國泰早前宣布由08/12/2014起，重開闊別超過10年嘅曼徹斯特以及喺29/03/2015起再開辦蘇黎世直航。依家已經有首航劈盤賣：來回淨機票HK$4,095起，連稅計飛曼徹斯特HK$7,068起、蘇黎世HK$6,546起。以價論價，曼徹斯特由於得國泰獨家經營，呢口價尚算合理；至於蘇黎世，依家直航都有瑞士航空幫手，以呢口價咁早入呢件超遠期期貨，唔係太So，除非您堅唔國泰唔搭啦！不過，呢隻盤都仲有兩大賣點：1. 可以做Open-Jaw（來或回程可選擇：倫敦、巴黎、羅馬、米蘭、法蘭克福或阿姆斯特丹）；2. 機票有效期長達2個月，一般只係1個月咋！您可以靈活安排行程，暢遊歐洲。下年想去阿爾卑斯山或去睇曼聯主場嘅您，可以考慮嘅！最後出票日期為30/06/2014，可以上ZUJI買。

曼徹斯特出發日期：08/12/2014-17/12/2014、23/12/2014-31/12/2014、09/01/2015-16/02/2015、22/02/2015-01/04/2015、07/04/2015-31/05/2015

蘇黎世出發日期：29/03/2015-01/04/2015、07/04/2015-31/05/2015

網址：www.zuji.com.hk

新航線！超遠期平貨！國泰直航蘇黎世曼徹斯特來回$4,095起

倫敦直航機票好少有平（除咗國泰出fanfares價），如果唔介意15/6前出發，呢隻其實幾抵買：維珍航空剛延長佢隻直航優惠，來回淨機票HK$3,500起，連稅HK$6,977，比中東三寶轉機貴幾百蚊而已，直航喎！是抵買的，而且維珍話晒來回都係夜機（去程VS201 23:25 / 05:25，回程22:30 / 17:50），一上機可以大覺瞓，瞓醒食完早餐／晚餐就落機，爽呢！Check過系統，供應量唔太多。機票有效期1個月，最後出票日期為13/5（即係聽日），ZUJI有售。

提提您：呢隻平飛Class Code係”O”，有積分儲，可以儲落維珍flyingclub 或同系嘅達美航空「飛凡哩程常客計劃」，同樣儲足100%里數（約11,940里），建議入落達美度，話晒佢係Sky Team（天合聯盟）一員，將來兌換免費機票都有多啲航空公司揀（例如可換華航台灣線）。

網址：www.zuji.com.hk

（覺得抵請記得按Like同Share俾朋友）

直航筍盤！維珍春季飛倫敦來回$3,500起，1個月有效期，6月15日前出發

維珍航空又有優惠機票，航點眾多，早入貨，早享受！

飛英國（倫敦／愛丁堡／曼徹斯特／鴨巴甸）來回淨機票HK$4,880起，連稅HK$8,457起，14/12/2013前出飛。賣點係出發日期去到18/06/2014都得（01/01/2014 – 12/01/2014不適用），兼長達2個月機票有效期。

飛澳洲（悉尼／阿德萊德／布里斯本／坎培拉／黃金海岸／墨爾本）來回淨機票HK$3,300起，連稅計HK$6,119起，出發日期由11/02/2014 – 03/07/2014；04/08/2014 – 31/10/2014，20/12/2013前出飛，Check過系統，供應量充足，農曆新年後想返澳洲探親者要入手。

筆直高一啲，不如歎下特級經濟客位（Premium Economy）。

飛以上英倫四城淨機票都係HK$11,880起，連稅HK$16,502起，14/12/2013前出飛，出發日期由依家至31/12/2013；13/01/2014 – 18/06/2014。

飛以上澳洲六城淨機票都只係HK$9,380起，連稅HK$12,199起，出發日期由依家至02/07/2014；22/07/2014- 31/10/2014。

賣點：機票有效期長達1年！咁就值錢喇（移民客，留學生最Like）！Check過系統，無論飛英國或澳洲，農曆新年期間出發都仲有！要快手喇！

最後出票日期如下：
飛英國經濟客位及特級經濟客位：14/12/2013
飛澳洲經濟客位：20/12/2013
飛澳洲特級經濟客位：14/2/2014

燃油附加費及稅項如下：
飛英國經濟客位：HK$3,577起
飛英國特級經濟客位：HK$4,622起
飛澳洲經濟／特級經濟客位：HK$2,819起

網址：www.virginatlantic.com.hk

（覺得抵請記得按Like同Share俾朋友）

多謝fans Janice Liu報料，搵到新漏洞機票：廣州來回英國紐卡素，搭中國南方航空 + 英航（倫敦）／法航（巴黎）／KLM（阿姆斯特丹）歐洲轉機，來回連稅CNY3,525（約HK$4,410），出發日期主要集中喺2014年1至2月，其中以附圖農曆新年期間出發最為吸引（30/01去09/01返）。不過我哋Check過晒，暫時只有國內攜程網（http://english.ctrip.com/flights/）先有此價，官網冇，估計認數機會唔高，不過唔介意冒險者可以照Book，話晒農曆新年呢個價，連去日本都唔得啦！

（覺得抵請記得按Like同Share俾朋友）

直航長途平飛，又有兩單，都係維珍嚟！首先係飛倫敦，直航來回淨機票HK$4,340起，連稅HK$7,784起，同對手英航相若，但整體質素就正幾條街，機票有效期60日，出發日期由6/10 – 31/12；13/1 – 31/3，去到明年首季都得，而且聖誕新年亦冇限制睇供應，適合移民客探親之用。除咗倫敦，搭維珍小紅線接駁去鴨巴甸／愛丁堡／曼徹斯特都有平，連稅HK$8,453起，最後出票日期為16/9。

