 JPY），即係減多HK$400！至於香港去大阪嘅，暫時未有話減，不過到開倉時一併睇埋冇走雞！如果來回都一齊減，連稅真係分分鐘跌至HK$1,400-1,500左右。不過根據上次開賣經驗，分分鐘係分開劈，倘若你到時買咗回程平機票，去程點算好？照買抑或再等首航平機票（如有）？冇咪要被迫last minute追價？唉！都唔知點答你好。

網址：www.flypeach.com

（記得按下面「讚好」Share俾Facebook朋友）

突然收到桃子航空電郵告知，香港區網站將於今日下午3:30開始售賣香港飛大阪嘅機票（之前同大家報過開賣，不過當時只係賣大阪返港），單程機票Happy Peach HK$888起，Happy Peach Plus HK$1,138起（包寄一件行李及可指定坐位），另外再收每人每程HK$21手續費，暫時唔收燃油附加費（機場稅照收），總之大約二千頭連稅就可以來回鳥！不過據上次開賣大阪返港航班經驗睇，佢唔會日日都有HK$888，大時大節當然唔駛諗，主要集中平日起飛，出發日期為2/7 – 28/10，去程零晨機MM68 00:50/05:30，回程MM67 21:10/ 00:05，但平到咁跨張，點會介意呢？

網址：www.flypeach.com

（記得按下面「讚好」Share俾Facebook朋友）

暑假平飛日本，之前淨係搵到達美／聯合去到18/7前嘅優惠，之後呢？今日就介紹呢隻震撼筍盤。港航提早21日前預訂日本各城市機票，都有筍盤價（仲要係14日有效期），飛東京HK$1,900（未連稅，下同），大阪HK$2,300，沖繩HK$2,470（週日至三出發）或HK$2,780（週四至六出發），7至8月都用得。8月喎！8月喎！唔加價都偷笑啦！Check過系統，大阪唔係日日有，難搵啲；東京大把，沖繩仲勁多位，嘩！陽光與海灘呀！年年暑假飛沖繩貴到阿媽都唔認得（淨機票起碼HK$4K），呢次以冬天價飛夏天，係咪好筍呢？多謝港航啦！

網址：www.hongkongairlines.com

（記得按下面「讚好」Share俾Facebook朋友）

去大阪，從此可以平通街啦！日本廉航桃子航空正式宣佈，明午開賣香港<->大阪航線！呢條新航線將於1/7起開航，每日一班，香港出發為深夜00:50/05:30，大阪回程為晚上21:10/00:05(+1)，可以係機上訓，慳番一晚酒店費，以後想週末偷跳大阪就Very Easy啦！為慶祝開航，聽日下午2:00起網站正式開始接受預訂（佢冇講明下午2:00係日本時間定香港時間，我就建議當日本時間好啲：即係香港時間下午1:00），最平個隻Fare為Happy Peach，單程HK$888，另加每程HK$21手續費，至於行李寄艙，每件20KG盛惠HK$160，都算合理。佢暫時唔收你燃油附加費，加加埋埋，應該二千頭有交易，以後去大阪想平，駛乜捱印航？聽日記得準時搶飛啦（如果佢中文網未得，可以去英文）！

網址：www.flypeach.com

（記得按下面「讚好」Share俾Facebook朋友）

3月頭個陣，我哋「又飛啦！」曾經報過日航飛東京2人同行只需HK$2,100（未連稅，下同），仲送你15個杯麵。可能啲飛仲未去得晒，日航靜靜雞再減，不但減兩舊至HK$1,900，今次仲唔駛2人同行，單飛都得，仲要早去晚返（去程JL736 10:40/16:05；回程JL735 18:20/22:00），當然冇杯麵送啦！飛札幌一樣有特價，減到HK$3,200添（不過需轉機）！最搞鬼係……今次唔喺官網做特價，反而改喺日航天地官網做，唔係好多人知！所以Check過系統，都仲有唔少日子有飛。呢批Fare最後出發日期去到30/6，比上次仲多20日添！唉！遲訂仲好！

留意位：

1. 機票有效期：0-10日

2. 出票日期：即日至28/6

3. 出發日期：即日至30/6

網址：www.jalsatellite.com.hk

（記得按下面「讚好」Share俾Facebook朋友）