12:00 12/12 Update：
〔靜雞雞加價〕之前教大家如果透過哥倫比亞．中美洲航空公司（Avianca_TACA）買里數換商務／頭等艙，有fans報料，佢最近靜雞雞將里數要求提高，對比後發現：
1. 香港<->北美洲：
經濟客位 60,000里 -> 65,000里
商務客位 120,000里 -> 125,000里
頭等客位 140,000里 -> 150,000里（不過換到機會唔大）
2. 香港<->歐洲：
經濟客位 85,000里 -> 90,000里
商務客位 130,000里 -> 135,000里
頭等客位 160,000里 -> 170,000里
3. 香港<->南美洲南部：
經濟客位 90,000里 -> 95,000里
商務客位 140,000里 -> 150,000里
頭等客位 180,000里 -> 190,000里
香港<->澳紐不變
冇辦法，之前太著數！
去旅行，係人都想搭商務甚至頭等客位啦！不過貴呢！飛長途嘅，連稅閒閒地冇3 – 5萬港紙都埋唔到單，今次就詳細教大家點樣以4折或更低價錢，搭星空聯盟（Star Alliance）成員嘅商務／頭等客位！方法係：透過買里數去兌換商務／頭等機票。其實世界各地好多航空公司都有買積分計劃，不過如果冇乜特別優惠，買分換飛係超唔抵嘅，但有優惠就唔同講法喇～
哥倫比亞．中美洲航空公司（Avianca_TACA）自從喺今年6月正式加盟星空聯盟後，耐唔耐都推出里數「買1送1」優惠，每買1,000里俾US$30（HK$234），即係俾完HK$234就有1,000里+1,000里=2,000里，除番開，每一里成本為HK$0.117，仲未計埋您因為簽信用卡而賺取嘅里數呢？
您可能唔識哥倫比亞．中美洲航空公司，甚至未必會搭佢。唔駛理佢吖！由於佢已經係星空聯盟一份子，您可以將佢里數直接兌換任何一間星空聯盟航空公司機票。咁點解要買哥倫比亞．中美洲航空公司嘅里數呢？有四大原因：
1. 官網可直接兌換其他星空聯盟機票，揀搭邊間，乜嘢航班，一目了然，唔似有啲航空公司需要親身打電話／電郵先可兌換其他航空公司機票。
2. 佢唔收燃油附加費！唔單止兌換自己機票，連兌換其他星空聯盟機票亦唔駛俾！須知道長途來回呢條數起碼HK$2K-3K！例如香港飛羅馬為例（見附圖），冇油附下淨係俾兩地機場稅US$38.98（HK$304）+兌換費每次US$25（HK$195），下欄費埋單只係US$63.98（HK$499）！平到冇朋友！
3. 可以部份里數再加現金兌換，最低為40％。不過航空公司條款中，有寫明如果里數係透過「買1送1」推廣中買番嚟，唔可以用呢種混合方法兌換機票。問題係：啲里數有Mark實由邊度走出嚟咩？呢一點我有保留～可以一搏～
4. 唔單止來回，仲可以換單程或多航點。單程所需里數即係來回嘅一半，非常公平。
至於全球里數兌換表，可參考呢個網址：https://www.lifemiles.com/eng/inc/starredawards.aspx
如果透過「買1送1」方法買里數再兌換香港出發嘅長途機票，成本如下（未連稅）（商務／頭等）：
來回澳洲，紐西蘭：HK$11,700 / HK$15,210
來回美國，加拿大：HK$14,040 / HK$16,380
來回歐洲：HK$15,210 / HK$18,720
來回南美洲南部：HK$16,380 / HK$21,060
好啦！關鍵問題：咁點樣向哥倫比亞．中美洲航空公司買里數？當然第一步係上官網免費申請入會啦（網址：https://www.lifemiles.com/eng/mya/myp/mypfasenr.aspx）！之後靜待佢下一次推出「買1送1」優惠。今年5月/9月都曾經推出過：其實佢由依家到28/12都做緊「買1送1」（網址：https://www.lifemiles.com/eng/tra/pro/proofeinf.aspx?D=DOF22），只不過佢講明新會員不適用。唔緊要！今次Miss咗，依家入咗會先，下次咪有份玩囉！
最後俾個貼士大家：如果想換北美/澳紐頭等機票，機位極少，當冇就好，商務反而唔難換（暑假都有）；至於歐洲頭等唔太難入手，商務更加多的是。至於有邊啲星空聯盟成員揀呢？Check過系統，香港出發嘅通常離不開泰航／國航同新航，泰航同新航都有A380播！搭到就非常正斗！
可能您會問：買里數兌換經濟客位機票抵唔抵？小弟就唔建議，話晒經濟客位成日都有劈價（尤其係環球航空業持續低迷，您見國泰個個禮拜搞fanfares就知），反而商務／頭等就極少有劈價。既然依家打4折，飛咁長時間，梗係豪一豪佢啦！
哥倫比亞．中美洲航空公司飛行常客會網址：www.lifemiles.com
（記得按下面「讚好」Share俾Facebook朋友）