另一戰線係悉尼，直航來回淨機票HK$3,460起，連稅HK$6,166起，出發日期由3/9 – 19/9；14/10 – 18/12；5/1 – 22/1；4/2 – 30/6，嘩！踏正晒澳洲夏天旅遊旺季，呢個價仲唔發達？機票有效期更長達1年，比對手澳航嘅1個月長得多，唔駛諗，即入！最後出票日期為13/9（下週五）。

想豪啲？坐特級經濟客位（Premium Economy）飛倫敦一樣有So：來回淨機票HK$10,840起，連稅HK$15,291起，同商務一樣可優先提取寄艙行李，出發日期為1/10 – 10/12；25/12 – 31/12；19/1 – 31/3；至於非凡商務客位（Upper Class），飛倫敦來回淨機票HK$33,340起，連稅HK$37,791起，慳咗足足八千幾；飛悉尼淨機票就HK$22,990起，連稅HK$25,696起，亦比以往平咗五千幾，有筆直人士可以考慮下。

溫馨提示： 以上所有淨機票票價唔包括須預先繳付嘅稅款及燃油附加費，每張機票嘅稅款及燃料附加費為HK$3,444起（飛倫敦經濟客位）／HK$4,113起（飛英國經濟客位）或HK$2,706起（飛悉尼所有客艙），實際款項或會因匯率及燃料附加費嘅更改而有所變動，資料僅作參考之用。

網址：http://www.virgin-atlantic.com/zh_tw/hk/specialoffers/index.jsp

（覺得抵請記得按Like同Share俾朋友）

上週同大家介紹過淡季超平歐洲機票，不過都係轉機，咁香港直航呢？都有平，今次先介紹英航，直航倫敦來回淨機票HK$4,380起，連稅HK$7,831起，賣點係22/10起有得搭全新A380機（記得去程揀BA26（23:25/04:50），回程揀BA25（18:35/14:10）），而出發日期更去到明年31/3，機票有效期又有2個月，比一般平機票抵。Check過系統，呢一刻訂明年農曆新年都有呢口價，咁又唔錯喎！想轉飛其他英國城市？英航淨機票一樣HK$4,380，連稅就睇您揀邊個城市，例如曼徹斯特就HK$8,644起，至於歐洲城市，比較貴，唔建議買喇！最後出票日期16/3。

網址：www.britishairways.com

（覺得抵請記得按Like同Share俾朋友）

如果您今年春季已決定去歐洲／中東／非洲者，要留意！SPG喜達屋酒店集團（旗下有Sheraton，W Hotel，Le Meridian，Westin，Four Points，St. Regis，A Loft等等）低調推出一個本來專為德國柏林旅遊展而設嘅半價優惠：訂購奧地利／捷克／埃及／法國／德國／希臘／意大利／馬爾他／毛里裘斯／波蘭／葡萄牙／卡塔爾／塞舌爾群島／西班牙／土耳其／烏克蘭／阿聯酋／英國嘅指定城市及指定酒店（數量雖然唔多，但間間都有睇頭），最平半價！入住日期為30/6前，由於小弟正好復活節去歐洲，立即Check過，真係堅平！例如米蘭嘅Sheraton Diana Majestic Milan，平時訂單人房都要HK$1,000以上，依家HK$500搞掂！Location仲要靚到絕：距離大教堂步行20分鐘，距離購物區只有10分鐘！唔駛諗，光速入手！仲有Check過W Barcelona（全海景架），入門版竟然低至HK$1,620，出面依家訂都要HK$3,200以上！W Hotel喎！仲有法國巴黎Le Méridien Etoile，HK$1,400都有得住！呢間近香榭麗舍大道！不過建議大家入手前先去http://www.hotelcombined.com做比價，雖然絕大部份堅減，但有啲未必係半價，宜先做功課！最後訂購日期為17/3。

提提您：未係SPG會員嘅您，佢有一個免費升金卡優惠：只要用任何一張Master Card（話就話World Card，實情係一般Master Card都得）喺亞洲地區住一晚即可免費升上金卡，您咪求其去澳門Westin／深圳福朋Sheraton，甚至香港Sheraton住一晚咪交咗功課囉！SPG金卡會員福利都幾好架！例如每US$1消費可獲得3點 Starpoints積分，比普通會員多50%，易啲賺免費房，當然例牌嘅4pm Late Checkout同埋Welcome Gift梗有啦！想申請，請按此（此優惠到30/3/2013止）。

網址：http://eame.specials.starwoodhotels.com/itb50/multibrand/en

（記得按下面「讚好」Share俾Facebook朋友）

今日搶唔到$10飛法蘭克福機票？唔緊要！等荷航同法航幫您！兩間航空公司（其實都係同一間，因為已經合併咗）聯手推出飛歐洲HK$3,040淨機票優惠，出發日期為1/3 – 30/4，可以揀搭法航或荷航或混合，不過Check過系統，法航直飛巴黎已經冇晒HK$3,040蹤影！荷航直飛阿姆斯特丹都冇，不過兩者都仲有少量HK$3,040但有一程須轉機，連稅HK$5,938起，唔駛HK$6K都算抵買。至於飛其他歐洲城市，呢一刻都唔太難搵到HK$3,040，不過始終佢哋轉機下欄貴，連稅加埋都要六千幾，同卡塔爾甚至阿聯酋航空做特價時相若，未算超級抵，只係一般筍而已。請留意：機票有效期1個月，來回必須跨到一個週日或最少停留5日。最後出票日期為3/3。

荷航網址：www.klm.com

法航網址：www.airfrance.com.hk

（記得按下面「讚好」Share俾Facebook朋友）